ކުރީގެ ރައީސް މައުމޫން ޢަބްދުލްޤައްޔޫމްގެ ޕާރސަނަލް ސެކިއުރިޓީ ޓީމުގައި ހަރަކާތްތެރިވާ މުހައްމަދު އަޒުމީ އާއި އެމަނިކުފާނުގެ އޮފީހުގައި މަސައްކަތްކުރާ ނަޖުމާ އިބްރާހިމްގެ މައްޗަށް ދައުލަތުން ދައުވާކޮށްފައިވާ ޝަރީއަތުގެ އަޑުއެހުން ކެންސަލް ކޮށްފި އެވެ.
އަންގާރަ ދުވަހުގެ 11:00 އަށް ކްރިމިނަލް ކޯޓިގައި ބޭއްވުމަށް ތާވަލް ކުރި އިބްތިދާއީ އެ އަޑުއެހުން ކެންސަލް ކުރީ ނަޖުމާގެ ދަރިފުޅު ބަލިކަމުން އަންގާރަ ދުވަހުގެ އަޑުއެހުން ކެންސަލް ކޮށްދިނުމަށް ކޯޓަށް ސިޓީއަކުން އެދިފައިވާތީ ކަމަށް ކްރިމިނަލް ކޯޓުން ވަނީ މައުލޫމާތު ދީފައެވެ.
ނަޖުމާއާއި އަޒުމީގެ މައްޗަށް ދައުލަތުން ކޮށްފައިވަނީ އަދުލްއިންސާފު ގާއިމު ކުރުމަށް ހުރަސް އެޅުމުގެ ކުށުގެ ދައުވާ އެވެ. މިދައުވާ ކޮށްފައިވަނީ މިދިއަ އޭޕްރީލް މަހުގެ 18 ވަނަ ދުވަހު އެވެ. އެނގިފައިވާ ގޮތުގައި މިހާތަނަށް މިދައުވާގެ އަޑުއެހުމެއް ބޭއްވިފައެއް ނުވެއެވެ.
ނަޖުމާއާއި އަޒުމީ ހައްޔަރު ކޮށްފައި ވަނީ ސަރުކާރު ވައްޓާލުމަށް ކުރީގެ ރައީސް މައުމޫނާއި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދު އަދި ސިޔާސީ ބައެއް ފަރާތްތައް ހައްޔަރުކޮށްފައިވާ މައްސަލައިގައި އެ މައްސަލައާއި ގުޅުން އޮތް ކަމަށް ތުހުމަތު ކޮށެވެ.
އެގޮތުން އެ ބޭފުޅުންގެ މައްޗަށް ކޮށްފައިވާ ޓެރަރިޒަމް ދައުވާތަކާއި ގުޅޭ ގޮތުން ދައުލަތުން ހުށަހެޅި އެންމެ ބޮޑު އެއް ހެކި ކަމަށްވާ "ކަޅު ފޮށި" ފެނިފައިވަނީ ނަޖުމާ ދިރިއުޅޭ ގެއިން ކަމަށް ބުނެފައި ވެއެވެ.
އަޒްމީ އާއި ނަޖްމާ ހައްޔަރު ކޮށްގެން ގެންގުޅޭތީ ރައީސް މައުމޫނުގެ އޮފީހުން ކުރިން ނެރުނު ބަޔާނެއްގައި ބުނެފައިވަނީ އެ ދެމީހުން ހައްޔަރު ކޮށްގެން އުޅެނީ ޙަޤީޤަތާއި ކަނޑައެޅިގެން ޚިލާފް ތުހުމަތު ތަކެއްގައި ކަމަށެވެ.