ސަރުކާރު ހިންގާ މައި ޕާޓީ، ޕީޕީއެމް ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކުގެ ދަރިކަލުންނަށް އަގުބޮޑު ފުލެޓެއް ގަނެދިން މައްސަލަ ފަޅާއެރުމުން، ނުހައްގު މުއްސަނދިކަމެއް ނިހާން ހޯއްދެވި ކަމަށް އެމްޑީޕީ ޕާލަމެންޓްރީ ގްރޫޕުގެ ބައެއް މެމްބަރުން ތުހުމަތު ކުރައްވައިފިއެވެ.
މަޖިލީހުގެ މެޖޯރިޓީ ލީޑަރުކަން ވެސް ކުރައްވާ ވިލިމާލެ ދާއިރާގެ މެމްބަރު ނިހާންގެ ދަރިކަލުން، މުހައްމަދު އަލާން އަހުމަދަށް 4.7 މިލިއަން ރުފިޔާގެ ފުލެޓެއް ބައްލަވައިގަތީ ހުޅުމާލޭގައި މަތީ ފެންވަރުގައި ހަދާފައިވާ ޕްލެޓިނަމް ރެސިޑެންސްއިންނެވެ.
ނިހާންގެ ދަރިކަލުންނަށް ފުލެޓް ބައްލަވައިގަތް ކަމުގެ މައުލޫމާތު ލިބުމާ އެކު އެކަމާ ގުޅޭ ގޮތުން ނިހާނާ އެންމެ ފުރަތަމަ ސުވާލު ކުރީ ރާއްޖެއެމްވީންނެވެ. ބުރާސްފަތި ދުވަހުގެ ހެނދުނު ނިހާނާ ރާއްޖެއެމްވީން ގުޅައި ސުވާލު ކުރުމުން ނިހާން ސީދާ ޖަވާބެއް ނުދެއްވިއެވެ.
އެ ޚަބަރު މީޑިއާތަކުން ޖެހުމާ އެކު ނިހާން ވިދާޅުވީ އޭނާގެ ދަރިކަލުންނަށް ފުލެޓް ބައްލަވައިގަތީ ހަލާލު ފައިސާއިން ކަމަށެވެ. އޭނާއަކީ 2009 ވަނަ އަހަރުން ފެށިގެން މަޖިލީހުގެ މެމްބަރުކަން ކުރައްވަމުން ގެންދަވާ ބޭފުޅެއް ކަމަށާއި ކޮންމެ މަހަކު މުސާރައިގެ ގޮތުގައި ލިބިވަޑައިގަންނަވާ 79،000 ރުފިޔާއާ އެކު މިހާތަނަށް 8.5 މިލިއަން ރުފިޔާ ލިބިވަޑައިގެންފައިވާ ކަމަށް ނިހާން ވިދާޅުވެފައިވެއެވެ. އަދި ބޯހިޔާވަހިކަން ހޯއްދެވުމަށް ލޯނެއްގެ ގޮތުގައި ރާއްޖޭގެ ދެ ބޭންކަކުން 5.2 މިލިއަން ރުފިޔާގެ ލޯނެއް ނަންގަވާފައިވާ ކަމަށާއި އެ ލޯނުތަކަށް ބަރާބަރަށް ފައިސާ ދައްކަވަމުން އަންނަ ކަމަށް ވެސް ނިހާން މީޑީއާތަކަށް މައުލުމާތު ދެއްވާފައިވެއެވެ.
ފުލެޓް ބައްލަވައިގަތުމަށް ފައިސާ ހޯއްދެވި ގޮތާ ގުޅޭ ގޮތުން ނިހާން ދެއްކެވި ވާހަކަތަކަށް ރައްދު ދެއްވައި އެމްޑީޕީ ޕާލަމެންޓްރީ ގްރޫޕްގެ މެމްބަރު އިމްތިޔާޒު ފަހުމީ ވިދާޅުވީ ނިހާނަކީ އޭނާއާ އެކު މަޖިލީހަށް އިންތިހާބުވެވަޑައިގެންނެވި މެމްބަރެއް ކަމަށާއި މުސާރަ ވެސް ލިބިވަޑައިގަންނަވަނީ އެއް ވަރަކަށް ކަމަށެވެ.
އިންތި ކުރެއްވި ޓްވީޓެއްގައި ވިދާޅުވީ ފުލެޓް ގަތުމަށް ފައިސާ ހޯއްދަވައި، އެ ވަރުގެ މުއައްސަނދި ކަމަކަށް ނިހާން ދެއްވި ޖަވާބު ކަމަކުނުދާ ކަމަށެވެ.
