ޖުމްހޫރީ ޕާޓީގެ ތިންވަނަ ކޮންގްރެސް ޖޫން މަހުގެ 28، 29 ގައި ބާއްވަން ނިންމައިފިއެވެ.

މ. ކުނޫޒުގައި ބޭއްވި ނޫސްވެރިންގެ ބައްދަލުވުމުގައި ޖުމްހޫރީ ޕާޓީގެ ސެކްރެޓަރީ ޖެނަރަލް އަހްމަދު ސަމީރު ވިދާޅުވީ ކޮންގްރެސް ބާއްވަން ނިންމާފައިވަނީ ޕެރެޑައިސް އައިލެންޑް ރިސޯޓުގައި ކަމަށެވެ.

ސަމީރު ވިދާޅުވީ ޖުމްހޫރީ ޕާޓީގެ ގައުމީ ކޮންގްރެސް ބޭއްވުމަށްޓަކައި ސަރުކާރުގެ ބެލުމުގެ ދަށުގައި ހުރި އިމާރާތްތައް ހޯދުމަށް އެދިފައިވާނެކަމަށާއި އެހެން ނަމަވެސް ނުލިބޭނެ ކަމަށް ހައުސިން މިނިސްޓްރީން ބުނެފައިވާކަމަށެވެ.

"އެގޮތުން 5 މާޗް 2018 ވަނަ ދުވަހު ހައުސިން މިނިސްޓަރަށް އަޅުގަނޑުމެން ސިޓީއަކުން ދެންނެވިން. އަދި އެޕްރީލް 27،28 އަށް ލިބޭތޯވެސް ދެންނެވިން. 24 ވަނަ ދުވަހުން ފެށިގެން 30 ވަނަ ދުވަހަށް ދަރުބާރުގެ ހަމަޖެހޭތޯ އެދުމުން ހައުސިން މިނިސްޓްރީ ބޭފުޅަކު ގުޅުއްވާފަ ވިދާޅުވީ ހަމަ ނުޖެހޭނެ ކަމަށް. އެހެން ނަމަވެސް ލިޔުމުން އެންގުމަށް އަޅުގަނޑުމެން އެދުނީ. ދެން އަޅުގަނޑުމެން އެދުނީ ސަރުކާރުގެ ސްކޫލްތަކުން ޖާގަ ލިބޭތޯ. އެހެން ނަމަވެސް އެކަން އަޅުގަނޑުމެންނަކަށް ނުވި،" ސަމީރު ވިދާޅުވިއެވެ.

ސަމީރު ވިދާޅުވީ ސިޔާސީ ޕާޓީތަކަށް އިލެކްޝަންސް ކަމިޝަނުން ދޭންޖެހޭ ފައިސާ ނުދީ އޮތުމުގެ ސަބަބުން ކޮންގްރެސް ބޭއްވުމަށް ދަތިތަކާއި ކުރިމަތި ވެފައިވާކަމަށެވެ.

ކޮންގްރެސް ބާއްވާއިރު ޖުމްހޫރީ ޕާޓީގެ ދިދަ އާއި ލޯގޯ ނެތުމުގެ ފަޅުކަން ދިމާވާނެކަމަށް އޭނާ ވިދާޅުވި އެވެ. 

މިދިޔަ އަހަރު ހޯމް މިނިސްޓްރީން އާންމުކޮށްފައިވާ، ދިވެހިރާއްޖޭގެ ޤައުމީ ދިދަ ބޭނުންކުރުމުގެ އުސޫލާ ހަވާލާދީ، ރައީސުލްޖުމްހޫރިއްޔާއަށް ޚާއްސަ ދިދަ އާއި ޖޭޕީގެ ލޯގޯ ވައްތަރުކަމަށް ޤަބޫލު ކުރެވޭ ކަމަށް ބުނެ،  2017 ވަނަ އަހަރުގެ ޖޫން މަހުގެ 1 ވަނަ ދުވަހުގެ ކުރިން އެ ޕާޓީގެ ލޯގޯ އާއި ދިދަ ބަދަލުކުރުމަށް އިލެކްޝަންސް ކޮމިޝަނުން ޖޭޕީއަށް ވަނީ އަންގައިފަ އެވެ. ޖުމްހޫރީ ޕާޓީގެ ދިދަ އާއި ލޯގޯ ބޭނުން ކުރުން އިލެކްޝަންސް ކޮމިޝަނުން މަނާކުރުމުން ޖުމްހޫރީ ޕާޓީން ސިވިލް ކޯޓަށް ހުށަހެޅި މައްސަލައަށް އަދިވެސް އެ ކޯޓުން ގޮތެއް ނިންމާފައެއް ނުވެއެވެ.