ޗައިނާގެ ރައީސް އަށް އުމުރު ދުވަހު ވެރިކަމުގައި ހުރެވޭ ގޮތަށް ފާސްކޮށްފި

ޗައިނާގެ ވެރިޔަކަށް ހުންނަވާނެ ބޭފުޅެއްގެ ދައުރުގެ މުއްދަތު ބަޔާންކުރާ މާއްދާ، އެ ޤައުމުގެ ޤާނޫނުއަސާސީން އުވާލައި ރައީސް ޝީ ޖިން ޕިންއަށް އުމުރުދުވަހަށް މަޤާމުގައި ހުންނެވޭނެގޮތަށް ފާސްކޮށްފިއެވެ.

ޤާނޫނުއަސާސީއަށް ގެނެވުނު ބަދަލު ފާސްކޮށްފައިވަނީ ނޭޝަނަލް ޕީޕަލްސް ކޮންގްރެސްގެ އަހަރީ ބައްދަލުވުމުގައި އާދީއްތަ ދުވަހުއެވެ.

މި ވޯޓް ބެލެވިފައި އޮތީ ސަރުކާރުން ހުށަހެޅުއްވި ކަމެއްގައި ރަބަރު ތައްގަނޑު ޖެހުމުގެ ގޮތުގައެވެ. ވޯޓްގައި ބައިވެރިވެ ވަޑައިގެންނެވި 2،964 މެމްބަރުންގެ ތެރެއިން 2 މެމްބަރަކު މި ކަމާއި ދެކޮޅަށް ވޯޓްދެއްވާފައިވާއިރު ވަކިކޮޅަކަށް ވޯޓް ނުދެއްވާ އެއް މެމްބަރަކު އިންނެވިއެވެ.

ޗައިނާގައި 1990 ގެ އަހަރުތަކުން ފެށިގެން އޮންނަނީ ވެރިކަމުގައި ހުރެވޭނީ ދެ ދައުރުކަމަށް ކަނޑައަޅާފައެވެ.

އޮކްޓޯބަރު މަހު ބޭއްވި ކޮމިއުނިސްޓް ޕާޓީގެ ކޮންގްރެސްގައި ޗައިނާގައި ރައީސް ޝީއަށްފަހު ވެރިކަންކުރައްވާނެ ބޭފުޅެއްގެ ނަން ހުށަހަޅުއްވާފައެއް ނުވެއެވެ.

އެއާއިއެކު ރައީސް ޝީއަށްވަނީ ސިޔާސީ ބާރުތައް ލިބިވަޑައިގެން ސިޔާސީގޮތުންނާއި، ފިކުރީގޮތުން އެ މަނިކުފާނުގެ ނަންވިދާލާނެހެން ޤާނޫނުއަސާސީގައި އެ ފިކުރާއި ވިސްނުންފުޅުތައް ހިމަނުއްވަން ފުރުސަތު ލިބިވަޑައިގެންފައެވެ. މިކަމުގެ ސަބަބުން އެ ޕާޓީގެ ފައުންޑަރ މާއޯ ޒެޑޮންގ އާއި އެއް ފަންތިއަކަށް ވަޑައިގެންނެވިފައެވެ.