Alhugandumennaa eh varakah musaara libenee adhi eh muhdhathehgai Majlis gai heydhakuree. Thivaruge mussandhi kameh libumugai thi javaabu kamaku nudhey! https://t.co/y8LO4ONqQw
— Imthiyaz Fahmy (@Imthiyazfahmy) April 5, 2018
އެމްޑީޕީ ޕާލަމެންޓްރީ ގްރޫޕްގެ ނާއިބު ލީޑަރު ރޮޒައިނާ އާދަމް ވަނީ ނިހާން މެމްބަރުކަމުގައި ހޭދަ ކުރެއްވި ނުވަ އަހަރުގެ ތެރޭގައި ލިބިވަޑައިގެންނެވި މުސާރަ، ނުކައި ނުބޮއި އެއްކުރެއްވީ ފްލެޓް ގަންނަންތޯވިދާޅުވެ، ސުވާލު އުފެއްދަވާފައެވެ. އަދި ރޮލެކްސް ގަޑި އާއި ބީއެމްޑަބްލިޔު ކާރު ފަދަ ތަކެތި ވެސް ލިބިވަޑައިގެންނެވީ ހަދިޔާގެ ގޮތުގައިތޯ ރޮޒައިނާ ވަނީ ސުވާލު ކުރައްވާފައެވެ. މާލޭގައި ނިހާން ކުއްޔަށް ހުންނަވަނީ ވެސް ހަދިޔާގެ ގޮތުގައިތޯ ވެސް ނިހާނާ ރޮޒައިނާ ވަނީ ސުވާލު ކުރައްވާފައެވެ.
"އެހެން މީހުންނަށް މިހެން ނުވަނީ ކީއްވެބާ؟،" ރޮޒައިނާ ނިހާނަށް ސުވާލު ކުރައްވާފައިވެއެވެ.
ނިހާންގެ ދޮށީ ފިރިހެން ދަރިކަލުން، އަލާންގެ 18 ވަނަ އުފަން ދުވަހުގެ ހަދިޔާއަކަށް މިދިޔަ އަހަރުގެ އޮކްޓޯބަރު މަހުގެ ތެރޭގައި އަގު ބޮޑު ކާރެއް ވެސް ނިހާން ހަދިޔާކުރެއްވި ކަމަށް އަޑުތައް ވަނީ ފެތުރިފައެވެ. ސޯޝަލް މީޑިއާގައި އަލާން އަގުބޮޑު ކާރެއްގައި އިންނަވާ މަންޒަރު ފެންނަ ފޮޓޯއެއް އާއްމުވެފައިވާއިރު، ދަރިފުޅުގެ އުފަންދުވަހުގެ ތަހުނިޔާ ވިދާޅުވުމަށް ނިހާނު ކުރެއްވި ޓްވީޓްގައި ކާރެއްގެ ތަޅުދަނޑިއެއް ފެނެއެވެ.
ފާޑުކިޔާ ފަރާތްތަކުން ބުނެފައި ވަނީ ނިހާން ފަދަ ބޭފުޅަކު ދިރިއުޅުއްވާ ފެންވަރަށް ބަލާއިރު ގޭގެ ކުއްޔާއި އެނޫން ވެސް ޚަރަދުތަކަށް މަހަކު 40،000 އަށް ވުރެ ގިނަ ރުފިޔާ ހޭދަވާނެ އެވެ. އެހެންކަމުން މަޖިލީހުގައި ހޭދަކުރެއްވި 9 އަހަރަށް މަދުވެގެން އެ ޚަރަދުތަކަށް އެކަނި ވެސް 4.3 މިލިއަން ރުފިޔާ ހޭދަވާ އިރު އަމިއްލަ ބޭނުންތަކަށް ރާއްޖެއިން ބޭރަށް ކުރައްވާ ދަތުރުތަކާ އެކު މި އަދަދަށް ވުރެ ބޮޑު ހޭދައެއް ކުރައްވަން ޖެހިވަޑައިގަންނަވާނެއެވެ. އެ ހިސާބުތަކަށް ބަލާއިރު ނުވަ އަހަރުގެ ތެރޭގައި އިތުރު ވިޔަފާރިއެއް ނުކުރައްވާ ނަމަ ހަތަރު މިލިއަނެއްހާ ރުފިޔާ ރައްކާކުރެއްވުމަކީ ވާނެ ކަމެއް ކަމަށް ނުބެލެވޭ ކަމަށް ފާޑުކިޔާ ފަރާތްތަކުން ދަނީ ބުނަމުންނެވެ. އެހެންކަމަށްވާ ނަމަށް އަގު ބޮޑު ކާރާއި ފްލެޓްތައް ބައްލަވައިގަންނަވަނީ ކިހިނެއްތޯ އެ ފަރާތްތަކުން ދަނީ ސުވާލު އުފައްދަމުންނެވެ.
ނިހާންގެ ދަރިކަލުންނަށް އަގުބޮޑު ފްލެޓެއް ބައްލަވައިގެންފައިވާ އިރު، ޕީޕީއެމްގެ ނައިބު ރައީސް އަބްދުއްރަހީމް އަބްދުﷲގެ ދެކަނބަލުން ވަނީ އެފްޑަބްލިއު ކޮންސްޓްރަކްޝަނުން މާލޭގައި އިމާރާތްކުރި "ރެހެންދި-6" އިން 9 މިލިއަން ރުފިޔާ އަށް ދެ ފްލެޓް ބަައްލަވައިގެންފައެވެ. އަދި ނިހާނު ވެސް 4.5 މިލިއަން ރުފިޔާ ހޭދަކުރައްވައިގެން ރެހެންދި ފްލެޓެއް ބައްލަވައިގެންނެވި ކަމަށް މީގެ ކުރިން އަޑުތައް ފެތުރިފައި ވެއެވެ. މި ވާހަކަތަކާ ގުޅިގެން ނިހާން ރާއްޖެއެމްވީއަށް މައުލޫމާތު ދެއްވަން ތަފާތު އެކިފަހަރު މަތިން ވަނީ ދެކޮޅު ހައްދަވާފައެވެ.
