ސިވިލް ސަރވިސް ކޮމިޝަންގެ މިދިޔަ އަހަރުގެ ހަރުމުދަލުގެ ސައްޙަކަން ކަށަވަރު ނުވާ ކަމަށް އެކޮމިޝަންގެ މިދިޔަ އަހަރުގެ މާލީ އޮޑިޓް ރިޕޯޓުން ހާމަވެއްޖެއެވެ.
އޮޑިޓަރ ޖެނެރަލް ހަސަން ޒިޔަތު ސޮއިކުރައްވައި ނެރުއްވާފައިވާ ސިވިލް ސަރވިސް ކޮމިޝަންގެ 2017 ވަނަ އަހަރުގެ މާލީ އޮޑިޓް ރިޕޯޓުގައި ބުނެފައި ވަނީ އެކޮމިޝަންގެ މާލީ ބަޔާންތަކުގެ އިތުރު މައުލޫމާތުގެ ތެރޭގައި ފަރުނީޗަރު، އަދި އިކުއިޕްމެންޓްގެ ގޮތުގައި ހިމަނާފައިވާ އަދަދާއި ކޮމިޝަނުން ލިޔެ ބަލަހައްޓަމުން ގެންދާ ހަރުމުދަލުގެ ރަޖިސްޓްރީން ފަރުނީޗަރު، މެޝިނަރީ އަދި އިކުއިޕްމަންޓުގެ ގޮތުގައި ދައްކާ އަދަދާ ދެމެދު ޖުމްލަ 10005230 (ދިހަ މިލިއަން ފަސް ހާސް ދުއިސައްތަ ތިރީސް ) ރުފިޔާގެ ފަރަގެއް ހުރިކަން ފާހަގަ ކުރެވިފައި ވާކަމަށެވެ.
އޮޑިޓް ރިޕޯޓުގައި ބުނެފައި ވަނީ ޗާޓްސް އޮފް އެކައުންޓްސްއާ އެއްގޮތަށް ވަކިވަކި ކޯޑްތައް އެނގޭ ގޮތަށް ހަރުމުދަލުގެ ރަޖިސްޓްރީ ބަލަހައްޓާފައި ނުވާތީ ވަކިވަކި ކޯޑްތަކުން އަންނަ ތަފާތު ދެނެގަނެވިފައި ނުވާކަން ވެސް ފާހަގަ ކުރެވިފައިވާ ކަމަށެވެ.
ފާހަގަ ކުރެވިފައިވާ ފަރަގު ދެނެގަތުމުގެ ގޮތުން ހަރުމުދަލުގެ ރަޖިސްޓްރީ، މާލީ ބަޔާންތައް އަޅާކިޔާފައި (ރިކޮންސައިލް ކުރެވިފައި) ނުވާކަން ފާހަގަ ކުރެވިފައިވާ ކަމަށާއި ނަތީޖާއެއްގެ ގޮތުން މިލްކިއްޔާތުގެ ބަޔާނުގައި ހަރުމުދަލުގެ ގޮތުގައި ކޮމިޝަނުން ހިމަނާފައިވާ އަދަދުގެ ސައްޙަކަން ކަށަވަރުކުރެވެން ނެތް ކަމަށް ވެސް އޮޑިޓް ރިޕޯޓުގައި ވަނީ ބުނެފައެވެ.
އިސްލާހް ކުރަން ދީފައިވާ ލަފާގެ ގޮތުގައި ބުނެފައި ވަނީ މަތީގައި ފާހަގަ ކުރެވިފައިވާ ފަރަގު އައިސްފައިވާ ސަބަބުތައް ދެނެގަތުމަށް ފަހު، ހިސާބުތަކަށް ގެންނަންޖެހޭ އިސްލާހްތައް ގެނައުމަށާއި މާލިއްޔަތުގެ ގަވާއިދުގައިވާ ގޮތަށް ދައުލަތުގެ ކެޕިޓަލް ބަޖެޓުން ޚަރަދުކޮށްގެންނާއި އެހީގެ ގޮތުގައި ލިބޭ ހަރުމުދާ އަދި އެނޫން ގޮތް ގޮތުން ދައުލަތަށް ލިބޭ މުދާ އަދި ކެޕިޓަލް ޚަރަދުގެ ގޮތުގައި ކުރެވޭ މަސައްކަތް ދައުލަތުގެ ހަރުމުދަލުގައި ހިމަނައިގެން ބެލެހެއްޓުމަށް ވެސް ވަނީ ލަފާ ދީފައެވެ.
މީގެ އިތުރުން ހަރުމުދަލުގެ ރަޖިސްޓްރީ ހިމަނާފައިވާ ހަރުމުދާތަކުގެ ތެރެއިން އަގު ހިމަނާފައިނުވާ ހަރުމުދާތައް އަގުކުރުމަށް ފަހު، އަގު ކުރެވުނު ގޮތާއި، އަގުހުރި ހަރުމުދަލުގެ ފުރިހަމަ ތަފްސީލް، މިނިސްޓްރީ އޮފް ފިނޭންސް ޓްރެޜަރީން ސެޕް ސިސްޓަމްގައި ބަލަހައްޓަމުން އަންނަ ހަރުމުދަލާއި ގުޅޭ މައުލޫމާތު ހަމަކުރުމަށްޓަކައި އެމިނިސްޓްރީއަށް ފޮނުވުމަށް ވެސް އޮޑިޓް ރިޕޯޓްގައި ލަފާދީފައި ވެއެވެ.