ތޫފާން މެކުނުގެ ސަބަބުން ވަގުތީ ގޮތުން ބަންދުކުރި އޮމާނުގެ ސަލާލަހް އިންޓަނޭޝަނަލް އެއާޕޯޓް ދެ ދުވަހެއްގެ ތެރޭގައި ހުޅުވާނެ ކަމަށް އެ ގައުމުގެ ވައިގެ ދަތުރުފަތުރާބެހޭ އިދާރާއާގެ އޮފިޝަލުން ވިދާޅުވެއްޖެއެވެ.
ރަސްމީކޮށް އެއްވެސް އިދާރާއަކުން ބަހެއް ބުނި ކަމުގައި ނުވިޔަސް އޮމާނުގެ ވައިގެ އިދާރާގެ އޮފިޝަލުން ވިދާޅުވީ އަރަބި ކަނޑުގައި އުފެދިފައިވާ ތޫފާން، މެކުނު، އޮމާނަށް އެރުމުގެ ސަބަބުން މިދިޔަ ހުކުރު ދުވަހު ބަންދުކުރި އެއާޕޯޓް ދެ ދުވަސް ތެރޭގައި ހުޅުވަން މަސައްކަތް ކުރަމުން އަންނަ ކަމަށެވެ.
އޮމާނުގެ ދެ ވަނައަށް އެންމެ ބޮޑު އެއާޕޯޓް، ސަލާލަހް، ހުކުރު ދުވަހު ބަންދުކުރަން ޖެހުނީ މެކުނު ތޫފާނުގެ ސަބަބުން ލިބެމުން ދިޔަ ގެއްލުންތަކުގެ ސަބަބުން ދިމާވި ބޮޑެތި ގޮންޖެހުންތަކާ ހެދިއެވެ.
ތޫފާންގެ ސަބަބުން އޮމާނަށް ލިބުނު ގެއްލުންތަކުގެ ތެރޭގައި ދެ މީހުން މަރުވެ، ތިން މީހުން ގެއްލިފައިވާ ކަމަށް އޮމާންގެ ފުލުހުން ވަނީ ހާމަ ކޮށްފައެވެ.
އޮމާނުން ގެއްލުނު ތިން މީހުންނަކީ އޭޝިއާ އަށް ނިސްބަތްވާ ތިން މީހުން ކަމަށް އޮމާންގެ ރަސްމީ ނިއުސް އޭޖެންސީ އޯ.އެން.އޭ އިން ވަނީ ބުނެފައެވެ.
މަރުވި މީހުންގެ ތެރޭގައި ކުޑަކުއްޖަކު ވެސް ހިމެނެއެވެ.
އެހެން ނަމަވެސް މިހާރު ތޫފާނުގެ ބާރު ވަނީ ދަށްވެފައެވެ. އަދި ތޫފާން މެކުނުގެ ސަބަބުން އެންމެ ބޮޑަށް ގެއްލުންވި އޮމާންގެ ދޮފަރަށް، އިއުލާނުކުރި ކުއްލިނުރައްކަލުގެ ހާލަތު ވެސް ވަނީ އުވާލާފައެވެ.
ފުލުހުން ލަފާދީފައި ވަނީ، މެކުނުގެ އަސަރު ކުޑަވި ނަމަވެސް އާއްމުން އަދި ބޭރަށް ނުކުމެ ނޫޅުމަށެވެ.
