ރައީސް މައުމޫންގެ ޓެރަރިޒަމް މައްސަލައިގެ އަޑުއެހުމެއް މާދަމާ!
މާދަމާ 12:00 އަށް ވަނީ ތާވަލްކޮށްފައި
ރައީސް މައުމޫން ބޭސްފަރުވާއަށް އޭޑީކޭއަށް ގެންނަވާފައި (ފައިލް ފޮޓޯ)
ސަރުކާރު ވައްޓާލަން އުޅުމަށް ތުހުމަތުކޮށް، ޓެރަރިޒަމްގެ ދައުވާ އުފުލާފައިވާ ކުރީގެ ރައީސް މައުމޫން އަބްދުލް ގައްޔޫމުގެ އިބްތިދާއީ އަޑުއެހުމެއް ހޯމަ ދުވަހަށް ތާވަލް ކޮށްފިއެވެ.
ރައީސް މައުމޫންގެ މައްޗަށް އުފުލާފައިވާ ޓެރަރިޒަމް ދައުވާގެ އިބްތިދާއީ އަޑުއެހުމެއް ކްރިމިނަލް ކޯޓުގައި ހޯމަ ދުވަހުގެ 12:00 އަށް ތާވަލް ކޮށްފައިވާއިރު، ރައީސް މައުމޫންގެ ސިއްހީ ހާލަކޮޅު ގޯސްވެ، ކޯޓަށް ހާޒިރު ނުކުރެވިގެން އެންމެ ފަހުން ބާއްވަން މަސައްކަތްކުރި ދެ އަޑުއެހުމެއް ވަނީ ކެންސަލް ކޮށްފައެވެ.
މިއަދު 10:00 ގައި ކްރިމިނަލް ކޯޓުގައި ތާވަލުކޮށްފައިވާ އެ އަޑުއެހުން ކެންސަލް ކޮށްފައިވާ އިރު އެ މަނިކުފާނުގެ މައްޗަށް ކުރާ ދައުވާތަކާއި ގުޅިގެން ބުދަ ދުވަހު ބާއްވަން ތާވަލުކުރި އަޑުއެހުން ވެސް ވަނީ ކެންސަލް ކޮށްފައެވެ. ޓެރަރިޒަމްގެ ދައުވާގެ އިތުރުން، ރައީސް މައުމޫންގެ މައްޗަށް ދަނީ އަދުލު އިންސާފު ގާއިމު ކުރުމަށް ހުރަސް އެޅުމުގެ ދައުވާ ވެސް ކުރަމުންނެވެ.
މިދިއަ ފެބްރުއަރީ 05 ވަނަ ދުވަހުގެ ރޭ ކުއްލި ނުރައްކަލުގެ ހާލަތު އިއުލާނު ކުރުމަށް ފަހު، ރައީސް މައުމޫން ޖަލުގައި ހައްޔަރުކޮށްފައިވާއިރު، އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާ އެކު ޖުމަލް 09 ބޭފުޅެއްގެ މައްޗަށް ޓެރަރިޒަމްގެ ދައުވާ އުފުލާފައި ވެއެވެ. އޭގެ ތެރޭގައި ރައީސް މައުމޫންގެ ދަރިކަލުން އަދި ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ދަރިކަނބަލުން ޔުމްނާ މައުމޫންގެ ފިރިކަލުން މުހައްމަދު ނަދީމު ވެސް ހިމެނެއެވެ.
