އިސްރާއީލްގެ ގަތުލް އާންމު އދ. އިން ކުށްވެރިކޮށްފި

އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ ގަތުލްއާންމު އދ. އާންމު މަޖިލީހުންގެ ބޮޑު އަޣުލަބިއްޔަތަކުން ކުށްވެރިކޮށްފި އެވެ.

އދ.ގެ އާންމު މަޖިލީހުގައި އިސްރާއީލުގެ ގަތުލުއާންމު ކުށްވެރިކުރީ، އިސްލާމީ ގައުމުތަކުގެ ފަރާތުން ތުރުކީއާއި، އަލްޖީރިއާއިން ހުށަހެޅި މައްސާލައާއި ގުޅިގެން، ނިމިގެންދިޔަ އާންމު މަޖިލީހުގެ ކުއްލި ޖަލްސާގައެވެ.

މިގަރާރު ފާސްކުރުމަށް އދ.ގެ މެމްބަރު ގައުމުގެ ތެރެއިން 125 ގައުމުން ވޯޓްދީފައެވެ. އަދި ގަރާރާ ދެކޮޅަށް 8 ގައުމަކުން ވޯޓުދީފައިވާއިރު 45 ގައުމުން ވޯޓްގައި ބައިވެރިނުވެއެވެ.

އދގެ އާންމު މަޖިލީހުގައި ވަނީ އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ބާރުގެ ބޭނުން ނަހަމަ ގޮތުގައި ކުރަމުންދާ ކަމަށާއި، ބާރުގެ ބޭނުން ކުރަންނުޖެހޭ މިންވަރަށް ބޭނުންކުރާ ކަމަށްބުނެ މިމައްސަލަ ވަރަށް ބޮޑަށް ކުށްވެރިކޮށްފަ އެވެ.

ފަލަސްތީނުން އދ. އަށް ކަނޑައަޅާފައި ހުންނަވާ ސަފީރު ރިޔާދު މަންސޫރު ވިދާޅުވީ ފަލަސްތީނު އާންމު ރައްޔިތުން ހިމާޔަތް ބޭނުންވާ ކަމަށެވެ. އަދި އިންސާނިއްޔަތާ ހިލާފު އަމަލުތައް ހިންގާ، ފަލަސްތީނުގެ ރައްޔިތުން ޝަހީދު ކުރަމުންދާއިރު ބަލަން ނުތިބެވޭނެ ކަމަށް އޭނާ ވިދާޅުވި އެވެ.

އިސްރާއީލްގެ މި ގަތުލް އާންމު 60 ދުވަހުގެ ތެރޭގައި ބަލައި ފަލަސްތީނުގެ ރައްޔިތުންނަށް ސަލާމަތާއި ރައްކާތެރިކަންދޭނެ ގޮތެއް މަޖިލީހަށް ހުށަހެޅުމަށް އދ.ޗީފް އެންޓޮނިއު ގުތޭހިޝްއަށް ވަނީ އަންގާފައެވެ.

އދގެ އާންމު މަޖިލީހުން މިގަރާރު ފާސްކުރިއިރު އެގަރާރު ފާސްވިޔަނުދިނުމަށް އެމެރިކާއިން ވަނީ ގިނަ މަސައްކަތްތަކެއް ވެސް ކޮށްފައެވެ. މީގެ އިތުރުން އެމެރިކާއިން ވަނީ އިސްލާމީ ގައުމުތަކުން ހުށަހެޅި ގަރާރަށް އިސްލާހް ހުށައަޅާފައެވެ. މިއިސްލާހުގައި ހިމަނާފައިވަނީ ހަމާސް ކުށްވެރިކުރުމަށެވެ.

އެމެރިކާ އެމްބަސީ ގުދުސްއަށް ބަދަލުކުރުމާ ދެކޮޅުހަދައި، ޣައްޒާ-އިސްރާއީލު ވަކިކުރާ އިމުގައި މިއަހަރުގެ މާޗްމަހު ފަލަސްތީނުގެ އާންމުން ފެށި މުޒާހަރާގެ ތެރެއަށް އިސްރާއީލުން ބަޑިޖަހައި މިހާތަނަށް ވަނީ ގިނަ ބަޔަކު މަރާލާފަ އެވެ. އިސްރާއީލްގެ ސިފައިންގެ އެކި ހަމަލާތަކުގައި މެއި މަހުގެ ނިޔަލަށް ފަލަސްތީނުގެ 120 މީހުން ވަނީ މަރާލާފައިވެ އެވެ.