ރައީސް މައުމޫންގެ ގާނޫނީ ވަކީލުން މައްސަލައިން ތަނާޒުލްވެއްޖެ
ދައުވާ އުފުލާފައި ވަނީ ތަހުގީގަށް ފޯނު ނުދިން ކަމަށް ބުނެ
ރައީސް މައުމޫން އަނބުރާ ދޫނީދޫއަށް ގެންދަނީ
ކުރީގެ ރައީސް މައުމޫން އަބްދުލްގައްޔޫމްގެ މައްޗަށް އުފުލާފައިވާ އަދުލު އިންސާފު ގާއިމުކުރަން ހުރަސް އެޅުމުގެ ދައުވާ އިން އެމަނިކުފާނުގެ ގާނޫނީ ވަކީލުން ތަނާޒުލްވެއްޖެއެވެ.
މި ދައުވާ ރައީސް މައުމޫންގެ މައްޗަށް އުފުލާފައި ވަނީ ކުއްލި ނުރައްކަލުގެ ހާލަތުގެ ދަށުން އެމަނިކުފާނު ހައްޔަރުކުރުމަށް ފަހު، ފުލުހުން ހިންގަމުންދިޔަ ތަހުގީގަށް ފޯނު ދޭން އެންގުމުން އެކަމަށް އިންކާރު ކުރެއްވި ކަމަށް ބުނެއެވެ. މި މައްސަލައިގައި ރައީސް މައުމޫންގެ އިތުރުން އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދުގެ މައްޗަށް ވެސް ވަނީ ދައުވާ އުފުލާފައެވެ. މި ތިން ބޭފުޅުންގެ ޝަރީއަތް ވެސް ކްރިމިނަލް ކޯޓުގައި ކުރިޔަށް ދަނީ އެއްކޮށެވެ.
ރައީސް މައުމޫންގެ ގާނޫނީ ވަކީލުން ވަނީ މި މައްސަލައިން ތަނާޒުލްވި ހަތް ނުކުތާއެއް ފާހަގަކޮށް ބަޔާނެއް ނެރުއްވާފައެވެ.
އެގޮތުން މި މައްސަލަ ކްރިމިނަލް ކޯޓުގައި ހިނގަމުން ދަނިކޮށް މައްސަލަ ބައްލަވާ ގާޒީ ބަދަލުކޮށްފައި ވަނީ ޖިނާއީ އިޖުރާއަތުގެ ގާނޫނުގެ 152 މާއްދާގައި މައްސަލަ ބައްލަވާ ފަނޑިޔާރު ބަދަލުކުރެވިދާނެ ކަމަށް ބަޔާންކުރާ ހާލަތްތަކުގެ ބޭރުން ނިންމާފައިވާ ނިންމުމެއް ކަމަށް ފާހަގަކުރައްވާފައިވެއެވެ. ހަމައެހެންމެ ރައީސް މައުމޫންގެ ސިއްހީ ހާލުކޮޅު ގޯސްވުމުގެ ސަބަބުން އެކަން ޝަރީއަތުގެ މަޖިލީހުގެ ސަމާލުކަމަށް ގެނައުމުންނާއި ޝަރީއަތް ފަސްކުރަން އެދުމުން ވެސް އެ ހުށަހެޅުން ބަލައިގެންފައިނުވާކަން ފާހަގަކުރައްވާފައިވެއެވެ.
މީގެ އިތުރުން ރައީސް މައުމޫންގެ ގާނޫނީ ވަކީލުންގެ ގޮތުގައި އެކަށީގެންވާ ގޮތުގައި ޝަރީއަތުގެ މަޖިލީހުގައި އެމަނިކުފާނު ތަމްސީލުކުރެވިފައިނުވަނީ، ގާނޫނީ ތަރަހައިގެ ބޭރުން ކްރިމިނަލް ކޯޓުން ނިންމަވާފައިވާ ނިންމެވުމުގެ ސަބަބުން ކަމަށް ވެސް ފާހާގަކޮށްފައިވެއެވެ. ރައީސް މައުމޫންގެ ފަރާތުން ތަފާތު 12 ހުށަހެޅުމެއް ޝަރީއަތުގެ މަޖިލީހަށް ހުށަހެޅި ނަމަވެސް ތިން މިނެޓުގެ ވަގުތުކޮޅަކަށް ޝަރީއަތުގެ މަޖިލިސް މެދުކަނޑުއްވާލެއްވުމަށް ފަހު، އެ 12 ހުށަހެޅުމާ ގުޅޭ ގޮތުން ގޮތެއް ނިންމެވުމުން ފަނޑިޔާރުންގެ ގާނޫނުގައި ކަނޑައަޅާފައިވާ އުސޫލުތަކާ ހިލާފަށް އެކަށީގެންވާ މިންވަރަށް ވަޒަންކުރެއްވުމެއް ނެތި ނިންމެވި ނިންމެވުންތަކެއް ކަން ސާފުވެފައިވާ ކަމަށް ވެސް ރައީސް މައުމޫންގެ ވަކީލުން ފާހަގަކުރައްވާފައިވެއެވެ.
މި މައްސަލައިގެ ޝަރީއަތްތައް ކުރިއަށް ގެންދަނީ، ރައީސް މައުމޫނަށް ޤާނޫނުއަސާސީގެ 42 ވަނަ މާއްދާއާއި 51 ވަނަ މާއްދާ އިން ލިބިދޭ ޢަދުލުވެރިކަމާ އެކު ޝަރީޢަތްކުރެވުމުގެ ޙައްޤާއި، ކުށުން ބަރީއަވުމަށްޓަކައި އެކަށީގެންވާ ވަސީލަތްތައް ލިބުމުގެ ޙައްޤުން ރައީސް މައުމޫން މަހުރޫމްކޮށްގެން ކަމަށް ވެސް މި ބަޔާނުގައިވެއެވެ. ޝަރީއަތުގެ މަރުހަލާ ފަށަން ޖެހޭނީ 30 ދުވަހުގެ މުއްދަތެއްގެ ފަހުން ކަމަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވީ ނަމަވެސް މި މައްސަލައިގައި ޝަރީއަތް ފަށާފައި ވަނީ އެ މުއްދަތު ނުދީ ކަނޑައެޅިގެން ގާނޫނާ ހިލާފަށް ކަމަށް ވެސް ރައީސް މައުމޫންގެ ގާނޫނީ ވަކީލުން ފާހަގަކުރައްވާފައިވެއެވެ. މީގެ އިތުރުން ގާނޫނު އަސާސީގެ 223 ވަނަ މާއްދާގެ ދަށުން ޕްރޮސެކިއުޓަރ ޖެނެރަލްގެ މައްޗަށް މަތިކޮށްފައިވާ ޒިންމާ އަދާކުރެއްވުމުގައި ޕްރޮސެކިއުޓަރ ޖެނެރަލް އިހުމާލުވެފައި ވުމަކީ ވެސް މި މައްސަލައިން ތަނާޒުލްވި ސަބަބެއް ކަމަށް އެބަޔާނުގައިވެއެވެ.
ރައީސް މައުމޫންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ތިން ބޭފުޅުން ވެސް މައްސަލައިން ތަނާޒުލްވެވަޑައިގެންފައިވާއިރު އެމަނިކުފާނު ވަނީ އަންގާރަ ދުވަހުގެ ތާވަލުކޮށްފައިވާ މި މައްސަލައިގެ އަޑުއެހުމަށް ވެސް ހާޒިރުކޮށްފައެވެ.
