ދިވެހިން ބޭނުންވާ މީހާ ދިވެހިންގެ ވެރިކަމަށް ދިވެހިންނަށް ގެނެވެންޖެހޭނެ، ސާފު ނުސާފު ނިންމާނީ ރައްޔިތުން: ރައީސް ނަޝީދު
12 ޖޫން 2018 | އަންގާރަ 18:47ސާފު ކެނޑިޑޭޓެއް ހޯދުމަށް އިލެކްޝަންސް ކޮމިޝަނުން ދައްކަވާ ތިނޯހެއްގެ ފަގައިގެ މިންވަރަކީ ދިވެހިންނަށް ހައްޤު މިންވަރު ނޫން
ކުރީގެ ރައީސް ނަޝީދާއި، ރައީސް އަބްދުﷲ ޔާމީނާއެކުގައި
ދިވެހިން ބޭނުންވާ މީހާ ދިވެހިންގެ ވެރިކަމަށް ދިވެހިންނަށް ގެނެވެންޖެހޭނެކަމަށް ވިދާޅުވެ، ކުރީގެ ރައީސް މުހައްމަދު ނަޝީދު އިލެކްޝަންސް ކޮމިޝަނަށް ފާޑުވިދާޅުވެއްޖެ އެވެ.
އެމްޑީޕީގެ އާންމު މެމްބަރުންގެ އަޤުލަބިއްޔަތުން އެ ޕާޓީގެ ރިޔާސީ ކެނޑިޑޭޓްގެ ގޮތުގައި ރައީސް މުހައްމަދު ނަޝީދު އިންތިހާބުކޮށްފައިވާއިރު، އިލެކްޝަންސް ކޮމިޝަނުން ވަނީ އެމަނިކުފާނުގެ ކެނޑިޑަސީ ބަލައިނުގަތުމަށް ނިންމާފަ އެވެ. އެއާއެކު އިދިކޮޅު ފަރާތްތަކުގެ މެދުގައި ސާފު ކެނޑިޑޭޓެއްގެ ބަހުސް ގަދަވެފައިވަނިކޮށް ރައީސް ނަޝީދު ކުރެއްވި ޓުވީޓެއްގައި ވިދާޅުވީ ސާފު ކެނޑިޑޭޓެއް ހޯދުމަށް އިލެކްޝަންސް ކޮމިޝަނުން ދައްކަވާ ތިނޯހެއްގެ ފަގައިގެ މިންވަރަކީ ދިވެހިންނަށް ހައްޤު މިންވަރު ނޫންކަމަށެވެ.
އޭގެއިތުރުން އެމަނިކުފާނު ވިދާޅުވީ ދިވެހިން ބޭނުންވާ މީހާ ދިވެހިންގެ ވެރިކަމަށް ދިވެހިންނަށް ގެނެވެންޖެހޭނެކަމަށާއި، ސަފު ނުސާފު ނިންމާނީ ރައްޔިތުން ކަމަށެވެ.
ސާފު ނުސާފު ކެނޑިޑޭޓެއްގެ ބަހުސް ގަދަވެފައިވަނީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް، ގުޅިފައިވާ ޕާޓީތަކުން ނެރެންޖެހޭނީ ސާފު ކެނޑިޑޭޓެއް ކަމަށް ވިދާޅުވެ ބަޔާނެއް ނެރުއްވުމާއި ގުޅިގެންނެވެ. އޭގެއިތުރުން ޤާސިމް އިބްރާހިމް ވަނީ ރައީސް ނަޝީދުގެ ކެނޑިޑަސީ ސައްހަ ނުވާނެކަމަށް ނިންމަވައި، އެމަނިކުފާނުގެ ނަންފުޅައް ވެސް ތާއީދުނުކުރައްވާކަން ހާމަކުރައްވާފައެވެ.
