އަލްމަރްހޫމް ޑރ. އަބްދުލްމަޖީދު އަބްދުލްބާރީގެ ހަނދާނުގައި ތައުބީންގެ ޖަލްސާއެއް ބާއްވައިފިއެވެ.
އިސްލާމީ މަރުކަޒުގެ ޖަލްސަކުރާ މާލަމުގައި ބޭއްވި ތައުބީންގެ ޖަލްސާ ފެށީ ހުކުރު ދުވަހުގެރޭ 10:00 ގައެވެ. އެ ޖަލްސާގައި ގިނަ އަދަދެއްގެ ދީނީ އިލްމުވެރިންނާއި، މިނިސްޓަރުކަން ކުރައްވާފައި ތިއްބެވި ބޭފުޅުންނާއި، މިނިވަން މުއައްސަސާތަކުގެ އިސްވެރިންނާއި، ޑރ. މަޖީދުގެ ދަރިވަރުންނާއި، އާންމު ރައްޔިތުން ވަނީ ބައިވެރިވެފައެވެ. އޭގެއިތުރުން ޑރ. މަޖީދުގެ އަނބިކަނބަލުންނާއި، ޑރ. މަޖީދުގެ ބައެއް ބޭފުޅުންގެ އިތުރުން އާއިލާގެ ބައެއް މެމްބަރުންވެސް ވަނީ ތައުބީންގެ ޖަލްސާގައި ބައިވެރިވެވަޑައިގެންފައެވެ.
ތައުބީންގެ ޖަލްސާގައި އަދާލަތު ޕާޓީގެ ނައިބް ރައީސް އަލީ ޒާހިރާއި، ކުރީގެ މިނިސްޓަރު މުޙައްމަދު އަސްލަމާއި، ރައްޔިތުންގެ މަޖިލީހުގެ މެމްބަރުންކަމަށްވާ އަނާރާ ނައީމާއި، އަބްދުﷲ ޝާހިދުގެ އިތުރުން މޫސާ ނިޒާރާއި، މުހައްމަދު ވަހީދު އިބްރާހިމް ވަނީ ވާހަކަދައްކަވާފައެވެ. ހުރިހާ ބޭފުޅުންގެ ވާހަކަފުޅުގައިވެސް ވަނީ އިސްލާމް ދީން ބުނެދެއްވައި، އިސްލާމް ދީނުގެ ފެތުރެއްވުމަށް ޑރ. މަޖީދު ކުރެއްވި ބުރަ މަސައްކަތްތައް ފާހަގަކޮށް ވާހަކަދައްކަވާފައެވެ.
އެގޮތުން ކީރިތި ޤުރުއާނާއި ބެހޭ މަރުކަޒުގައި ހުންނަވައި އަދި އޭގެ ފަހުން އިސްލާމިކް މިނިސްޓަރުކަމުގައި ހުންނަވައިގެންވެސް ޑރ. މަޖީދު ގިނަ މަސައްކަތްތަކެއް ކުރެއްވިކަން އެ ބޭފުޅުން ފާހަގަކުރެއްވިއެވެ. އަދި ޑރ. މަޖީދަކީ އަބަދުވެސް އަދުލުވެރި ދައުލަތެއް ޤާއިމްކުރެއްވުމަށް އިސްކަންދެއްވައި، އެކަން އެގޮތަށް ކުރެއްވުމަށް ބާރު އެޅުއްވި ބޭފުޅެއްކަން އެ ބޭފުޅުންގެ ވާހަކަތަކުގައި ފާހަގަކުރައްވާފައިވެއެވެ.
ޖަލްސާގައި ވާހަކަދައްކަވަމުން ކުރީގެ މިނިސްޓަރު މުޙައްމަދު އަސްލަމް ވިދާޅުވީ ކުރީގެ ސަރުކާރުގެ ސިޔާސަތުތައް ކަނޑައެޅުއްވުމުގައި ޑރ. މަޖީދު މުހިންމު ދައުރެއް އަދާކުރެއްވިކަމަށެވެ. އަދި ބައެއް މައުޟޫތަކުގައި ވަޒީރުންގެ މަޖިލީހުގައި ވަރަށް ބޮޑަށް މަޝްވަރާކުރެވުނު ކަމަށާއި، ނަމަވެސް އަބަދުވެސް އެފަދަ ބޮޑެތި ނިންމުންތައް ނިންމަވާފައިވަނީ ޑރ. މަޖީދު ދެއްވާ އިރުޝާދުގެ މަތިންކަމަށް އޭނާ ވިދާޅުވިއެވެ.
ތައުބީންގެ ޖަލްސާ ނިންމާލާފައިވަނީ ހާއްސަ ދުޢާއަކުންނެވެ. އިސްވެ ދުޢާ ލައިދެއްވީ ޑރ. މަޖީދުގެ ބޭފުޅެއްކަމަށްވާ އަހުމަދު ފިރާސްއެވެ.
ޖަލްސާގައި ވާހަކަދައްކަވަމުން ފިރާސް ވިދާޅުވީ އިލްމީ ދިރާސާތައް ހެއްދެވުމަށް ޑރ. މަޖީދު ހާއްސަ އިސްކަމެއްދެއްވި ކަމަށެވެ. އަދި އޭގެއިތުރުން ދީނީ ތައުލީމް ބުނެދެއްވައި، ދީނީ ތައުލީމް ފުޅާކުރުމަށްވެސް ޑރ. މަޖީދު ގިނަ މަސައްކަތްތަކެއް ކުރެއްވިކަމަށް ފިރާސް ވިދާޅުވިއެވެ.
ޑރ. މަޖީދު އަވަހާރަވީ ލަންކާ ހޮސްޕިޓަލުގައި ފަރުވާދެމުން ދަނިކޮށް މެއި 22 ވަނަ ދުވަހުއެވެ. މަޖީދަކީ ދީން ބުނެދެއްވައި، ދީނީ ތައުލީމު ފުޅާކުރުމަށް ގިނަ މަސައްކަތްތަކެއް ކުރެއްވި އިލްމްވެރިޔެކެވެ. އަދި މުޅި ޤައުމުގެ އިހްތިރާމާއިި ލޯބި ލިބިވަޑައިގެން ހުންނެވި ބޭފުޅެކެވެ. ގުރުއާނުގެ އިލްމު ފެތުރުއްވުމުގައި ބުރަ މަސައްކަތްތަކެއް ކުރެއްވި މަޖީދަކީ ރާއްޖޭގައި ތަފްސީރު އިލްމުން ޕީއެޗްޑީ ނެންގެވި ފުރަތަމަ ބޭފުޅާއެވެ.
