ކަޅުވަކަރު މިސްކިތަށް ވީގޮތް ރައްޔިތުންނަށް ސާފުކޮށްދޭން ޖެހޭ: ޝަމާއު ޝަރީފު
17 ޖޫން 2018 | އާދީއްތަ 12:30އަސާރީ ތަންތަން ރައްކާތެރި ކުރުމަށް މަސައްކަތް ކުރަންޖެހޭ
ކަޅުވަކަރު މިސްކިތުގެ ބައިތައް
ކަޅުވަކަރު މިސްކިތަށް ވީގޮތް ރައްޔިތުންނަށް ސާފުކޮށްދޭން ޖެހޭ ކަމަށް މާލޭ ސިޓީ ކައުންސިލްގެ މޭޔަރ ޝަމާއު ޝަރީފު ވިދާޅުވެއްޖެ އެވެ.
ރާއްޖެޓީވީގެ ޚަބަރުފީތާ ޕްރޮގްރާމުގައި ވާހަކަދައްކަވަމުން ޝަމާއު ވިދާޅުވީ، ތާރީހީ ކަންކަން ބެލެހެއްޓުމަށް ގާނޫނުގައި މަތިކޮށްފައިވީ ނަމަވެސް، ގައުމީ އިދާރާތަކެއްވެސް ތާރީހީ ތަންތަން ބެލެހެއްޓުމަށް އުފައްދާފައިވާ ކަމަށެވެ. މާލޭގައި ގައުމީ އިދާރާތަކެއް ހުރުމުން މިފަދަ ތަންތަން ބެލެހެއްޓުމުގައި ސިޓީ ކައުންސިލްގެ މާބޮޑު ރޯލެއް ނޯންނަ ކަމަށް ޝަމާއު ވިދާޅުވި އެވެ. ބިހުރޯޒު ކަމަނާ މިސްކިތުގެ ގޯތިތެރޭގައި ހުރި ބައެއް ތަންތަން ހަލާކުވެގެންދިޔައީ ކަމަށާއި އަލިރަސްގެފާނު ޒިޔާރަތައްވެސް ބަދަލުތަކެއް ގެނެވުނު ކަމަށް އޭނާ ވިދާޅުވި އެވެ. މިއީ ކަންކަބޮޑުވާ ކަންކަން ކަމަށާއި ތަރައްގީ ކުރެވުނު ކަމުގައިވީ ނަމަވެސް އާސާރީ ތަންތަނާއި ރައްޔިތުންގެ ސަގާފަތް ދައްކުވައިދޭ ތަންތަން ހަލާކު ނުވެ ބެލެހެއްޓުމަކީ ކޮންމެހެން މުހިއްމު ކަމެއް ކަމަށް އޭނާ ވިދާޅުވި އެވެ.
"ސަލްޓަން ޕާކަށް ބަލާލި ކަމުގައިވީ ނަމަވެސް، މުޅި ތަނުގެ އަސްލު ގެއްލިފައިވަނީ. ތަނެއްގެ ތާރީހު އޮޅިގެން ނުވާނެ. އެތަންވެސް އަސްލު ނުގެއްލޭ ގޮތަށް ބަގީޗާއެއްގެ ގޮތުގައި ތަރައްގީ ކުރުމަށް ވަރަށް ބޮޑަށް ބާރު އެޅިން. އެހެންނަމަވެސް އެމިއުޒްމެންޓް ޕާކަކަށް ބަދަލު ގެނެވިގެންދިޔައީ." ޝަމާއު ވިދާޅުވި އެވެ.
ތާރީހީ ތަންތަން ހިމާޔަތް ކުރަންޖެހުމަކީ ކަމާ ގުޅޭ އިދާރާތަކުން އިސްކަން ދޭންޖެހޭނެ ކަމަށާއި މުންނާރު ފަދަ ތަންތަންވެސް ނުބެލެހެއްޓިގެން ދިއުމަކީ ކަންބޮޑުވާ ކަމެއް ކަމަށް އޭނާ ވިދާޅުވި އެވެ.
"މީގެ ކުރީގައި އެކި އެކި އިދާރާތަކުން ބެލެހެއްޓިގެން ދިޔަ ތަނެއް މުންނާރަކީ. މުންނާރު ބޭރުގައި ދަވާދެއްވެސް ނުލެވޭ. ވަކި ކަހަލަ ކުލައެއް މިލެވެނީ. ގިނަ ދުވަހަށް ހަލާކު ނުވާނެފަދަ ގޮތަކަށް އިމާރާތް ބެހެއްޓޭނެ. މިކަންކަން ކުރަންޖެހެނީ ވަކި ގޮތްގޮތަކަށް. ފަންނީ ބޭފުޅުންގެ ލަފާގެ މަތިން މިކަންކަން ކުރަން މިޖެހެނީ. މުންނާރުގައި ފެހި ޖަހާފައި ވަނީ،" ޝަމާއު ވިދާޅުވި އެވެ.
ކަޅުވަކަރު މިސްކިތަށް ވީގޮތެއް ނޭންގި ގެއްލިފައިވާކަމަށް ބުނެ ސޯޝަލް މީޑިއާގައި ކަންބޮޑުވުން ފާޅުކޮށްފައިވެ އެވެ.
