އަމްރު، ނިހާނަށް: ކޮޗިން ފެރީ "ޗޮކުން" ނުދޭ!
ކޮޗިން ފެރީ މިވަގުތު އޮތީ މާލެ ސަރަހައްދުގައި މުދާ ބާލަން
ކޮޗިން ކާގޯ ފެރީ - އިންޑިއާ އާއި ރާއްޖެއާ ދެމެދު މަހަކު 2-3 ދަތުރު ކުރުމަށް ހަމަޖެހިފައިވޭ
އިންޑިއާގެ ކޮޗިން އިން ރާއްޖެއަށް ކުރަމުންދިޔަ ފެރީ ނިޒާމު "ޗޮކުން" ދިޔައީތޯ، ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ނިހާނު ހުސައިން މަނިކު ކުރެއްވި ސުވާލަށް އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ރައްދު ދެއްވައިފި އެވެ.
ނިހާނު ކުރެއްވި ޓްވީޓެއްގައި ވިދާޅުވީ، މިމަހު އަދި ކޮޗިން ފެރީގެ ހަބަރެއް ނުވާކަމަށެވެ. އަދި ކޮޗިން ފެރީ ޗޮކުން ދިޔައީތޯއޭ ވިދާޅުވެ ނިހާނު ވަނީ ސުވާލު އުފައްދާފަ އެވެ.
ނިހާނުގެ އެޓްވީޓަށް ރައްދު ދެއްވަމުން، އެސްޓީއޯގެ މެނޭޖިންގ ޑިރެކްޓަރ އަމްރު ވިދާޅުވީ، އިންޑިއާ ކާގޯ ފެރީ މިވަގުތު މާލެ ސަރަހައްދުގައި މުދާ ބާލަމުންދާ ކަމަށެވެ. ދެން އެނބުރި ގޮސް، އަންނާނީ ނޮވެމްބަރު މަހުގެ 12 ހިސާބުގައި ކަމަށް އަމްރު ވިދާޅުވި އެވެ.
މީގެއިތުރުން އަމްރު ވަނީ، ކާގޯ ފެރީ އިން މުދާ ގެންނަން ބޭނުންވަނީތޯ ނިހާނު ގާތު އައްސަވާފަ ވެއެވެ.
ކޮޗިން ފެރީ އަކީ ރާއްޖެއަށް 3000 ޓަނުގެ މުދާ އުފެލޭ ކާގޯ ފެރީ އެވެ. އިންޑިއާގެ ކޮޗިން އިން ކާގޯ ފެރީ ފުރަތަމަ ބަނދަރު ކުރަނީ ހދ. ކުޅުދުއްފުށި ޕޯޓަށެވެ.
ފުރަތަމަ ދަތުރުގައި ކޮޗިން ފެރީން ކުޅުދުއްފުއްޓަށް ގެނައި ސިމެންތި އަގުހެޔޮކޮށް އެސްޓީއޯއިން ވިއްކަން ފަށާފައި ވެއެވެ. އެފެރީގައި، އެސްޓީއޯއިން ވަނީ ކުޅުދުއްފުޓަށް 500 ޓަނުގެ ސިމެންތި އެތެރެކޮށްފައެވެ. އެސްޓީއޯއިން ކުރިން ރެމްކޯ ސިމެންތި ވިއްކަމުންދިޔައީ 106 ރުފިޔާ އަށެވެ. ނަމަވެސް، އޮކްޓޯބަރު އެއްވަނަ ދުވަހުން ފެށިގެން ސިމެންތި ބަސްތާއެއްގެ އަގު ވަނީ 90 ރުފިޔާއަށް ހެޔޮކޮށްފައެވެ.
އެސްޓީއޯއިން ބުނީ އެ ކުންފުނީގެ އަމާޒަކީ ކާގޯ ފެރީން ގެންނަ މުދާ އުތުުރުގެ ރަށްތަކަށް ހެޔޮ އަގުގައި ވިއްކަމުންދިއުން ކަމަށެވެ. އަދި ކުރިއަށް އޮތް ތަނުގައިވެސް އެކި ބާވަތްތަކުގެ މުދާ ގެނެސް ހެޔޮ އަގުގައި ވިއްކަމުންދާނެ ކަމަށް އެސްޓީއޯއިން މައުލޫމާތު ދެއެވެ.
