މިދިޔަ އަންގާރަ ދުވަހު އަވަހާރަވި ރާއްޖޭގެ ފުރަތަމަ އިސްލާމިކް މިނިސްޓަރ ޑރ ޢަބްދުލް މަޖީދު ޢަބްދުލް ބާރީގެ ހަނދާނުގައި އިސްލާމިކް މިނިސްޓްރީން ތައުޒިޔާގެ ދަފްތަރެއް ހުޅުވާލައިފިއެވެ.

ބުރާސްފަތި ދުވަހު 11 ޖެހިއިރު އިސްލާމިކް މިނިސްޓްރީގައި އެދަފްތަރު ހުޅުވުމުގެ ގޮތުން ދަފްތަރު ފޮތުގައި ލިއުއްވައި ދަފްތަރު ހުޅުވައިދެއްވީ ކުރީގެ އިސްލާމީ ކަންތައްތަކާ ބެހޭ އެންމެ މަތީ މަޖިލީހުގެ ރައީސް އަދި މިހާރުގެ އިސްލާމީ ފަތުވާދޭ އެންމެ މަތީ މަޖިލީހުގެ ރައީސް ފަޟީލަތުއްޝައިޚް މުހައްމަދު ރަޝީދު އިބްރާހީމެވެ. އެއަށް ފަހު އިސްލާމިކް މިނިސްޓަރ ޑރ އަހުމަދު ޒިޔާދު ބާޤިރު އެފޮތުގައި ލިއުއްވިއެވެ.

އާދީއްތަ ދުވަހު ހެނދުނު 10:00 މެންދުރު 2:00 އަށް ހުޅުވާލުމަށް ހަމަޖެހިފައިވާ މި ދަފްތަރުގައި ދީނީ އިލްމުވެރިންނާއި އިސްލާމިކް މިނިސްޓްރީގެ އިސް ބޭފުޅުންވަނީ މި ރަސްމިއްޔާތުގައި އެދަފްތަރުގައި ލިއުއްވާފައެވެ.

ދަފްތަރުގައި ލިޔުއްވުމަށް ފަހު އިސްލާމިކް މިނިސްޓަރ ޑރ އަހުމަދު ޒިޔާދު ބާޤިރު ވިދާޅުވީ ގެއްލިގެން ދިޔައީ އިލްމީ ޚަޒާނާއެއް ކަމަށާއި ޑރ މަޖީދަކީ ވަރަށް ތެދުވެރިކަމާއި އިޚްލާސްތެރިކަމާއެކު މަސައްކަތް ކުރެއްވި ބޭފުޅެއް ކަމަށެވެ. އަދި އިސްލާމިކް މިނިސްޓްރީގައިވެސް ވަރަށްގިނަ ދީނީ އާކަންކަންކުރައްވަން ފެއްޓެވި ބޭފުޅެއް ކަމުގައި މިނިސްޓަރ ވިދާޅުވިއެވެ.

"ޑރ އަބްދުލް މަޖީދު ޢަބްދުލް ބާރީއަކީ ވަރަސް ތެދުވެރިކަމާއި އިޚްލާސްތެރިކަމާއެކު ދީނީ ވަރަށް ގިނަ ކަންކަން ކުރައްވަމުން ގެންދެވި ބޭފުޅެއް. ހަމައެކަނި ދިވެހިރާއްޖެއަކު ނޫން. ބައިނަލްއަޤްވާމީ އެކިއެކި ފޯރަމްތަކުގައިވެސް ވާހަކަ ދައްކަވާފައި ހުރި ވަރަށް އިލްމީ ބޭފުޅެއް. މިނިސްޓްރީގައިވެސް ވަރަށް ގިނަ އާކަންކަން ފައްޓަވާފައި ހުންނެވި ބޭފުޅެއް ޑރ މަޖީދަކީ" އިސްލާމިކް މިނިސްޓަރ ވިދާޅުވިއެވެ.

ޑރ މަޖީދު ސްރީ ލަންކާއަށް ވަޑައިގެން އުޅުއްވަނިކޮށް، ސްޓްރޯކެއް ޖެހިގެން ލަންކާ ހޮސްޕިޓަލްގައި މިމަހުގެ 18 ވަނަ ދުވަހު އެޑްމިޓްކޮށް ފަރުވާދެމުން ގެންދަވަނިކޮށް އަވަހާރަވެވަޑައިގަތީ މެއި 22 ވަނަ ދުވަހުއެވެ. .ފަސްދާނުވެޑުވީ ބުދަ ދުވަހު މެންދުރު ނަމާދަށް ފަހު ކޮޅުނބުގައެވެ.

ޑރ. މަޖީދަކީ މަދީނާ ޔުނިވާސިޓީން ޕީއެޗްޑީ ނެންގެވި ފުރަތަމަ، އަދި ހަމަ އެކަނި ދިވެހި އިލްމުވެރިޔާއެވެ. ޤުރުއާން ތަފްސީރުން ޕީއެޗްޑީ ޙާސިލް ކުރައްވައިގެން ހުންނެވި ޑރ މަޖީދުގެ ތީސީސް ބިނާކުރައްވާފައިވަނީ ރާއްޖޭގެ ޒަކާތުގެ ކަންކަން ހަރުދަނާކުރުމުގެ މައްޗަށެވެ. އަދާލަތު ޕާޓީގެ އެންމެ ފުރަތަމަ ރައީސަކީ ޑރ މަޖީދެވެ. އެޕާޓީގެ އިލްމުވެރިންގެ މަޖިލީހުގެ ފުރަތަމަ ރައީސަކީވެސް އެމަނިކުފާނެވެ. އަދި  ރާއްޖޭގައި އުފެއްދި ފުރަތަމަ ފިގުހު އެކަޑަމީގެ ފުރަތަމަ ރައީސަކީ ވެސް ޑރ މަޖީދެވެ. މީގެ އިތުރުން ރާއްޖޭގައި އުފެއްދި ފުރަތަމަ އިސްލާމިކް ބޭންކު އުފެއްދުމުގައި އަމަލީ ގޮތުން އެމަނިކުފާނު މަސައްކަތް ކުރެއްވިއެވެ. އަދި މޯލްޑިވްސް އިސްލާމިކް ބޭންކާއި ބޭންކް އޮފް މޯލްޑިވްސްގެ އިތުރުން އެމްއެމްއޭގެ ޝަރީއާ ބޯޑުގެ މެންބަރުކަން ޑރ. މަޖީދު ކުރެއްވިއެވެ.