ސަރުކާރުން އިއުލާނުކޮށްފައިވާ ހިޔާ މަޝްރޫއުގެ ބައެއް ކެޓަގަރީތަކުގެ ޝަރުތުތަކަށް ސަރުކާރުން އަނެއްކާ ވެސް ބަދަލު ގެނެސްފިއެވެ.
މި މަހުގެ 6 ވަނަ ދުވަހު ފޯމް ދޫކުރަން ފެށި ފަހުން ހައުސިން މިނިސްޓްރީން މީގެ ކުރިން ވެސް ވަނީ ދެ ކެޓަގަރީގެ ޝަރުތުތަކަށް ބަދަލުތަކެއް ގެނެސްފައެވެ. އެގޮތުން މައުލޫމާތަށް ބަދަލު ގެނެސްފައި ވަނީ އަލަތު ކައިވެނި ކޮށްގެން އުޅޭ ޒުވާނުންނާއި 18 އާއި 40 އަހަރާއި ދެމެދުގެ ކައިވެނިކޮށްގެން އުޅޭ ފަރާތްތަކަށް ހާއްސަ 2 ކެޓެގަރީއަށެވެ. އޭރު ގެނައި އިސްލާހުގައި ބުނެފައި ވަނީ ފޯމު ހުށަހަޅާ ތާރީހާ ހަމައަށް މީލާދީ ގޮތުން އުމުރުން 18 އަހަރު ފުރި 30 އޭޕްރިލް 2018 އާ ހަމައަށް 41 އަހަރު ފުރިފައި ނުވުން ކަމަށެވެ. މީގެ ކުރިން މިދެ ކެޓަގަރީގައި ވެސް ބަޔާންކޮށްފައި ވަނީ 18 އާއި 40 އަހަރާއި ދެމެދުގެ ކައިވެނިކޮށްގެން އުޅޭ ފަރާތްތަކަށް ހާއްސަ ކެޓެގަރީގެ ދަށުން ދޫކުރާ 1 ކޮޓަރި ފުލެޓު އަދި އަލަތު ކައިވެނި ކޮށްގެން އުޅޭ ޒުވާނުންނަށް ހާއްސަ ކެޓެގަރީގެ މައުލޫމާތު ކަރުދާހުގެ ޝަރުތުތަކުގެ ތެރެއިން ފޯމު ހުށަހަޅާ ތާރީހާއި ހަމައަށް މީލާދީ ގޮތުން އުމުރުން 18 އަހަރުފުރި 41 އަހަރު ފުރިފައިނުވުމެވެ.
މިއަދު ގެނައި އިސްލާހުތަކުގައިވާ ގޮތުން ޑޮކްޓަރުންނާއި ނަރުހުންނަށް ހާއްސަ ކެޓަގަރީ އާއި ޓީޗަރުންނަށް ހާއްސަ ކެޓަގަރީގައި މީހަކާ ކައިވެނިކޮށްގެން އުޅެންޖެހޭ ކަމަށް ބުނާ ޝަރުތު ވަނީ އުނިކޮށްފައެވެ. މި ބަދަލާ ގުޅިގެން މި ދެ ކެޓެގަރީއަށް ފޯމު ހުށަހަޅާ ފަރާތްތަކަކީ ކައިވެނިކޮށްގެން އުޅޭ ފަރާތަކަށް ވުން ލާޒިމެއް ނޫނެވެ. އެހެން ނަމަވެސް، ފުލެޓު ލިބޭ ފަރާތްތަކުގެ ފައިނަލް ލިސްޓް ތައްޔާރުކުރުމާއި ފުލެޓު ހަވާލުކުރުމުގައި މި ދެ ކެޓެގަރީގެ ދަށުން ފޯމު ހުށަހަޅާ ފަރާތްތައް ތަރުތީބުކުރުމުގައި ކައިވެނިކޮށް ޢާއިލާއަކާ އެކު ދިރިއުޅޭ ފަރާތްތަކަށް އިސްކަންދެވިގެންދާނެއެވެ. އަދި މި ދެ ކެޓަގަރީގައި ކުރިން ކައިވެނީގެ ސެޓްފިކެޓް ހުށަހަޅަންޖެހޭ ގޮތަށް އޮތް ނަމަވެސް މިހާރު ގެނެސްފައިވާ އިސްލާހުގެ ދަށުން ހުށަހަޅާންޖެހެނީ ކައިވެނީގެ ސެޓްފިކެޓުގެ ކޮޕީ ނުވަތަ ވަރިވެފައިވާ ނަމަ ވަރީގެ ސެޓްފިކެޓުގެ ކޮޕީ އަދި އަނބި / ފިރިމީހާ ނިޔާވެފައިވާ ނަމަ ނިޔާވިކަމުގެ ލިޔުމެވެ.
