މާލެއަކީ މުޅި ރާއްޖޭގެ ރައްޔިތުން މުއްސަނދިކޮށްފައިވާ، ރާއްޖޭގެ ހުރިހާ ރައްޔިތުންގެ މިލްކެއް ކަމަށާއި މައްސަލަ ބޮޑުވެފައިވާ މާލޭގެ އެއްވެސް ކަމަކަށް ހައްލު ގެނެވޭނީ މުޅިރާއްޖެއަށް ހައްލު ގެނެވިގެން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ޖަޒީރާ ރައީސްގެ ކެމްޕެއިން ހަރަކާތް ނިންމުމުގެ ގޮތުން އެމްޑީޕީ ހަރުގޭގައި އަންގާރަ ދުވަހުގެރޭ ބޭއްވި ޖަލްސާގައި ވީޑިއޯ މެދުވެރިކޮށް ވާހަކަ ދައްކަވަމުން ރައީސް ނަޝީދު ވިދާޅުވީ ދެލައްކަ މީހުން ދިރިއުޅޭ މާލެއަށް ދުވާލަކު 10 ހާސް ޓަނު ފެނާއި 8 ލައްކައަށްވުރެ ގިނަ ޔުނިޓްގެ ކަރަންޓް ބޭނުންވާ ކަމަށާއި 500 ޓަނު ކުންޏާއި 200 ޓަނު ނަރުދަމާ ނަޖިސް ބޭރުކުރަން މިއަދު ޖެހިފައިވާކަމަށެވެ.
ސާޅީސް ފަސްހާސް ގޭގައި މީހުން ދިރިއުޅޭ މާލެ ކިތައްމެ ގޮތަކަށްވެސް ބަޔާން ކުރެވިދާނެކަމަށް ފާހަގަ ކުރައްވާ ރައީސް ނަޝީދު ވިދާޅުވީ މާލެއަކީ ޒަމާނުންސުރެ ރާއްޖޭގެ އެއް މަރުކަޒުގެ ގޮތުގައި އުފެދެމުން ހިނގަމުން އަންނަ، ޖަޒީރާ ރާއްޖޭގެ މެދުގައި އޮތް ޖަޒީރާ މާ ރަށެއް ކަމަށެވެ.
"މިރަށް ސުނޫބާދުވާނަމޭވެސް ވިދާޅުވެއްޖެ. މިރަށްމީ ޓޯކިޔޯއޭވެސް ސިންގަޕޫރޭވެސް ދުބާއީއޭވެސް، މިރަށްމީ އެތައް ތަނެކޭ ވިދާޅުވެއްޖެ. އެހެންނަމަވެސް ދަންނަވަންތޯ މިއީ އަޅުގަނޑުމެންގެ ޖަޒީރާ މާރަށެއް. މިއީ އަޅުގަނޑުމެންގެ މާލެ. މިއީ މުޅި ރާއްޖޭގެ ރައްޔިތުންގެ މިލްކެއް. އެތައް ޒަމާނެއް ވަންދެން ކިތައްމެ ރަށަކުން މިތަން މުއްސަނދިކޮށްފައި މިވަނީ. ކިތައްމެ އާއިލާއެއްގެ މަސައްކަތުން ކިތައްމެ ރައްޔިތެއްގެ ދަލާއި ލެއިން މިމާލެ ބިނާކޮށްފައި މިވަނީ" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިއަދު މިއީ ކާރޫބާރޫބޮޑު އަޑުގަދަ، ހާސްކަންބޮޑު ތޮއްޖެހިފައިވާ މާލެއެއް ކަމަށާއި މިއަދު މިއީ ދިރިއުޅުން ދަތިވާހިސާބަށް ގޮސްފައިވާ މާލެއެއް ކަމަށެވެ. މިދިޔަ ތިން އަހަރުގެ ތެރޭގައި 27 މީހުން މިރަށުގެ މަގުމައްޗަށް މަރާލާފައި އެއްލާލައިފި ކަމަށާއި އެއިން ގިނަ މަރުތަކުގެ ޙަޤީގަތް ނުހޯދޭ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިއީ މައްސަލަތައް ބޮޑުވެފައިވާ މާލެއެއް ކަމަށާއި އެކަމަކު މިރަށާމެދު އުއްމީދެއް ނުގެއްލޭކަމަށެވެ. އަދި އުއްމީދު ކަނޑައެއް ނުލައްވާނެ ކަމަށެވެ.
ރައީސް ނަޝީދު ވިދާޅުވީ މާލޭގެ މައްސަލަތައް ގުޅިފައި އޮތީ މުޅި ރާއްޖޭގެ މައްސަލަތަކާ ކަމަށާއި މާލޭގެ އެއްވެސް ކަމަކަށް ހައްލެއް ގެނެވޭނީ މުޅި ރާއްޖެއަށް ހައްލު ގެނެވިގެން ކަމަށެވެ. މާލެއަށް ދިމާވެފައިވާ އެންމެބޮޑު މައްސަލައަކީ ބޯހިޔާވަހިކަމުގެ ދަތިކަން ކަމަށާއި އެކަން ހައްލު ކުރެވޭނީ ރާއްޖެތެރެ އުވާ ނުލާގޮތައް ވިސްނައިގެން ކަމަށެވެ.
"ގުޅިފަޅާ ތިލަފުއްޓާ ހުޅުމާލެއާ އެކުވީމާ މިސަރަހައްދުގައި ގޯތި ދެވެން އެބަހުރި. އެއީ ރާއްޖެތެރެ އުވާނުލާގޮތައް އަޅުގަނޑުމެން ވިސްނީމަ. ޖަޒީރާ މާލޭގައި ދޭނީ ބިމެއް. ގެވަޅެއް. ދިރިއުޅުން ބިނާ ކުރެވޭނޭ ގޮތެއް ހޯދަދޭނަން" ރައީސް ނަޝީދު ވިދާޅުވިއެވެ.