ކުރީގެ ރައީސް މައުމޫން އަބްދުލްގައްޔޫމްގެ ދަރިކަނބަލުން ޔުމްނާ މައުމޫންގެ ޕާސްޕޯސްޓް ހިފަހައްޓައިފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި، ޔުމްނާގެ ޕާސްޕޯޓް ހިފަހައްޓާފައި ވަނީ ކޯޓް އަމަރެއްގެ ދަށުންނެވެ. ޕާސްޕޯޓް ހިފެހެއްޓިކަން ބުރާސްފަތި ދުވަހު ފުލުހުން ޔުމްނާއަށް އަންގާފައިވާކަމުގެ މައުލޫމާތު ވަނީ ލިބިފައެވެ.
އެހެން ނަމަވެސް ޕާސްޕޯޓް ހިފެހެއްޓީ ކޮން ސަބަބަކާއި ހެދިކަމެއް އަދި ކިހާ މުއްދަތަކަށް ކަމެއް އަދި ނޭނގެއެވެ. މި ކަމާއި ގުޅިގެން ޔުމްނާގެ ބަހެއް ވަނީ ލިބޭ ގޮތް ނުވެފައެވެ.
ޔުމްނާ މައުމޫންގެ ޕާސްޕޯޓް ހިފަހައްޓާފައި ވާއިރު، އޭނާގެ މައްޗަށް ރައްޔިތުންގެ މަޖިލީހުގެ މެމްބަރުންނަށާއި ސުޕްރީމް ކޯޓުގެ ބައެއް ފަނޑިޔާރުންނަށް ރިޝްވަތުގެ ގޮތުގައި ފައިސާ ދީގެން، ބަޔަކ ގުޅިގެން ގާނޫނީ ސަރުކާރު ގާނޫނާ ޚިލާފަށް ވައްޓާލަން މަސައްކަތް ކުރި ކަމުގެ ތުހުމަތުވަނީ ކޮށްފައެވެ. އަދި އެ މައްސަލަ ފުލުހުން ދަނީ ތަޙްގީގް ކުރަމުންނެވެ.
ވެރިކަން ވައްޓާލަން އުޅުމުގެ ތުހުމަތުގައި، ބައްޕާފުޅު މައުމޫނާއި ކޮއްކޯފުޅު އަހުމަދު ފާރިސް މައުމޫން އަދި ފިރިކަލުން މުހައްމަދު ނަދީމް ވެސް ވަނީ ޝަރީއަތް ނިމެންދެން ޖަލުގައި ބަންދުކޮށްފަ އެވެ. އޭގެއިތުރުން ރައީސް މައުމޫންގެ ސިއްހީ ހާލުކޮޅު ގޯސްވެ، ނިމުނު ހަތަރު ޝަރީއަތަށްވެސް އެމަނިކުފާނު ކޯޓަށް ހާޒިރުކުރެވިފައެއް ނުވެއެވެ.