ބޮލީވުޑްގެ އެންމެ ނުފޫޒުގަދަ އަދި އެންމެ މޮޅު އެއް އެކްޓަރުކަމަށް ގިނަ ބަޔަކު ޤަބޫލުކުރާ ސަލްމާން ޚާނަށް ހަމަލާދީ، އޭނާއަށް އަނިޔާކުރާ މީހަކަށް ފައިސާގެ އިނާމެއް ދޭނެ ކަމަށް ހަރުކަށި ހިންދޫ ފިކުރުގެ ޖަމާޢަތަކުން ބުނެފިއެވެ.
ހިންދޫ ހީ އާގޭ ކިޔާ ޖަމާޢަތެއްގެ އާގަރާ ޔުނިޓުގެ ވެރިޔާ، ގޯވިންދު ޕަރާޝަރު މިފަދަ ހުށަހެޅުމެއް ހުށަހަޅާފައިވަނީ ސަލްމާން ޚާން ޕްރޮޑިއުސްކުރާ ފިލްމަކަށް ކިޔާފައިވާ ނަމާއިމެދު ހިތްހަމަނުޖެހިގެންނެވެ. މި އަހަރުގެ ފަހުކޮޅު ނެރުމަށް ހަމަޖެހިފައިވަނީ 'ލަވްރާތުރީ' އެވެ. މި ފިލްމަށް މި ނަން ކިޔަން ނިންމާފައިވަނީ ހިންދޫއިން ފާހަގަކުރާ ދީނީ މުނާސަބަތެއް ކަމަށްވާ ނަވްރާތުރީ އާއި ގުޅުވައިގެންނެވެ. ފިލްމު ނެރުމަށް ނިންމާފައިވަނީވެސް ނަވްރާތުރީގެ ބަންދުގައެވެ.
މި ފިލްމުގެ ލީޑު ރޯލުން ފެނިގެންދާނީ ސަލްމާން ޚާންގެ ކޮއްކޮ އަރްޕިތާ ޚާންގެ ފިރިމީހާ، އާޔުޝް ޝަރްމާއެވެ.
ގޯވިންދު ޕަރާޝަރު ބުނެފައިވަނީ ސަލްމާން ޚާނަށް ހަމަލާދީ، އޭނާއަށް އަނިޔާކުރާ މީހަކަށް ފަސް ލައްކަ ރުޕީޒް އަދި 'ލަވްރަތުރީ' ފިލްމުގެ ސެޓަށް ގެއްލުންދޭ މީހަކަށް ދެ ލައްކަ ރުޕީޒް ދޭނެ ކަމަށެވެ. އޭނާ ބުނެފައިވާ ގޮތުން ސަލްމާން ޕްރޮޑިއުސްކުރާ މި ފިލްމަށް ހިންދޫއިންގެ މުނާސަބަތަކާއި ގުޅުވައިގެން ނަން ކިއުމަށް ނިންމާފައިވަނީ ހިންދޫއިންނަސް ފުރައްސާރަ ކުރުމަށެވެ.
ގޯވިންދު ޕަރާޝަރު ސަލްމާންގެ މި ފިލްމު ދައްކާ ސިނަމާތަކަށްވެސް ގެއްލުންދޭނެ ކަމުގެ އިންޒާރު ދީފައެވެ.
މި މައްސަލަ އާއި ގުޅިގެން ހިންދޫ ހީ އާގޭގެ އެކްޓިވިސްޓުން ވަނީ އާގަރާގައި މުޒާހަރާކޮށް، ސަލްމާން ޚާންގެ ޕޯސްޓަރުތައް އަންދާފައެވެ.
