ކުލަގަދަ ހަފްލާއަކާއެކު "ކޮސްގިނަ މިސްޓޭކް" ޕްރިމިއަރ ކޮށްފި

ޝައި ޕްރޮޑަކަޝަން އާއި ސެޓާން ސްޓޫޑިއޯ ގުޅިގެން އުފައްދާފައިވާ ކޮމެޑީ ފިލްމް "ކޮސް ގިނަ މިސްޓޭކް" (ކޭޖީއެމް) ޕްރިމިއަރ ކޮށްފި އެވެ.

"ކޮސް ގިނަ މިސްޓޭކް" ވެގެންދާނީ މިއަހަރު އޮލިމްޕަހުގައި ރަހަތަފާތު ކޮށްލާ ފިލްމަކަށެވެ. ލޯބީގެ އިތުރުން ހިތްދަތި ކަމާއި، އިޖްތިމާޢީ ފިލްމްތަކަށް ފަހު ބެލުންތެރިން ހެއްވާލާ މާޖާ ފިލްމެއްގެ ގޮތުގައި ކޮސްގިނަ މިސްޓޭކް އޮލިމްޕަސް ސިނަމާއަށް އަންނަ އިރު، މި ފިލްމްގެ އިންތިޒާރުގައި ގިނަ ބެލުންތެރިން ތިބިކަން ފާހަގަކޮށްލެވެ އެވެ.

ދިވެހި ފިލްމީ ދުނިޔޭގައި ކޮމެޑީ ޖޯންރާގެ ފިލްމްތައް އުފެއްދުމުގެ އެންމެ ކާމިޔާބު ޕްރޮޑަކްޝަން ހައުސްގެ ގޮތުގައި ފާހަގަ ކޮށްލެވޭ ޝައި ޕްރޮޑަކްޝަންގެ ފިލްމްތަކުގެ ތެރޭގައި ހިމެނޭ ނޯޓީފޯޓީ އާއި ފޯޓީ ޕްލަސް ފަދަ ހިޓް ފިލްމްތަކަށް ފަހު މިފިލްމްވެސް ވެގެންދާނީ ބެލުންތެރިން ކޮސްކޮށްލާ ހެއްވާލާނެ ވަރުގެ ފިލްމަކަށް ކަމަށް ޝައި ޕްރޮޑަކްޝަންގެ ވެރިޔާ އަދި މި ފިލްމްގެ ޕޮރޮޑިއުސަރ އިސްމާއިލް ޝަފީޤު މީގެ ކުރިން ބުނެފައިވެ އެވެ.

ފިލްމް ޕްރިމިއަރ ކުރި ފަލްފާގައި ރާއްޖެ އެމްވީ އަށް ދެއްވި އިންޓަވިއުއެއްގައި ވާހަކަ ދައްކަމުން ފިލްމުގައި މުހިންމު ރޯލެއް ކުޅޭ ސީޒަން ބުނީ މި ފިލްމާ ދޭތެތެ ވަރަށް އުންމީދު ކުރެވޭ ކަމަށާއި ވަރަށް ދުވަސް ތަކަކަށް ފަހު މިިކަހަލަ ކޮމެޑީ ފިލްމެއް މި އަންނަނީ ވަރަށް ބޮޑު ކާސްޓެއްވެސް އޮވެގެން ކަމަށެވެ. އަދި މި ފިލްމުގައި ކެރެކްޓާތައް ޕާފޯމް ކުރަން ތިބި އެކްޓަރުންނަކީ ވަރަށް ކުޅަދާނަ އެކްޓަރުން ތަކެއް ކަން ފާހަގަ ކޮށް ސީޒަން ބުނީ ފިލްމުގެ ބައެއް ސީންތަކަކީ އެކްޓު ކުރަން ވަރަށް އުނދަގޫ ސީންތަކެއް ކަމަށާއި އެހެން ނަމަވެސް ފިޒިކަލީ އެ ކަންކަން ކޮށް އެސީންތައް ގެނެސްދީފައި ވާނެ ކަމަށެވެ.

ޔޫސުފް ޝަފީޢު (ޔޫއްޕެ)ގެ ވާހަކައަކަށް އުފައްދާ މި ފިލްމްގެ ޑައިރެކްޓަރަކީ މަޝްހޫރު އެކްޓަރ އަދި ޑައިރެކްޓަރ ޢަލީ ސީޒަން އެވެ. މިފިލްމް ޝޫޓް ކޮށްފައިވަނީ މިއަހަރު ކުރީކޮޅު މ. މުލަކުގަ އެވެ.

މީގެ އިތުރުން މިފިލްމް އުފައްދާ ސެޓާން ސްޓޫޑިއޯ އަކީ މިހާރު ރާއްޖޭގައި އެންމެ މަގުބޫލު ޕްރޮޑަކްޝަން ހައުސްގެ އިތުރުން، މިދިޔަ އަހަރުގެ އެންމެ ކާމިޔާބު ފިލްމް "ކަމަނާ" އާއި، މި އަހަރުގެ މިހާތަނަށް އެޅުވުނު އެންމެ ކާމިޔާބު ފިލްމް "ކަނބުލޮ" ފަދަ ފިލްމް އުފައްދާ، ބެލުންތެރިންގެ އިތުބާރު ހޯދާފައިވާ ޕްރޮޑަކްޝަން ހައުސްއެކެވެ. މި ދެ ސްޓޫޑިއޯ ގުޅިގެން މީގެ ކުރިން ވެސް ފިލްމްތަކެއް ވަނީ ބެލުންތެރިންނާ ހަމަޔަށް ގެނެސްދީފަ އެވެ.