އިންޓަކޮންޓިނެންޓަލް ބެލިސްޓިކް މިސައިލް (އައިސީބީއެމް) އިން ދިފާއުވުމަަށް އެމެރިކާ އިން ގާއިމު ކުރި ޑިފެންސް ނިޒާމު އެމެެރިކާ އިން ފުރަތަމަ ފަހަރަށް ކާމިޔާބު ކަމާ އެކު ޓެސްޓް ކޮށްފިއެވެ.
އެމެރިކާގެ މިސައިލް ޑިފެންސް އެޖެންސީ (އެންޑީއޭ) އިން ބުނީ ކެލިފޯނިއާގައި ހުންނަ ވައިގެ ބޭސް އިން, "ގްރައުންޑް ބޭސްޑް އިންޓާސެޕްޓާ" އެއް ނުވަތަ އައިސީބީއެމް އިން ދިފާއުވާ ނިޒާމެއް ލޯންޗްކޮށް، ކާމިޔާބުކަމާ އެކު "މޮކް ބެލިސްޓިކް މިސައިލެއް" ނުވަތަ އަސްލު ބެލިސްޓިކް މިސައިލެއް ގޮތައް އުފައްދާފައިވާ މިސައިލެއް ވައްޓާލާފައިވާ ކަމަށެވެ.
އެމެރިކާ އިން ކުރި ޓެސްޓާ ބެހޭ ގޮތުން އެމެރިކާގެ ޕެންޓަގަން އިން ބުނީ މިއީ ކުރިން ވެސް ކުރަން ރާވާފައިވާ ޓެސްޓެއް ކަމަށެވެ. އެމެރިކާ އިން ބެލިސްޓިކް މިސައިލުން ދިފާއުވާ ނިޒާމެއް ޓެސްޓް ކުރިއިރު އެމެރިކާ އާއި އުތުރު ކޮރެއާގެ ގުޅުން ވަނީ ވަރަށް ގޯސްވެފައެވެ. މިއަހަަރު ތެރޭ އުތުރު ކޮރެއާ އިން ވަނީ ނުވަ މިސައިލެއް ޓެސްޓް ކޮށްފައެވެ.
އެންޑީއޭގެ ޑައިރެކްޓާ، ވައިސް އެޑްމިރަލް ޖިމް ސިރިންގް ވިދާޅުވީ އެމެރިކާގެ ސަލާމަތަށްޓަކައި ޑިފެންސް ނިޒާމު ވަރަށް މުހިންމު ކަމަށާއި އަދި މިކަމުން ދައްކައިދެނީ އެމެރިކާ އަށް އަތުވެދާނެ ނުރައްކަލަކަށް އެމެރިކާ އޮތީ ތައްޔާރަށް ކަން ކަމަށެވެ.
އުތުރު ކޮރެއާއިން ނިއުކްލިއާ ހަތިޔާރު ތަރައްގީކޮށް އެކަމާ ގުޅޭ ތަފާތު ހަރަކާތް ހިންގުމުންދާއިރު ބައިނަލްއަގްވާމީ ގޮތުން އެގައުމަށް ނުހަނު ބޮޑެތި ފާޑުކިޔުންތައް އަމާޒުވެ، އަދި ނިއުކްލިއާ ހަނގުރާމައެއް ފެށިދާނެ ކަމުގެ ބިރު ވަނީ ހީވެފައެވެ.
