ގްލާސްގޯގެ އާޓް ސްކޫލެއްގައި ރޯވެ އަނދައިފި
16 ޖޫން 2018 | ހޮނިހިރު 08:22ރޯވެފައިވަނީ ހުކުރު ދުވަހުގެ ރޭ 11:20 ހާއިރު
ޖޫން 15، 2018 ގައި ގްލާސްގޯގެ މެކިންޓޮޝް އާޓް ސްކޫލުގައި ރޯވެ އަނދަނީ
ގްލާސްގޯގެ މަޝްހޫރު އާޓް ސްކޫލެއް ކަމަށްވާ މެކިންޓޮޝްގައި އަލިފާނުގެ ހާދިސާއެއް ހިނގައި އިމާރާތުގެ އެއްބައި ހަލާކުވިތާ ހަތަރު އަހަރަށް ފަހު އަނެއްކާ ވެސް އަލިފާން ރޯވެއްޖެއެވެ.
އަލިފާން ރޯވެފައި ވަނީ ހުކުރު ދުވަހުގެ ރޭ 11:20 ހާއިރުއެވެ.
ކައިރީގައި ހުރި އިމާރާތްތަކުގައި ވެސް އަލިފާން ހިފާފައިވާއިރު އޭގެ ތެރޭގައި އެންމެ ބޮޑަށް ގެއްލުން ލިބުނު ކެމްޕަހުގެ ނައިޓް ކްލަބާއި އޯޓޫ އޭބީސީ މިއުޒިކް ވެނިއު ހިމެނެއެވެ.
ސްކޮޓްލޭންޑްގެ ފަޔަރ އެންޑް ރެސްކިއު އިން ބުނީ މިހާތަނަށް އެއްވެސް މީހަކަށް ހާނީއްކައެއް ވެގެން ރިޕޯޓްކޮށްފައި ނުވާ ކަމަށެވެ.
ފަޔަރ އެންޑް ރެސްކިއުގެ ޑެޕިއުޓީ ޗީފް އޮފިސަރ އިއަން ބުޝަލް ވިދާޅުވީ އަލިފާން ކޮންޓްރޯލް ކުރުން ދިގުލައިގެން ހިނގައިދާނެ ކަމަށެވެ. އޭނާ ވިދާޅުވީ ހާދިސާ ހިނގި ސަރަހައްދަށް 120 އަށް ވުރެ ގިނަ ފަޔަރ ފައިޓަރުން ފޮނުވާފައިވާ ކަމަށާއި މި ހާދިސާއަކީ އިންތިހާއަށް ގޮންޖެހުން ބޮޑު ހާދިސާއެއް ކަމަށެވެ.
ފަޔަރ އެންޑް ރެސްކިއުގެ ޑެޕިއުޓީ އެސިސްޓެންޓް ޕީޓަރ ހެތް ވިދާޅުވީ ކުދިކުދި ތަންތަން ކޮޅުގައި އަދިވެސް ހުޅު އެބަހުރި ކަމަށާއި ނަމަވެސް އަލިފާން ކޮންޓްރޯލް ކުރެވިފައި ވާކަމަށެވެ.
އޭނާވިދާޅުވީ އާޓް ސްކޫލްގެ އިމާރާތް ހުރީ "ވަރަށް ބޮޑަށް ހަލާކުވެފައި" ކަމަށާއި ހުރިހާ ފަންގިފިލާއަކަށް އަސަރުކޮށްފައި ވާކަމަށެވެ.
މެކިންޓޮޝް ބިލްޑިންގ 2014 ވަނަ އަހަރު ވެސް ވަނީ އަލިފާނުގެ ހާދިސާއެއްގައި ވަރަށް ބޮޑަށް ހަލާކުވެފައެވެ އަދި އޭގެ ފަހުން 20 މިލިއަން ޕައުންޑާއި 35 މިލިއަން ޕައުންޑާއި ދެމެދުގެ އަދަދެއް ޚަރަދުކޮށްގެން އިމާރާތް މަރާމާތު ކުރުމަށް ފަހު އަލުން ހުޅުވުމަށް ހަމަޖެހިފައި އޮތީ އަންނަ އަހަރުއެވެ.