ދެން އިސްލާހު ގެނެސްފައި ވަނީ 18 އާއި 40 އަހަރާއި ދެމެދުގެ ކައިވެނިކޮށްގެން އުޅޭ ފަރާތްތަކަށް ޚާއްޞަ ކެޓެގަރީ އާއި 18 އާއި 40 އަހަރާއި ދެމެދުގެ ކައިވެނިކޮށްގެން އުޅޭ ފަރާތްތަކަށް ޚާއްޞަ ކެޓެގަރީގެ ދަށުން ދޫކުރާ 1 ކޮޓަރި ފުލެޓު އަދި އަލަތު ކައިވެނި ކޮށްގެން އުޅޭ ޒުވާނުންނަށް ޚާއްޞަ ކެޓެގަރީ އަށެވެ. އެ ކެޓަގަރީތަކަށް ގެނައި އިސްލާހުގައި ވަނީ މާލެ، ހުޅުމާލެ ނުވަތަ ވިލިމާލޭގައި ދިރިއުޅޭ އަދި މާލެ، ހުޅުމާލެ ނުވަތަ ވިލިމާލޭގައި ފުލެޓަށް އެދޭމީހާ ނުވަތަ ފުލެޓަށް އެދޭމީހާގެ އަނބި/ފިރިމީހާ ވަޒީފާ އަދާކުރުން ނުވަތަ ފުލެޓަށް އެދޭ މީހާގެ އަނބި/ފިރިމީހާ ނުވަތަ، ދަރިން މާލެ، ހުޅުމާލެ ނުވަތަ ވިލިމާލޭގައި ދިރިއުޅެ، ފުލެޓަށް އެދޭމީހާ ކ. އަތޮޅު އެއްވެސް ރަށެއް ނުވަތަ ރިސޯޓެއްގައި ވަޒީފާ އަދާކުރުމެވެ. ކުރިން އޮންނަނީ މާލެ، ހުޅުމާލެ ނުވަތަ ވިލިމާލޭގައި ދިރިއުޅޭ އަދި މާލެ، ހުޅުމާލެ ނުވަތަ ވިލިމާލޭގައި ފުލެޓަށް އެދޭމީހާ ނުވަތަ ފުލެޓަށް އެދޭމީހާގެ އަނބި/ފިރިމީހާ ވަޒީފާ އަދާކުރަންޖެހޭނެ ކަމަށެވެ.
އަލަށް ގެނައި އިސްލާހުގައި ބުނެފައި ވަނީ ފުލެޓު ލިބޭ ފަރާތްތަކުގެ ފައިނަލް ލިސްޓް ތައްޔާރުކުރުމާއި ފުލެޓު ހަވާލުކުރުމުގައި މި 3 ކެޓެގަރީގެ ދަށުން ފޯމު ހުށަހަޅުއްވާ ފަރާތްތައް ތަރުތީބުކުރުމުގައި މާލެ/ހުޅުމާލެ/ވިލިމާލޭގައި ޢާއިލާއާ އެކު ދިރިއުޅޭ އަދި ވަޒީފާ އަދާކުރަމުންދާ ފަރާތްތަކަށް އިސްކަންދެވިގެންދާނެ ކަމަށެވެ.
މި ތިން ކެޓަގަރީ އަށް ގެނައި އަނެއް އިސްލާހުގައި ވަނީ ފުލެޓަށް އެދޭމީހާ ނުވަތަ އަނބިމީހާ/ފިރިމީހާ (ފުލެޓަށް އެދޭމީހާ ވަޒީފާ އަދާ ނުކުރާ ނަމަ) އަދާކުރި/އަދާކުރަމުންދާ ވަޒީފާ އަދާކުރާ ތަން، މަޤާމް، މުސާރަ އަދި މުއްދަތު ސާފުވާ ލިޔުމެއް (އޮފީހެއް ނުވަތަ ކުންފުންޏެއް ނުވަތަ އަމިއްލަ ފަރާތެއްގެ ދަށުގައި މަސައްތަކް ކުރާ ފަރާތެއްނަމަ އެފަރާތަކުން ދެވޭ ލިޔުމެއް. އަމިއްލަ މަސައްކަތް ކުރާ ފަރާތެއްނަމަ އާމްދަނީ ހޯދުމަށް ކުރާ މަސައްކަތް، މުސާރަ އަދި މުއްދަތު ސާފުވާ ގޮތަށް ފޯމު ހުށަހަޅާ ފަރާތުގެ ނަމުގައި ސިޓީއެއް) ހުށަހަޅަންޖެހޭނެ ކަމަށެވެ. ކުރިން އޮންނީ (ވަޒީފާ އަދާކުރި އަދި މިހާރު އަދާކުރަމުންދާ ތަން، މަޤާމް، މުސާރަ އަދި މުއްދަތު ސާފުވާ ލިޔުމެއް) ހުށަހަޅަންޖެހޭނެ ކަމަށެވެ.
