މިއަހަރުގެ ރިޔާސީ އިންތިޚާބު ނުބާއްވާނެ ކަމަށް ރައްޔިތުންނަށް ވިސްނާ ދެނީ ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމް ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ވިދާޅުވެއްޖެއެވެ.
މެންބަރު މަހުލޫފު ވިދާޅުވީ ރައީސް ޔާމިން ވަގު ހަދާނެ ކަމަށާއި، އޮޅުވާލާނެ ކަމަށް ރައްޔިތުންނަށް ވިސްނާ ދިނީ އެމަނިކުފާނު އަމިއްލަ އަށް ކަމަށެވެ. މިއަހަރުގެ ރިޔާސީ އިންތިޚާބު ވެސް ނުބާއްވާނެ ކަމަށް ރައްޔިތުން ދައްކަމުންދާ ވާހަކަތަކަށް ރައްދު ދެއްވާ މަހުލޫފު ވިދާޅުވީ މިއީ ރައީސް ޔާމިން ރައްޔިތުންނަށް ވިސްނާދީފައިވާ ގޮތް ކަމަށެވެ. މަހުލޫފު ވިދާޅުވީ ރައްޔިތުންނަށް އޮޅުވާލަން މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށާއި، މިއަހަރުގެ ރިޔާސީ އިންތިހާބު އޮންނާނެ ކަމަށެވެ. އަދި މިސަރުކާރު އިންތިހާބު އޮޅުވާލި ނަމަވެސް ބޮޑުތަނުން ބަލިވެގެންދާނެ ކަމަށާއި، އޮޅުވާނުލެވޭ ވަރުގެ ބޮޑު ތަފާތެއް ދައްކާނެ ކަމަށް މަހުލޫފު ވިދާޅުވިއެވެ.
މަހުލޫފު ވިދާޅުވީ އަބަދު ވެސް ވިސްނަން ޖެހޭނީ ޕޮޒިޓިވް ކޮށް ކަމަށާއި، އިސްލާހަށް މަސައްކަތް ކުރާ ބަޔަކަށް ކާމިޔާބު ލިބޭނެ ކަމަށެވެ. ކާމިޔާބީ އަކީ މަސައްކަތް ކުރާ ބައެއްގެ ހައްގެއް ކަމަށް ވެސް މަހުލޫފު ވިދާޅުވި އެވެ.
މިއަހަރުގެ ރިޔާސީ އިންތިހާބު މިނިވަން ނުވާނެ ކަމަށާއި، އިލެކްޝަން ކޮމިޝަނަކީ މިނިވަން މުއައްސަސާއެއް ކަމަށް ނޫން އިދިކޮޅު ސިޔާސީ ފަރާތްތަކުން ދަނީ ބުނަމުންނެވެ. އަދި ކޮމިޝަނުން ހުރިހާ މަސައްކަތަކެއް ކުރަމުންދަނީ ރައީސް ޔާމިންގެ އޯޑަރަށް ކަމަށް ވެސް އެފަރާތްތަކުން ދަނީ ތުހުމަތު ކުރަމުންނެވެ.
