އިދިކޮޅު އެއްވެސް ލީޑަރަކަށް އިންތިޚާބުގައި ވާދަނުކުރެވޭނެކަމަށް އިލެކްޝަންސްއިން އަންގައިފި: ރައީސް ނަޝީދު
20 މެއި 2018 | އާދީއްތަ 15:23އެމްޑީޕީގެ ރިޔާސީ ޕްރައިމަރީއަށް ކުރިމަތިލެއްވީ ރައީސް ނަޝީދު އެކަނި
ޕްރައިމަރީގައި ވާދަކުރުމަށް ރައީސް ނަޝީދު ފޯމު ފުރުއްވަނީ
އިދިކޮޅު އެއްވެސް ލީޑަރަކަށް ރިޔާސީ އިންތިޚާބުގައި ވާދަނުކުރެވޭނެކަމަށް ރައީސް ޔާމީން ހޮއްވަވާފައި ތިއްބެވި މެމްބަރުން ހިމެނިވަޑައިގަންނަވާ އިލެކްޝަންސް ކޮމިޝަނުން ނިންމައިފިކަމަށް ރައީސް ނަޝީދު ވިދާޅުވެއްޖެއެވެ.
އިދިކޮޅު 4 ލީޑަރުންގެ ތެރޭގައި ހިމެނިވަޑައިގަންނަވާ، އަދި ރިޔާސީ އިންތިޚާބުގައި ފާޅުގައި ކެމްޕޭން ކުރައްވަމުން ގެންދަވާ ހަމައެކަނި ލީޑަރު ކުރީގެ ރައީސް މުހައްމަދު ނަޝީދު އާދިއްތަ ދުވަހުގެ އިރުއޮއްސުނު ވަގުތު މިހެން ވިދާޅުވެފައިވަނީ، ޕާޓީގެ ޕްރައިމަރީގައި ވާދަކުރާ ކެންޑިޑޭޓުންނަކީ ރައީސުލްޖުމްހޫރިއްޔާގެ ކިބައިގައި ހުންނަންޖެހޭ ޝަރުތުތައް ހަމަވެފައިވާ މީހަކަށް ވާންޖެހޭ ކަމަށާއި މިކަންކަމަށް ސިޔާސީ ޕާޓީތަކުން ސަމާލުވާންޖެހޭ ކަމަށް އިލެކްޝަންސް ކޮމިޝަނުން އާދިއްތަ ދުވަހު ބުނުމާއި ގުޅިގެންނެވެ.
އިލެކްޝަންސް ކޮމިޝަނުން ހާމަކޮށްފައިވާ ގޮތުގައި ސިޔާސީ ޕާޓީއެއްގެ ޕްރައިމަރީގައި ވާދަކޮށްފައިވާ މެންބަރަކު އެ އިންތިހާބުގައި އެއްވެސް ހައިސިއްޔަތަކުން ކެންޑިޑޭޓެއްގެ ގޮތުގައި ވާދަކުރާނަމަ އެ މީހެއްގެ ކެންޑިޑެސީ އިލެކްޝަންސް ކޮމިޝަނުން ބާތިލްކުރާނެ އެވެ. އަދި މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ޕާޓީ ތަމްސީލު ކުރާނެ ކެންޑިޑޭޓެއް ހޮވުމަށްޓަކާއި ޕާޓީއަކުން ޕްރައިމަރީއެއް ބާއްވާނަމަ ނުވަތަ ޕްރައިމަރީއަކާ ނުލައި ޓިކެޓް ދޭން ނިންމާނަމަ އެކަން އެ ކޮމިޝަނަށް އަންގަން ޖެހޭނެ ކަމަށްވެސް އިލެކްޝަންސް ކޮމިޝަނުން ބުނެ އެވެ.
އިލެކްޝަންސްގެ ނިންމުމާއި ގުޅޭ ގޮތުން އެމްޑީޕީގެ ޗެއަރޕަރސަން ހަސަން ލަތީފް ވިދާޅުވީ އިލެކްޝަންސް ކޮމިޝަނުން ބުނާ ކޮންމެ އެއްޗެއް ޤާނޫނަކަށް ނުވާނެކަމަށާއި، އެޕާޓީއިން އަމަލުކުރަނީ ޤާނޫން އަސާސީއާއި، ޤާނޫނުތަކާއި އަދި އެޕާޓީގެ އަސާސީ ޤަވާޢިދާއި އެއްގޮތަށް ކަމަށެވެ. އަދި އިލެކްޝަންސް ކޮމިޝަނުން މަސައްކަތްކުރަނީ އެމްޑީޕީގެ ޕްރައިމަރީއަށް ނުފޫޒު ފޯރުވުމަށްކަމަށާއި، އެކަން ކުށްވެރިކުރައްވާކަމަށް ހަސަން ލަތީފް ވިދާޅުވިއެވެ. ރާއްޖެ ޓީވީގެ 60 މިނެޓް ޕްރޮގްރާމްގައި އާދިއްތަ ދުވަހުގެރޭ ވާހަކަ ދައްކަވަމުން ހަސަން ލަތީފް ވިދާޅުވީ ޤާނޫން އަސާސީގައި ބުނާ ގޮތުން ކެންޑިޑޭޓެއްގެ ކެެންޑިޑެސީ މައްސަލައިގައި ގޮތެއް ނިންމާނީ ސުޕްރީމް ކޯޓުގެ ފުލް ބެންޗުންކަމަށެވެ. އަދި އެކޯޓުގެ ފުލް ބެންޗުން 1 ފެބްރުއަރީގައި ނެރުނު އަމުރުގައި ރައީސް ނަޝީދު މިނިވަންކުރުމަށް އަމުރުކޮށްފައިވާކަން އޭނާ ފާހަގަކުރެއްވިއެވެ.