މީގެ އިތުރުން 18 އާއި 40 އަހަރާއި ދެމެދުގެ ކައިވެނިކޮށްގެން އުޅޭ ފަރާތްތަކަށް ޚާއްޞަ ކެޓެގަރީ އާއި 18 އާއި 40 އަހަރާއި ދެމެދުގެ ކައިވެނިކޮށްގެން އުޅޭ ފަރާތްތަކަށް ޚާއްޞަ ކެޓެގަރީގެ ދަށުން ދޫކުރާ 1 ކޮޓަރި ފުލެޓްގެ ކެޓަގަރީތަކަށް ވަނީ އިސްލާހެއް ގެނެސްފައެވެ. އެ ގޮތުން މި ދެ ކެޓަގަރީގެ މަޢުލޫމާތު ކަރުދާހުގެ ޕޮއިންޓް ދިނުމަށް ބެލޭ މިންގަނޑުގެ ސުމާރު ނަންބަރު 1 (ފުލެޓަށް އެދޭމީހާ އަދާކުރި/އަދާކުރަމުންދާ ވަޒީފާގެ މުއްދަތު) އަށް ވަނީ އިސްލާހު ގެނެސްފައެވެ. ގެނައި އިސްލާހުގައި ބުނެފައި ވަނީ ފުލެޓަށް އެދޭމީހާ ނުވަތަ އަނބިމީހާ/ފިރިމީހާ (ފުލެޓަށް އެދޭމީހާ ވަޒީފާ އަދާ ނުކުރާ ނަމަ) އަދާކުރި/އަދާކުރަމުންދާ ވަޒީފާގެ މުއްދަތަށް ބެލޭނެ ކަމަށެވެ.
"ހިޔާ 2018" ޕްރޮގްރާމްގެ ދަށުން ފޯމު ހުށަހެޅުމަށް ހުޅުވާލެވިފައިވާ 12 ކެޓެގަރީއަކުން ފްލެޓަށް ކުރިމަތިލުމަށް ހުޅުވާލާފައިވާއިރު 7000 ފްލެޓް ދޫކުރުމަށް ވަނީ ހަމަޖެހިފައެވެ. މި ޕްރޮގްރާމުގެ ތެރެއިން ސަރުކާރުގެ ބައެއް ކުންފުނިތަކަށް ހާއްސަ ކެޓަގަރީތަކުގެ އިތުރުން ސިވިލް ސަރވިސްގެ މުވައްޒަފުންނާއި މާލޭގެ ރަށްވެހިންނާއި ދަފްތަރުގައި ރަޖިސްޓްރީވެފައިވާ މީހުންނާއި ޑޮކްޓަރުންނާއި ނަރުހުންނާއި ޓީޗަރުންނާއި ފުލުހުންނާއި ސިފައިންނާއި އެކަނިވެރި މައިންނާއި ބަފައިންނާއި ނުކުޅެދުންތެރިކަން ހުންނަ މީހުންގެ އާއިލާތަކަށް ހާއްސަ ކެޓަގަރީތަކަށް ވެސް ވަނީ ހުޅުވާލާއެވެ
މި މަޝްރޫއުގެ ތެރެއިން ޖުލައި 31 ގެ ނިޔަލަށް ފޯމު ދޫކުރުމަށް ހަމަޖެހިފައިވާ އިރު ފޯމު ބަލައިގަތުން ކުރިއަށްދާނީ ޖޫން 03 ވަނަ ދުވަހުން ފެށިގެން ޖުލައި މަހުގެ ނިޔަލަށެވެ.
Up until today a total of 40096 application forms have been taken from our centre at Dharubaaruge, by those who would like to apply for the government social housing scheme "Hiyaa".
— Dr.Mohamed Muizzu (@MMuizzu) May 28, 2018
Forms available until 31st July, the last date for submitting the form.
ހައުސިން މިނިސްޓަރު ޑރ. މުހައްމަދު މުއިއްޒު ހޯމަ ދުވަހު ކުރެއްވި ޓްވީޓެއްގައި ވިދާޅުވެފައި އެ މިނިސްޓްރީން ދަރުބާރު ގޭގައި ގާއިމުކޮށްފައިވާ ސެންޓަރުން އެކަނިވެސް މިހާތަނަށް 40،096 ފޯމްދޫކޮށްފައިވާ ކަމަށެވެ. އަދި މީގެ އިތުރުން ފޯމް ޑައުންލޯޑް ވެސް ކުރެވެއެވެ.
