ޕްރައިމަރީއަށްފަހު، ރިޔާސީ އިންތިހާބުގައިވެސް ރައީސް ނަޝީދުގެ ކެމްޕޭން މެނޭޖަރަކަށް އަސްލަމް
6 ޖޫން 2018 | ބުދަ 20:37މެނޭޖަރުކަމާއި ހަވާލުވެ، ފުރަތަމަ ބައްދަލުވުން އަންގާރަ ދުވަހުގެ ރޭ ކުރިއަށްގެންގޮސްފައިވޭ
ހިތަދޫ އުތުރު ދާއިރާގެ މެމްބަރު އަސްލަމް - އޭނާ ވަނީ ރިޔާސީ ޕްރައިމަރީގައިވެސް ގިނަ މަސައްކަތްތަކެއް ކކޮށްފައި
އެމްޑީޕީގެ ރިޔާސީ ޕްރއިމަރީއަށްފަހު، ކުރިއަށް އޮތް ރިޔާސީ އިންތިހާބުގައިވެސް ކުރީގެ ރައީސް މުހައްމަދު ނަޝީދުގެ ކެމްޕޭން މެނޭޖަރެއްގެ ގޮތުގައި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ހަމަޖައްސަވައިފި އެވެ.
އެމްޑީޕީގެ ރިޔާސީ ޕްރައިމަރީގައި ރައީސް ނަޝީދަށް ކާމިޔާބު ކެމްޕޭނެއް ކޮށްދެއްވުމުގައި އެންމެ އިސްކޮށް ހުންނެވި އަސްލަމް ވަނީ އޭޭނާ ރައީސް ނަޝީދުގެ ރިޔާސީ އިންތިހާބުގެ ކެމްޕޭން މެނޭޖަރުގެ ގޮތުގައި ހަމަޖައްސަވާފައިވާކަން ކަށަވަރުކޮށްދެއްވާފަ އެވެ. އެގޮތުން ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަދައްކަވަމުން އަސްލަމް ވިދާޅުވީ އެކަން ރަސްމީކޮށް އިއުލާން ނުކުރެއްވިނަމަވެސް، ކެމްޕޭން މެނޭޖަރެއްގެ ގޮތުގައި އޭނާ ހަމަޖައްސައިފައިވާކަމަށާއި، އަދި ބައެއް މަސައްކަތްތައްްވެސް ކުރިއަށް ގެންދާކަމަށެވެ.
އަސްލަމް ވިދާޅުވީ ރައީސް ނަޝީދުގެ އެދިވަޑައިގަތުމަކަށް މެނޭޖަރުކަމާއި ހަވާލުވެ، ފުރަތަމަ ބައްދަލުވުން އަންގާރަ ދުވަހުގެ ރޭ ކުރިއަށް ގެންގޮސްފައި ވާކަމަށެވެ.
"ޕާޓީގެ ކެމްޕޭން ސްޓަރކްޗަރގެ ތެރެއިންވެސް ވަރަށް ގިނަ މަސައްކަތްތައް މިހާރުކުރެވިފައިހުރީ. އަޅުގަނޑުމެން ޕްރައިމަރީ ހިންގި އިރުގައިވެސް ބައެއް މަސައްކަތްތަކެއް ކުރެވިފައި އެބަވޭ. އަޅުގަނޑުމެން މި ދެބައި މާރޖްކޮޮށްލަން ނިންމިފައިވަނީ ރައީސް ނަޝީދުގެ އެދިވަޑައިގަތުމުގެ މަތިން"
43000 މެމްބަރުންގެ ވޯޓާއެކު އެމްޑީޕީގެ ރިޔާސީ ޓިކެޓު ރައީސް ނަޝީދަށް ދީފައިވާއިރު، ސަރުކާރުންނާއި އިލެކްޝަންސް ކޮމިޝަނުން ބުނެފައިވަނީ ރައީސް ނަޝީދަށް އިންތިހަބުގައި ވާދަކުރުމުގެ ފުރުސަތު ނުދޭނެ ކަމަށެވެ. ސަބަބެއްކަމަށް ބުނެފައިވަނީ ޖިނާއީ ކުށެއް ސާބިތުވެ، ހުކުމެއް ތަންފީޒްކުރަމުން ގެންދަންޖެހުމުގެ ސަބަބުން ކަމަށެވެ.
ނަމަވެސް ރައީސް ނަޝީދުގެ މައްޗަށް އިއްވާފައިވާ ހުކުމަކީ އ.ދ ގެ އިތުރުން ދުނިޔޭގެ ބޮޑެތި ހުރިހާ ގައުމަކުން ބުނެފައިވާ ގޮތުގައި ގާނޫނުގެ އަސާސްތަކާ ޚިލާފަށް ހިންގި ޝަރީއަތަކުން ކޮށްފައިވާ ހުކުމެއް ކަމަށް ވުމާއެކު އެއީ ބާތިލް ހުކުމެއް ކަމަށެވެ. އދ އިން ދިވެހި ސަރުކާރަށް ގޮވާލާފައިވަނީ ރައީސް ނަޝީދުގެ ހިފެހެއްޓިފައިވާ ހުރިހާ ހައްގުތަކެއް އަލުން އިއާދަ ކޮށްދިނުމަށެވެ.
