ނިހާނަށް ވީގޮތުން ދެރަނުވިއަސް ލަދުގަނެއްޖެ:ނަޒީރު
6 ޖޫން 2018 | ބުދަ 17:16ނިހާން މިއަދު އިހްސާސްކުރައްވަމުން ގެންދަވަނީ ނިހާނުގެ މަދަދާއި ބޮޑު ހިއްސާއެއް އޮވެގެން ކުރެއްވި ކަމެއްގެ ނަތީޖާ
ނަޒީރު: ސަރުކާރަށް ވަރަށް ބޮޑަށް ފާޑު ވިދާޅުވޭ
ޕީޕީއެމްގެ ޕީޖީލީޑަރު އަދި ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަހުމަދު ނިހާން ހުސައިން މަނިކު އިންޑިއާއަށް ނޭރުވުމުން ދެރަނުވިޔަސް ވަރަށް ލަދުގަނެއްޖެ ކަމަށް ޢަދާލަތު ޕާޓީގެ މީޑިއާ ކޮމެޓީގެ ޗެއާރ އަލީ ނަޒީރު ވިދާޅުވެއްޖެއެވެ
އިންޑިއާއަށް ކުރެއްވި ދަތުރުފުޅެއްގައި އެޤައުމަށް ނާރުވާ ނިހާން ބޭރު ކޮށްލެއްވުމާއި ގުޅިގެން ވަރަށް ބޮޑަށް އިންޑިއާއަށް ފާޑު ވިދާޅުވެފައިވަނިކޮށް އަލީ ނަޒީރު ކުރެއްވި ޓްވީޓެއްގައި ވިދާޅުވީ، ނިހާން މިއަދު އިހްސާސްކުރައްވަމުން ގެންދަވަނީ ނިހާނުގެ މަދަދާއި ބޮޑު ހިއްސާއެއް އޮވެގެން ރައީސް ޔާމީންގެ މޭސްތިރިކަމުގައި މިޤައުމުގެ ދިދައާއި ނިޝާންޖެހި ލިއުންތަކަށް ދުނިޔޭގައި ދެވިފައި އޮންނަ މަތީ ދަރަޖަ ގެއްލިފައި އޮތް މިންވަރު ކަމުގައެވެ.
އަދި ނިހާނަށް ވީގޮތުން ނަޒީރު ދެރަނުވިޔަސް އެކަމާ ވަރަށް ލަދުގަނެފައިވާ ކަމަށް ނަޒީރު ވިދާޅުވިއެވެ.
މީގެ އިތުރުން އިންޑިއާއަށް ބޭސްފަރުވާއަށްދާ ދިވެހިންނަށް އިންޑިއާއަށް ނުވަދެވުމަކީ ދެރަކަމެއް ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވި ވިދާޅުވުމަށް ވެސް ނަޒީރުވަނީ ރައްދު ދެއްވާފައެވެ.
ޝަރީފަށް އަމާޒުކޮށް ނަޒީރު ވިދާޅުވީ ކާށިދޫ ދާއިރާގެ މެމްބަރު ފައިސަލް ނަސީމްގެ ދަރިފުޅުގެ މުހިއްމު ފަރުވާއަކަށް ރާއްޖެއިން ބޭރަށް ވަޑައިގަންނަވަން އުޅުމުން ރާއްޖެއިން އެކަމަށް ހުރަސް އެޅިކަމުގައެވެ. ނަމަވެސް އެވަގުތު ޝަރީފު ހިމޭނުން ހުންނެވުމަށް ފަހު މިވަގުތު ކޯފާވުމަކީ ހަގީގީ ކަންބޮޑުވުމެއް ކަމަށް ގަބޫލު ނުކުރައްވާކަމަށް ނަޒީރު ވިދާޅުވިއެވެ.
ކުރިންވެސް އިންޑިއާއަށް ވަރަށް ބޮޑަށް ފާޑު ވިދާޅުވަމުން ގެންދަވާ ނިހާން، އިންޑިއާއިން ބޭރުކޮށްލެއްވުމުން އޭނާ ވަނީ ވަރަށް ބޮޑަށް އިންޑިއާއަށް ފާޑު ވިދާޅުވެފައެވެ.
