އެމްޑީޕީގެ މައި ހަރުގެ، ރައީސް ނަޝީދުގެ ކެމްޕެއިން ޖަގަހައަށް
20 މެއި 2018 | އާދީއްތަ 20:12ކެމްޕެއިން ހަރަކާތް އިތުރަށް ފޯރިގަދަވާނެ ކަމަށް މެނޭޖަރ ވިދާޅުވި
ނަޝީދުގެ ކެމްޕެއިން ޖަގަހައި ހުޅުވާ ދެއްވަނީ
މާލޭގައި ހުންނަ އެމްޑީޕީގެ މައި ހަރުގެ، ކުރީގެ ރައީސް މުހައްމަދު ނަޝީދުގެ ޕްރައިމަރީ ކެމްޕެއިން ޖަގަހައެއްގެ ގޮތުގައި ހުޅުވައިފި އެވެ.
އާޓިފިޝަލް ބީޗް ކުރިމަތީ ހުންނަ އެމްޑީޕީގެ ހަރުގެ ނަޝީދުގެ ކެމްޕެއިން ޖަގަހައިގެ ގޮތުގައި ހުޅުވާ ދެއްވީ ދައުލަތައް ގިނަ ދުވަސްތަކެއް ވަންދެން ހިދުމަތް ކޮށްދެއްވާފައިވާ އަޒީޒާ އުމަރެވެ.
ނަޝީދުގެ ކެމްޕެއިން ޖަގަހަ ހުޅުވުމަށް ބޭއްވި ހަރަކާތުގެ ތެރެއިން -- ފޮޓޯ: ރާއްޖެއެމްވީ
މި ޖަގަހަ ހުޅުވުމަށްފަހު ރައީސް ނަޝީދުގެ ކެމްޕެއިން މެނޭޖަރ، އަދި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ މި ޖަގަހަ ހުޅުވުމާއެކު ކެމްޕެއިން ހަރަކާތް އިތުރަށް ފޯރިގަދަ ވެގެންދާނެ ކަމަށެވެ. އަދި ވިދާޅުވީ އެދިވަޑައިގަންނަނީ އެމްޑީޕީގެ ހުރިހާ މެމްބަރުން ވެސް ޕްރައިމަރީގައި ވޯޓުދިނުން ކަމަށެވެ. ހަމައެހެންމެ ރައީސް ނަޝީދުގެ މެސެޖް މިހާތަނަށްވެސް 70 އަށްވުރެ ގިނަ ރަށަށް ފޯރުކޮށްދީފައިވާ ކަމަށްވެސް ވިދާޅުވި އެވެ.
"އަޅުގަނޑު ދަންނަވާނީ އަޅުގަނޑުމެންގެ މި ކެމްޕެއިން ހަރަކާތް، މިދާ ސްޕީޑުން ރައީސް އަބްދުﷲ ޔާމިނަކަށް އަތެއް ނުވާނެ އޭ" އަސްލަމް ވިދާޅުވި އެވެ.
މި ހަރަކާތުގައި ވާހަކަ ދައްކަވަމުން ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވީ ރައީސް އަބްދުﷲ ޔާމިނާއި ސަރުކާރުގެ އިސްވެރިން ރައީސް ނަޝީދުގެ ވާހަކަ ދެއްކެވުމަކީ އެމަނިކުފާނަށް ކުރިމަތިލެވޭނެ ކަމުގެ ހެއްކެތް ކަމަށެވެ. އަދި ނަޝީދަށް ޕްރަރިމަރީގައި ވީހާވެސް ގިނަ އެމްޑީޕީގެ މެމްބަރުން ވޯޓު ދިނުމަކީ ކޮންމެހެން ބޭނުންތެރި ކަމެއް ކަމަށް އޭނާ ވެސް ވިދާޅުވި އެވެ.
މި ޖަގަހަ ހުޅުވުމަށް ބޭއްވި ހަރަކާތުގައި ވެސް ނަޝީދު ވަނީ އާންމު މެމްބަރުންނާ މުހާތަބު ކުރައްވާ ވީޑިއޯ މެސެޖެއް ދެއްވާފަ އެވެ. މިއީ ނަޝީދުގެ ޕްރައިމަރީ ކެމްޕެއިނަށް މާލޭގައި ހުޅުވި ދެ ވަނަ ޖަގަހަ އެވެ.
