އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ކުރީގެ ރައީސް މުޙައްމަދު ނަޝީދު، "ޖަޒީރާ ރައީސް"ގެ ނަމުގައި ކުރިއަށްގެންދަވާ ކެމްޕެއިނަކީ މިއަދު ސިޔާސީ ގޮތުން އަނިޔާދިނުމުން، ރައްޔިތުންނާއި ދުރަށް އަރުވާލެއްވިގެން ހުންނަވަން ޖެހިވަޑައިގަތަސް، ރައްޔިތުންނާއި ހަމައަށް ވަޑައިގަތުން ނުހުއްޓުވޭނެ ކަމުގެ ހެއްކެއް ކަމަށް އެމްޑީޕީގެ އުތުރު ޕްރޮވިންސްގެ ނައިބުރައީސް މޫސާ ނައީމް ވިދާޅުވެއްޖެއެވެ.

ސްކައިޕް މެދުވެރިކޮށް ރައީސް ނަޝީދު އަރިއަތޮޅު އުތުރުބުރީގެ ރައްޔިތުންނާއި ބައްދަލުކުރެއްވުމަށްޓަކާ، "ޖަޒީރާ ރައީސް" ކެމްޕެއިން ޓީމުން އެ އަތޮޅުގެ 8 ރަށަށް ކުރި ދަތުރު ނިންމާލުމަށްފަހު އަންގާރަ ދުވަހު މާލެ ވަޑައިގެން، އެ ދަތުރުގައި އެންމެ އިސްކޮށް ހުންނެވި ނައީމް ވިދާޅުވީ، މި ކެމްޕެއިންއިން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރަށް ދައްކައިދިނީ ދުނިޔޭގެ ޓެކްނޮލޮޖީ މިއަދު ކުރިއަރާފައި އޮތް މިންވަރުން، ސިޔާސީ ހަރަކާތް ނުހުއްޓުވޭނެކަން ކަމަށެވެ.

މި ދަތުރުގައި ކެމްޕެއިން ޓީމުން އެންމެ ފުރަތަމަ ދަތުރު ކޮށްފައިވަނީ އަރިއަތޮޅު އުތުރުބުރީ ހިމަންދޫއަށެވެ. ހިމަންދޫ ސްކައިޕް ބައްދަލުވުމަށް ފަހު ކެމްޕެއިން ޓީމް ދެން ދަތުރުކޮށްފައިވަނީ އެ އަތޮޅު މާޅޮހާއި ފެރިދޫ އަދި ބޮޑުފޮޅުދޫއަށެވެ. މި ތިން ރަށުގައި ތިބި އެމްޑީޕީގެ ރައްޔިތުންނާއިވެސް ރައީސް ނަޝީދު ވަނީ ސްކައިޕް މެދުވެރިކުރައްވާ ވާހަކަފުޅު ދައްކަވާފައެވެ.

ދަތުރުގެ ފުރަތަމަ ދުވަހުގެ ފަހު މަންޒިލެއްގެ ގޮތުގައި އއ. އުކުޅަހަށް ޖަޒީރާ ރައީސް ކެމްޕެއިން ޓީމް ދަތުރުކުރިއިރު، އެރޭ އެ ރަށުގައި ވަނީ ކެމްޕެއިން ޖަލްސާއެއް ބާއްވާފައެވެ. އެ މި ޖަލްސާގައި ރައީސް ނަޝީދުގެ އިތުރުން، ރައްޔިތުންގެ މަޖިލީހުގެ ކުރީގެ ރައީސް، އަދި މިހާރު އެ މަޖިލީހުގެ ހެންވޭރު އުތުރު ދާއިރާގެ މެންބަރު ޢަބްދުﷲ ޝާހިދު ވަނީ ވާހަކަފުޅު ދައްކަވާފައެވެ. މީގެ އިތުރުންވެސް މި ޖަލްސާގައި އެމްޑީޕީގެ ބައެއް އިސް ބޭފުޅުންނާއި އަރިއަތޮޅު އުތުރުބުރިއަށް ނިސްބަތްވާ ޒުވާން އެކްޓިވިސްޓުން ވަނީ ވާހަކަފުޅު ދައްކަވާފައެވެ.

މި ދަތުރުގައި އުކުޅަހުގައި ޖަލްސާއެއް ބޭއްވިއިރު، ރައީސް ނަޝީދު މީގެ ކުރިން ވަނީ ސްކައިޕް މެދުވެރިކުރައްވާ އުކުޅަހުގެ ރައްޔިތުންނާއިވެސް ބައްދަލު ކުރައްވާފައެވެ.

ދަތުރުގެ ދެވަނަ ދުވަހު ކެމްޕެއިން ޓީމުން އެންމެ ފުރަތަމަ ދަތުރުކޮށްފައިވަނީ އއ މަތިވެރިއަށެވެ. އެ ރަށުގައި ތިބި އެމްޑީޕީގެ މެންބަރުންނާއިއެކު ރައީސް ނަޝީދު ކުރިއަށްގެންދެވި ސްކައިޕް ބައްދަލުވުމަށް ފަހު، ދެން ކެމްޕެއިން ޓީމް ދަތުރުކޮށްފައިވަނީ އެ އަތޮޅު ރަސްދޫއަށެވެ. ރަސްދޫގައި ވެސް ރައީސް ނަޝީދު ވަނީ ސްކައިޕް މެދުވެރިކޮށް ބައްދަލު ކުރައްވާފައެވެ.

ދަތުރުގެ ފަހު މަންޒިލެއްގެ ގޮތުގައި ޖަޒީރާ ރައީސް ކެމްޕެއިން ޓީމުން ދަތުރުކޮށްފައިވަނީ އއ. ތޮއްޑޫއަށެވެ. އެ ރަށުގައި ވެސް ރައީސް ނަޝީދާއިއެކު ސްކައިޕް ބައްދަލުވުން ބާއްވާފައިވާއިރު، މި ދަތުރުގައި އެ ރަށުގައި ވަނީ ހަރުގެ ޖަލްސާއެއް ވެސް ބާއްވާފައެވެ.

އެމްޑީޕީގެ ރިޔާސީ ޕްރައިމަރީގެ ވޯޓުލުން ބުދަ ދުވަހު ކުރިއަށް ގެންދިއުމަށް ހަމަޖެހިފައިވާއިރު، އެމްޑީޕީން މަޢުލޫމާތު ދޭ ގޮތުގައި މި އިންތިޚާބުގައި އެމްޑީޕީގެ ކޮންމެ މެންބަރަކަށް ވެސް އެމީހަކާއި އެންމެ ގާތުގައި ހުރި ވޯޓު ފޮއްޓަކަށް ވޯޓު ލުމުގެ ފުރުޞަތު ވަނީ ހުޅުވާލާފައެވެ.