މަޝްހޫރު އެނިމޭޝަން ކުންފުނި ކަމަށްވާ ޕިކްސާގެ ބާނީ އަދި ޑިޒްނީ އެނިމޭޝަން ސްޓޫޑިއޯގެ ޗީފް ކްރިއޭޓިވް އޮފިސަރ ޖޯން ލެސެޓާގެ މައްޗަށް ވެސް ޖިންސީގޯނާގެ ތުހުމަތު ކުރެވުމާއެކު އެމަގާމު ދޫކުރަން އޭނާ ނިންމައިފިއެވެ.

އެކަން ހާމަކޮށް ޕިކްސާއިން ނެރުނު ބަޔާނެއްގައި ބުނެފައިވަނީ އޭނާ މިއަހަރު ނިމެންދެން އެކުންފުނީގެ ކޮންސަލްޓެންޓެއްގެ ގޮތުގައި މަސައްކަތް ކުރާނެ ކަމަށާއި އެއަށް ފަހު އޭނާ ޑިޒްނީ ކުންފުނިން އެއްކޮށް ވަކިވާނެ ކަމަށެވެ.

ފަސްދޮޅަސް އެއް އަހަރުގެ ލެސެޓާ އަކީ މިހާތަނަށް ޕިކްސާއިން ރިލީޒް ކޮށްފައިވާ ކާޓޫންތަކުގެ ކްރިއޭޓިވް ކަންތައްތަކުގައި އެންމެ އިސްކޮށް އުޅުނު އެކަކެވެ. އޭނާ ވަނީ ޕކްސާއިން ނެރުނު ކާމިޔާބު ކާޓޫން ޓޯއި ސްޓޯރީ އާއި ޓޯއި ސްޓޯރީ 2 ވެސް ޑައިރެކްޓް ކޮށްފައެވެ.

މީގެ އިތުރުން ލެސެޓާ އެގްޒެކެޓިވް ޕްރޮޑިއުސަރެއްގެ ގޮތުގައި މަސައްކަތް ކޮށްފައިވާ އިންކްރެޑިބަލްސް2 ރިލީޒް ކުރުމަށް ހަމަޖައްސާފައި ވަނީ 15 ޖޫން 2018 ގައެވެ. މި ފިލްމަކީ މިއަހަރު ނިކުންނާނެ އެންމެ އުއްމީދީ ފިލްމު ކަމަށް ގިނަ ބަޔަކު ބުނެއެވެ.

މިދިޔަ އަހަރުގެ ތެރޭގައި ލެސެޓާގެ ފުށުން އޭނާގެ ސްޓާފުންނަށް އަޚުލާގީ މައްސަލަތަކުގެ  ތުހުމަތު ކޮށްފައިވާ ކަމަށް މީޑިގާއި ދެކެވުމާއިގުޅިގެން އޭނާ ވަނީ އެކަމަށް މާފަށް އެދޭ ކަމަށް ބުނެފއެވެ. އަދި އޭނާ އެކަންތައްތައް ކޮށްފައިވަނީ އެއްވެސް ނުބައި ނިޔަތެއް އޮވެގެން ނޫން ކަމަށް ވެސް ވަނީ ބުނެފައެވެ.