ފްރެންޗް އޯޕަން: ސެމީގެ ޖާގައެއް ނަޑާލް ކަށަވަރުކޮށްފި

ކްލޭ ކޯޓުގައި ކުޅޭ އެންމެ ޝަރަފުވެރި މުބާރާތް ކަމަށްވާ ފްރެންޗް އޯޕަންގެ ސެމީ ފައިނަލުން ދުނިޔޭގެ އެއްވަނަ ޓެނިސް ކުޅުންތެރިޔާ ކަމަށް ސްޕެއިންގެ ރަފައޭލް ނަޑާލް ޖާގަ ހޯދައިފިއެވެ.

މިދިޔަ އަހަރު ވެސް މި މުބާރާތް ކާމިޔާބުކުރި ނަޑާލް ވަނީ 11 ވަނައަށް ސީޑުކުރެވިފައިވާ އާޖެންޓީނާގެ ޑިއޭގޯ ޝްވަޓްޒްމަން ތިން ސެޓު އެއް ސެޓުން ބަލިކޮށް ސެމީއަށް ދަތުރުކޮށްފައެވެ. މި މެޗުގެ ފުރަތަމަ ސެޓު 6-4 އިން ޝްވަޓްޒްމަން ގެންދިޔައިރު ނަޑާލް ވަނީ ފަހުން ކުޅުނު ތިން ސެޓު 6-3، 6-2 އަދި 6-2 އިން ކާމިޔާބުކޮށްފައެވެ. މި މެޗު ވާރޭވެހުމުގެ ސަބަބުން ލަސް ވެސް ކުރެވުނެވެ.

މެޗަށް ފަހު ނޫސްވެރިންނާ ވާހަކަ ދައްކަމުން ނަޑާލް ބުނީ މެދުކަނޑާލުމުން ފައިދާކުރި ކަމަށާއި މުބާރާތް ކާމިޔާބުކުރުމަކީ އުއްމީދެއް ކަމަށެވެ.

ސެމީ ފައިނަލުގައި ނަޑާލް ނުކުންނާނީ ފަސްވަނައަށް ސީޑުކުރެވިފައިވާ ހުއާން މާޓިން ޑެލްޕޮޓްރޯއާއި ދެކޮޅަށެވެ. ޑެލްޕޮޓްރޯ ސެމީއަށް ދަތުރުކުރީ ތިންވަނައަށް ސީޑުކުރެވިފައިވާ ކްރޮއޭޝިއާގެ މަރިން ޗިލިޗް ތިން ސެޓު އެއް ސެޓުން ބަލިކޮށްގެންނެވެ. މި މެޗުގެ ފުރަތަމަ ސެޓު 7-6 އިން ޑެލްޕޮޓްރޯ ގެންދިޔައިރު ދެވަނަ ސެޓު 7-5 އިން ގެންދިޔައީ ޗިލިޗްއެވެ. މި މެޗު ޑެލްޕޮޓްރޯ ގެންދިޔައީ ފަހުން ކުޅުނު ދެ ސެޓު 6-3 އަދި 7-5 އިން ކާމިޔާބުކޮށްގެންނެވެ.

މުބާރާތުގެ ދެވަނަ ސެމީގައި ކުޅޭނީ 7 ވަނައަށް ސީޑުކުރެވިފައިވާ އޮސްޓްރިއާގެ ޑޮމިނިކް ތިއެމް އަދި އިޓަލީގެ މާކޯ ސެޗިނާޓޯއެވެ.

މިދިޔަ އަހަރު ވެސް މި މުބާރާތް ކާމިޔާބުކުރި ނަޑާލް ނުކުންނާނީ 11 ވަނަ ފަހަރަށް މި މުބާރާތް ކާމިޔާބު ކުރުމަށެވެ.