ތޮއްޑޫ ކަރާ ދަނޑުތަކުގައި ފަންޏެއް އަޅައި، ގެއްލުންތަކެއް ވެއްޖެ
19 މެއި 2018 | ހޮނިހިރު 10:16ފަނި އެޅި ނަމަވެސް، ކަރާ ހެއްދުމަށް ހުރަހެއް ނެތް
ތޮއްޑޫ ކަރާ ދަނޑުގައި ފަނި އަޅާފައި
އއ. ތޮއްޑޫގެ ކަރާ ދަނޑުތަކުގައި ފަންޏެއް އަޅައި، ގެއްލުންތަކެއް ވެއްޖެ އެވެ.
ތޮއްޑޫ ކައުންސިލްގެ ނައިބު ރައީސް ހަސަން އަބްދުﷲ "ރާއްޖެއެމްވީ"އަށް ވިދާޅުވީ ރޯދަ މަހާ ދިމާކޮށް ހެއްދި ކަރާ ދަނޑުތަކުގައި ފަނިތަކެއް އަޅާފައިވާ ކަމަށާއި މިދިޔަ އަހަރު ވެސް އެ ފަނިތަކުގެ އުނދަގޫ ދަނޑުތަކަށް ކުރި ކަމަށެވެ. ކަރާ ދަނޑުތަކުގައި އެޅި ފަނިތައް ދަނޑުގެ ފަތްތަކާއި ކަރާގެ ބޭރު ތޮށި ކައި ހަދާ ކަމަށް ހަސަން ވިދާޅުވިއެވެ.
އޭނާ ވިދާޅުވީ އެ ފަނިތައް އަޅަނީ ރޯދަ މަހާ ދިމާކޮށް ހައްދާ ދަނޑުތަކުގައި ކަމަށާއި ފަނި އުފެދޭ ސަބަބު އަދި އެނގިފައި ނުވާ ކަމަށެވެ. މިދިޔަ އަހަރުވެސް ގިނަ އަދަދެއްގެ ކަރާ ދަނޑުތަކުގައި ފަނި އެޅި ކަމަށާއި އޭގެ އުނދަގޫ ގިނަ ދަނޑުވެރިންނަށް ކުރި ކަމަށް ހަސަން ވިދާޅުވިއެވެ.
އޭނާ ވިދާޅުވީ ފަނިތަކުން ދަނޑުތައް ސަލާމަށް ކުރުމަށް، ތޮއްޑޫ ދަނޑުވެރިން އެކި ކަހަލަ ބޭސް ބޭނުން ކުރަމުންދާ ކަމަށާއި ބައެއް ދަނޑުވެރިން ކޮންމެ ދުވަހު ދަނޑުތައް މޮނީޓާކޮށް، ބަލަހައްޓަމުންދާ ކަމަށެވެ. މިދިޔަ އަހަރަށް ވުރެ މިއަހަރު ފަނީގެ އުނދަގޫ ކުޑަ ކަމަށް ހަސަން ވިދާޅުވި އެވެ.
"ވަރަށް ގިނަ ހޭދަ ކޮށްގެން، ބޭސް ޖަހައިގެން ދަނޑުތައް ދަނޑުވެރިން ބަލަހައްޓަނީ. އެކަމަކު ވެސް ފަނިތަކުގެ އަސަރު ދަނޑުތަކަށް ކުރޭ. މިދިޔަ އަހަރު ދަނޑުތަކަށް ފަނީގެ އަސަރު ކުރި ވަރަށް ވުރެ މިފަހަރު ކުޑަ،" ތޮއްޑޫ ކައުންސިލްގެ ނައިބު ރައީސް ވިދާޅުވިއެވެ.
ހަސަން ވިދާޅުވި ގޮތުގައި ދަނޑުތަކުގައި އެ ފަނި އެޅި ކަމުގައިވިޔަސް، ކަރާ ހެއްދުމަށް ދައްޗާ ކުރިމަތި ނުވާނެ ކަމަށާއި މިއަހަރަށް އަމާޒު ކުރި މިންވަރަށް ދަނޑުތަކުން ކަރާ ލިބޭނެއެވެ.
ތޮއްޑޫ ކަރާ ދަނޑުތަކުން މިއަހަރުގެ ރޯދައަށް 300 ޓަނުގެ ކަރާ އުފެއްދުމަށް ވަނީ އަމާޒު ހިފާފައެވެ. ކަރާ ހެއްދުމަށް ތޮއްޑޫއިން ދެ މިލިއަން އަކަފޫޓުގެ ސަރަހައްދަކުން 113 ދަނޑު ވަނީ ދޫކޮށްފައެވެ.