އިދިކޮޅު އެއްވެސް ލީޑަރަކަށް ރިޔާސީ އިންތިޚާބުގައި ވާދަނުކުރެވޭނެކަމަށް އިލެކްޝަންސް ކޮމިޝަނުން ނިންމައިފިކަމަށް ރައީސް ނަޝީދު ވިދާޅުވެފައިވަނީ ބެލެވޭ ގޮތުގައި އިދިކޮޅު ހަތަރު ލީޑަރުންނަކީވެސް މިވަގުތު ޤާނޫން އަސާސީއަށް ގެނެސްފައިވާ ބަދަލުތަކުގެ ސަބަބުންނާއި ސިޔާސީ ޕާޓީތަކުގެ ޤާނޫނަށް ގެނެވުނު ބަދަލެއްގެ ސަބަބުން އިންތިޚާބުގައި ވާދަކުރުމުގެ ޤާނޫނީ ޝަރުތު ފުރިހަމަ ނުވާ ބޭފުޅުންނަށްވާތީއެވެ. އިދިކޮޅު ހަތަރު ލީޑަރުންނަކީ ރައީސް ނަޝީދުގެ އިތުރުން ޖުމްހޫރީ ޕާޓީގެ ލީޑަރު ޤާސިމް އިބްރާހިމްއާއި، އަދާލަތު ޕާޓީގެ ރައީސް ޝެއިޚް އިމްރާން އަބްދުﷲގެ އިތުރުން ކުރީގެ ރައީސް އަދި ޕީޕީއެމްގެ ރައީސް އަލްއުސްތާޛް މައުމޫން އަބްދުލްޤައްޔޫމެވެ.
މީގެ ތެރެއިން ރައީސް ނަޝީދާއި ޝައިޚް އިމްރާންއަށް ޖަލު ހުކުމެއް އިއްވާފައިވާތީ އެބޭފުޅުންނަށް ރިޔާސީ އިންތިޚާބުގައި ވާދަނުކުރެވޭނެކަމަސް ސަރުކާރުން ދަނީ ބުނަމުންނެވެ. އެހެން ނަމަވެސް 1 ފެބްރުއަރީގައި ސުޕްރީމް ކޯޓުން ވަނީ އެ 2 ބޭފުޅުން މިނިވަންކުރުމަށް އަމުރުކޮށްފައެވެ. އެއަމުރަށް ސަރުކާރުން ކިޔަމަން ނުވެ، އަމުރު ތަންފީޒު ކުރަން އުޅުނު ފުލުހުން ޖަލަށް ލާފައިވާއިރު، އަމުރުގައި ސޮއެކުރެއްވި އުއްތަމަ ފަނޑިޔާރާއި އިތުރު ފަނޑިޔާރަކު ވަނީ ޖަލަށް ލާފައެވެ.
ރައީސް މައުމޫނާއި ޤާސިމް އިބްރާހީމްގެ އުމުރުފުޅުން 65 އަހަރަށްވުރެ ދޮށިވުމުން ޤާނޫނު އަސާސީއަށް ގެނެވުނު ބަދަލުގެ ސަބަބުން އެބޭފުޅުންނަށް އިންތިޚާބަށް ކުރިމަތި ނުލެއްވޭނެއެވެ. ޤާސިމް އިބްރާހިމްގެ މައްޗަށް ޖަލު ހުކުމެއް އިއްވާފައިވާއިރު، ރައީސް މައުމޫން ހުންނެވީ ރިޝްވަތާއި ޓެރަރިޒަމްގެ މައްސަލަތަކެއްގައި ބަންދުކޮށްފައެވެ.
އިލެކްޝަންސް ކޮމިޝަނުން އާދިއްތަ ދުވަހު ޕްރައިމަރީތަކާއި ބެހޭ ގޮތުން ނޫސް ބަޔާނެއް ނެރެފައިވަނީ އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް ނަން ހުށަހެޅުއްވީ ހަމައެކަނި ރައީސް ނަޝީދުކަމަށް އެޕާޓީއިން ހާމަކުރުމުންނެވެ. އެމްޑީޕީގެ ޕްރައިމަރީ އޮންނާނީ މިމަހުގެ 30 ވަނަ ދުވަހުގެ ރެއެވެ.
ސަރުކާރުންނާއި އިލެކްޝަންސް ކޮމިޝަނުން ރައީސް ނަޝިދަށް އިންތިޚާބުގައި ވާދަނުކުރެވޭނެކަމަށް ބުނިނަމަވެސް، ރައީސް ނަޝީދު މީގެ ކުރިން ވިދާޅުވީ އެމަނިކުފާނަށް އިންތިޚާބުގައި ވާދަކުރުމުގެ ފުރުސަތު އެންމެ ފަހު ވަގުތު ދޭނެކަމަށެވެ.
އެމްޑީޕީގެ ޗެއަރޕަރސަން ހަސަން ލަތީފް ވިދާޅުވީ މިމަހުގެ 30 ވަނަ ދުވަހުގެ ރޭ ރޭވިފައިވާ ގޮތަށް އެމްޑީޕީގެ ޕްރައިމަރީގައި ވޯޓުލުން އޮންނާނެކަމަށެވެ.
