ރާއްޖޭގައި ވިދަމުން އަންނަ މިއުޒިކް ލޭބަލް، ސިމްބޮލިކް ރެކޯޑްސްގެ "ކުރު ވާހަކަ" ހޮނިހިރު ދުވަހުގެ ރޭ ރިލީޒްކޮށްފިއެވެ.
ހޮނިހިރު ދުވަހުގެ ރޭ 12 ޖެހުމާއެކު ޔޫޓިއުބްގައި ރިލީޒްކޮށްފައިވާ “ކުރު ވާހަކަ" މިހާރު ޔޫޫޓިއުބް މެދުވެރިކޮށް ފެންނާނެެވެ.
މި ލަވައިގެ ހުރިހާ މަންޒަރެއް ނަގާފައިވަނީ އދ.މަހިބަދޫގައެވެ. މި ލަވައިގައި އެކްޓުކޮށްފައިވަނީ ވެސް މަހިބަދޫގެ ދެ ކުދިން ކަމަށްވާ ސެމީ އާއި އެމީއެވެ.
ކުރުވާހަކައާއި ބެހޭ މައުލޫމާތު ރާއްޖެއެމްވީއަށް ދެމުން ސިމްބޮލިކް ރިކޯޑްސްގެ ޑައިރެކްޓާ އޮފް ކްރިއޭޓިވް އާޓްސް އިސްމާއިލް ނާއިލް (ބްލަޑް) ބުނީ މި ލަވައިގެ ހުރިހާ މަސައްކަތެއް ނިންމަން ހަތަރު މަހެއްހާ ދުވަސް ހޭދަވިކަމަށެވެ. އޭގެ ތެރޭގައިަ މި ލަވައިގެ ވީޑިއޯ ކޮންސެޕްޓް ޑިވޮލެޕްކޮށް، ލަވައިގެ ވީޑިއޯގެ މަސައްކަތްތައް ނިންމުމަށް އެއްމަސް ނެގި ކަމަށް ނާއިލް ބުންޏެވެ.
"ކުރު ވާހަކަ"، މި ލަވަ ކިޔާދީފައިވަނީ ސިމްބޮލިކް ރެކޯޑްސްގެ ދެ އާޓިސްޓުން ކަމަށް ނަބީލް ނިޔާޒް (ޓޯއީ) އާއި ރައްޔާން މުހައްމަދު (ރައިޑޭ) އެވެ.
ސިމްބޮލިކް ރިކޯޑްސްގެ ކުރިމަގާއި ގުޅޭގޮތުން މައުލޫމާތު ހިއްސާކުރަމުން ނާއިލް ބުނީ، ކުރިއަށް އޮތްތަނުގައި ރާއްޖޭގެ މަޝްހޫރު ބޭންޑެއް ސިމްބޮލިކް ރިކޯޑްސްގެ ލޭބަލްގެ ދަށަށް އައުމަށް ހަމަޖެހިފައިވާ ކަމަށެވެ. އެހެން ނަމަވެސް އެއީ ކޮން ބޭންޑެއް ކަމެއް އޭނާ ނުބުނެއެވެ.
ސިމްބޮލިކް ރެކޯޑްގެ މެނޭޖިން ޑިރެކްޓަރ އަހުމަދު މުހައްމަދު (އޭޑީ) ބުނީ ސިމްބޮލިކްގެ ފޭނުންނާ އެކީ ސިމްބޮލިކްގެ "މީޓް އެންޑް ގްރީޓް" އިވެންޓެއް ބޭއްވުމަށް ތައްޔާރުވަމުން އަންނަ ކަމަށެވެ. މި އިވެންޓުގެ ބޭނުމަކީ ފޭނުންނާއި ބައްދަލުކޮށްލުމަށްކަމަށް އޭޑީ ބުންޏެވެ.
މިހާތަނަށް ސިމްބޮލިކް އިން ވަނީ 10 ވީޑިއޯ ލަވަ އާންމުންނާއި ހަމައަށް ގެނެސްދީފައެވެ. އެ ހުރިހާ ލަވައަކީ ވެސް އަމިއްލަ ދިވެހި ރާގެވެ. ސިމްބޮލިކްގެ ހާއްސަ ކަމަކީ އެއީ ކަމަށް އެ ލޭބަލުން ބުނެއެވެ.
ސިމްބޮލިކުން ދަނީ އެ ކުންފުނިން ނެރޭ ތިންވަނަ އަލްބަމް މިއަހަރުގެ ތެރޭގައި ނެރުމުގެ މަސައްކަތްވެސް ކުރަމުންނެވެ. މި އަލްބަމުގެ އިތުރުން، 70 އަށްވުރެ ގިނަ އަމިއްލަ ރާގުގެ ލަވަތައް އުފެއްދުމުގެ މަސައްކަތް މިހާރުވެސް ކުރިއަށްދާކަމަށް ސިމްބޮލިކުން ބުނެއެވެ. ސިމްބޮލިކް ރިކޯޑްސްގެ ފުރަތަމަ އަލްބަމަކީ ރާއްޖޭގައި އެންމެ ފުރަތަމަ ހިޕް ހޮޕް އަލްބަމް ކަމަށްވާ "މަގުމަތި" އެވެ. އެ އަލްބަމުގެ ލަވަތަކަށް ބޮޑު ތަރުހީބެއް ވަނީ ލިބިފައެވެ. އޭގެ ފަހުން، އެ ލޭބަލްއިން ވަނީ "ސްޓޭޓް އޮފް އެރަރ" ގެ ނަމުގައި އީޕީ އަލްބަމެއްވެސް ނެރެފައިވެއެވެ.
ހަމަ އެކަނި ހިޕް ހޮޕް މިއުޒިކަށް ހާއްސަވެގެން އުފެދުނު ނަމަވެސް މިހާރު ލޭބަލްގެ މަސައްކަތްތައް ފުޅާވެ ހުރިހާ ވައްތަރެއްގެ މިއުޒިކެއްވެސް ދަނީ އާންމުންނާ ހަމައަށް ގެނެސްދެމުންނެވެ. އާންމުންގެ ފަރާތުން ސިމްބޮލިކް ރެކޯޑްއަށް ލިބޭ ތަރުހީބަށް އެ ޓީމުން ޝުކުރުއަދާކުރެއެވެ.
