ދިވެހިރާއްޖޭގެ ރަޖިސްޓްރީ މިހާރު އޮތީ ޗައިނާގެ އެގްޒިމް ބޭންކްގައި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ލ.ގަމުގައި ބޭއްވި ޖަޒީރާ ރައީސްގެ ކެޕެއިންގެ ޖަލްސާގައި ސްކައިޕް މެދުވެރިކޮށް ރައްޔިތުންނާއި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ރާއްޖެ މިވަނީ ދަރަނީގެ ދަންތުރައެއްގައި ޖެހިފައި ކަމަށާއި ރާއްޖެ ވަރަށް ބޮޑަށް ދަރާފައިވާ ކަމަށެވެ. ތަރައްގީވަމުން އަންނަ ގިނަ ގައުމުތައް މިހާރު މިދަރަނީގެ ދަންތުރާގައި ޖެހެމުން އަންނަ ކަމަށް ވެސް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ މިދަރަނީގެ ދަންތުރައިން ސަލާމަތް ނުވެއްޖެ ނަމަ ގެއްލިގެން ދަނީ ރާއްޖޭގެ ބިންތައް ކަމަށެވެ.
ރައީސް ނަޝީދު ވިދާޅުވީ ޗައިނާގެ ކުންފުނިތަކުން ރާއްޖޭން ނަގާފައިވާ ހުރިހާ ކޮންޓްރެކްޓަރެއް އިންތިހާއަށް އަގުބޮޑުކޮށް ކަމަށާއި، 100 މިލިއަން ޑޮލަރަށް އެޅޭ ބްރިޖް އަޅަނީ 300 މިލިއަން ޑޮލަރަށް ކަމަށެވެ.
"އަޅުގަނޑު އެބަ ދަންނަވަން ރާއްޖެ ދަރާފައިވާ މިންވަރު، ދަރާފައިވާ ގޮތް. ޗައިނާގެ އެގްޒިމް ބޭންކްގައި އޮތީ ރާއްޖޭގެ ރަޖިސްޓްރީ. ފައިސާ ހޯދާ ގޮތަކީ މިއަދު އެއްލައްކަ ރުފިޔާ ބޭނުންވެގެން އުޅޭ މީހާ މިސާލަކަށް އޭނާ ރުފިޔާ ދޭމީހެއްގެ އަތުގައި ބައްވަނީ ގޯތީގެ ރަޖިސްޓްރީއާއެކު އަދި އެއްމިލިއަން ޑޮލަރުގެ ޑޭޑެޓް ޗެކެއް. އަތައް ލިބެނީ އެއްލަކަ ރުފިޔާ އަބުރާ ދައްކަން ޖެހެނީ އެއްމިލިއަން ރުފިޔާ. ނުދެއްކުނީމަ ގެއްލިގެން ދަނީ ގޯތީގެ ރަޖިސްޓްރީއާ އެކު ގޯތި. އެއްލައްކަ ރުފިޔާގެ ވިޔަފާރިއަކުން އެއްމިލިއަން ރުފިޔާގެ ދަރަންޏެއް އަބުރާ ދެއްކޭނެ ހަމަ އެއްވެސް ގޮތެއް މިދުނިޔޭގައި ނުވޭ" ރައީސް ނަޝީދު ވިދާޅުވި އެވެ.
ރާއްޖޭގެ އިގްތިސާދީ ދުވެލި މަޑުޖެހިފައިވާކަން ފާހަގަކުރައްވައި ރައީސް ނަޝީދު ވިދާޅުވީ ތަކެތީގެ އަގު އިންތިހާއަށް އުފުލެމުންދާ ކަމަށާއި، ރައްޔިތުންގެ އާމްދަނީ އިތުރުވަމުން ނުދާ ކަމަށެވެ. އެގޮތުން މަސްވެރިންނަށް ލިބޭ އާމްދަނީ އިންތިހާއަށް ކުޑަވެފައިވާ ކަމަށް ރައީސް ނަޝީދު ވިދާޅުވި އެވެ.
އެމަނިކުފާނު ވިދާޅުވީ ރައީސް ޔާމިންގެ ވެރިކަން ދިފާއު ކުރެއްވުމަށް ދެފަހަރެއްގެ މަތިން ކުއްލި ނުރައްކަލުގެ ހާލަތު އިއުލާނު ކުރުމުން އެކަމުގެ ހުރިހާ ގެއްލުމެއް ކުރީ ރައްޔިތުންނަށް ކަމަށެވެ. ފަތުރުވެރިން ރާއްޖެއަށް ޒިޔާރަތް ކުރާ އަދަދު މަދުވެ، ރިސޯޓު، ގެސްޓްހައުސް ވިޔާފާރިތަކަށް ހީނަރުކަން އައިސްފައިވާ ކަމަށް ވެސް ވިދާޅުވިއެވެ..
ރައީސް ޔާމިންގެ ވެރިކަމުގައި އިޖްތިމާއީ ހާލަތު ދަށަށް ގޮސްފައިވާ މިންވަރު ފާހަގަކުރައްވައި ރައީސް ނަޝީދު ވިދާޅުވީ މާލޭގެ މަގުމައްޗަށް މިދިޔަ ތިން އަހަރުގެ ތެރޭގައި 26 އަށް ވުރެ ގިނަ މީހުން މަރާލާ އެއްލާލާފައިވާ ކަމަށެވެ. މިއިން ގިނަ މަރުގެ ހަގީގަތް ނުހޯދޭ ކަމަށާއި، ތަހުގީގީ އިދާރާތަކާއި މިޖަރީމާތަކާއި ގުޅިފައިވާ މިންވަރު މިސަބަބާ ހުރެ ވެސް ޔަގީންވާ ކަމަށް އެމަނިކުފާނު ވިދާޅުވި އެވެ. ރައީސް ނަޝީދު ވިދާޅުވީ ރާއްޖެއާ މެދު ކަންބޮޑުވާ ގިނަކަންކަން އެބަހުރި ކަމަށާއި، 300 އަށް ވުރެ ގިނަ ދިވެހިން އެހެންގައުމުތަކުގެ ދާހިލީ ހަގުރާމައިގައި ވެސް ބައިވެރިވެފައިވާ ކަމަށެވެ. އަދި ޖިންސު ލަތީފުން ހަނގުރާމަ ވެރިންނަށް ޖާރިޔާއިންގެ ގޮތުގައި ވިއްކާފައިވާ ކަމަށެވެ.
މީގެ އިތުރަށް ރައީސް ނަޝީދު ވިދާޅުވީ މިއަހަރުގެ ރިޔާސީ އިންތިހާބުގައި ރައީސް ޔާމިން ބަލިކޮށް، ގައުމު ރަނގަޅު މިސްރާބަށް އަނބުރާނެ ކަމަށެވެ.
