ރައީސް ޔާމީން އެއްވެސް ބޭފުޅަކާ އެކު ރިޔާސީ އިންތިޚާބުގައި ވާދަކުރައްވަން ބޭނުންފުޅެއް ނުވޭ: ރޮޒެއިނާ
29 މެއި 2018 | އަންގާރަ 11:12ރިޔާސީ އިންތިޚާބުގައި ރައީސް ނަޝީދާ އެކު ވާދަކުރައްވަން ރައީސް ޔާމިން ޖެހެލުންވެވަޑައިގަންނަވާ
އައްޑޫ މީދޫ ދާއިރާގެ މެމްބަރު ރޮޒައިނާ...
ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމް އެއްވެސް ބޭފުޅަކާ އެކު ރިޔާސީ އިންތިޚާބުގައި ވާދަ ކުރައްވަން ބޭނުންފުޅު ނުވާ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ލ. ގަމުގައި ބޭއްވި ޖަޒީރާ ރައީސްގެ ކެންޕެއިންގެ ޖަލްސާގައި ވާހަކަ ދައްކަވަމުން މެންބަރު ރޮޒެއިނާ ވިދާޅުވީ ރިޔާސީ އިންތިޚާބުގައި ރައީސް ނަޝީދާ އެކު ވާދަކުރައްވަން ރައީސް ޔާމިން ޖެހިލުންވެވަޑައިގަންނަވާ ކަމަށާއި، އެއްވެސް މީހަކާ އެކު އެމަނިކުފާނު ވާދަކުރައްވަން ބޭނުން ނުވާ ކަމަށެވެ.
ކުރީގެ ރައީސް މުހައްމަދު ނަޝީދު ބައިވެރިކޮށްގެން އެމްޑީޕީގެ ރިޔާސީ ޕްރައިމަރީ ބާއްވައިފި ނަމަ އެޕާޓީ އުވާލާނެ ކަމުގެ އިންޒާރު ދީފައިވާތީ އެކަމަށް އިޝާރާތް ކުރައްވާ ރޮޒެއިނާ ވިދާޅުވީ މިހާރު މިފެންނަ މަންޒަރުތަކުން ވެސް އިލެކްޝަން ކޮމިޝަނުން ބާއްވާ ރިޔާސީ އިންތިޚާބު މިނިވަންނުވާނެ ކަމަށެވެ.
މީގެ އިތުރަށް މެންބަރު ރޮޒެއިނާ ވިދާޅުވީ ޖަޒީރާ ގައުމެއްގެ ރައްޔިތުން ދެކެ ލޯބިވާ ވެރިންނަކީ ރައްޔިތުންގެ ހާލުއަހުވާލު ކޮންމެ ތާކު ހުރެގެން ބަލައި އޮޅުންފިލުވާ ވެރިން ކަމަށެވެ. މިހާރު ކުރިއަށް ގެންދާ ޖަޒީރާ ކެންޕޭނުން ވެސް ރައީސް ނަޝީދަކީ ރައްޔިތުން ދެކެ ލޯބިވާ ވެރިއެއްކަން ހާމަވާނެ ކަމަށް އޭނަ ވިދާޅުވިއެވެ.
އެމްޑީޕީގެ ޕްރައިމެރީގައި ވާދަކުރައްވަނީ ރައީސް ނަޝީދު އެކަނި ކަމަށް ބުނެ ރައީސް ޔާމިން ފެކްޝަންގެ ބޭފުޅުން ދައްކަވާ ވާހަކަތަކަށް ރައްދުދެއްވަމުން ރޮޒެއިނާ ވިދާޅުވީ ޕީޕީއެމް އިން ޕްރައިމެރީއަކަށް ދިއުމަށް ހުޅުވާލަން ވެސް ނުކުރެނު ކަމަށެވެ.
" ޕީޕީއެމްގެ އަސާސީ ގަވާއިދާ ހިލާފަށް އެބޭފުޅުން މަސައްކަތް ކުރައްވަމުން ގެންދަވަނީ. ޕީޕީއެމްގެ އަސާސީ ގަވާއިދުގެ އެއް މައްދާގައި މިއޮންނަނީ މުޝްތަޝާރަކަށް ހުންނެވި ބޭފުޅާ ނުވަތަ ރައީސްއަކަށް ހުންނެވި ބޭފުޅާއަށް ޕްރައިމަރީއަކާ ނުލައި ޓިކެޓް ދެވިދާނެއެވެ. ޓިކެޓްދޭށެކޭ ނޯންނާނެ. ހަމައެއާ ޖެހިގެން ދެވަނައަށް އޮންނަ މާއްދާގައި މިބުނަނީ ޓިކެޓް މިހެން ދެވެނީ އެހެން މީހަކު ކުރިމަތިލާން ބޭނުން ނުވާ ކަމަށް ވަންޏާ. އެހެން މީހަކު ކުރިމަތިލާން ބޭނުންވާ ކަމަށް ވަންޏާ ޕްރައިމެރީއެއް ބާއްވަންޖެހޭނެ ކަމަށް ޕީޕީއެމްގެ އަސާސީ ގަވާއިދުގައި އެބައޮވޭ. އެހެން އޮއްވާ ވެސް އެފަދަ ފުރުސަތަކަށް ހުޅުވާނުލައި ރައީސް ޔާމީނަކީ ކެންޑިޑޭޓް ކަމަށް ނިންމަވައިފި،" ރޮޒެއިނާ ވިދާޅުވިއެވެ.
އައްޑޫ މީދޫ ދާއިރާގެ މެމްބަރު ރޮޒައިނާ ވިދާޅުވީ މިއަހަރުގެ ރިޔާސީ އިންތިޚާބުގައި ރައީސް ނަޝީދަށް ވާދަކުރެއްވޭނެ ކަމަށާއި، އެމަނިކުފާނު ޝަރުތު ހަމަވާ ކަމަށެވެ. އަދި ސްޕްރީމް ކޯޓުން ނެރުނު އަމުރުން ވެސް ރައީސް ނަޝީދަކީ ކުށްވެރިއެއް ނޫން ކަން ހާމަވާ ކަމަށް އޭނާ ވިދާޅުވިއެވެ.
