ޖަޒީރާ ރައީސްގެ ކެމްޕެއިން ޓީމެއް ގދ އަތޮޅުގައި
18 މެއި 2018 | ހުކުރު 14:37ގދ އަތޮޅުގެ 6 ރަށަކަށް މިއަދު ވަނީ ގޮސްފައި
ގދ މަޑަވެލީގައި އެމްޑީޕީގެ އިސް ފަރާތްތަކާ ބައްދަލު ކުރަނީ
ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ޓިކެޓަށް ތާއީދު ހޯއްދެވުމަށް މަސައްކަތް ކުރައްވާ ކުރީގެ ރައީސް މުހައްމަދު ނަޝީދުގެ ކެމްޕެއިން ޓީމެއް ގދ އަތޮޅުގެ އެކި ރަށްތަކަށް މިއަދު ޒިޔާރަތްކޮށްފިއެވެ.
ބުރާސްފަތި ދުވަހުގެރޭ މާލެއިން ގދ ތިނަދޫއަށް ދިޔަ މިޓީމުގެ ހަރަކާތްތައް ފަށާފައިވަނީ ހެނދުނު 10 ޖެހިއިރު ގދ މަޑަވެލިންނެވެ. އެއަށްފަހު އެއަތޮޅު ހޯޑެއްދޫ، ނަޑެއްލާ، ފިޔޯރީ، ރަތަފަންދޫ އަދި ފަރެސްމަތޮޑާއަށް މިޓީމުން ވަނީ ގޮސްފައެވެ.
ރައީސް ނަޝީދުގެ ވެރިކަމުގައި ހައުސިން މިނިސްޓަރ ކަންކުރެއްވި މުހައްމަދު އަސްލަމް އިސްކޮށް ހުންނަވާ މި ޓީމުން އެރަށްރަށުގައި ތިބި އެމްޑީޕީގެ އިސް ފަރާތްތަކާ ބައްދަލުކޮށް ކެންޕެއިން ހަރަކާތް ކުރިއަށް ގެންދާނެ ގޮތުގެ މައުލޫމާތު ވަނީ ފޯރުކޮށްދީފައެވެ. އަދި ކޮންމެރަށެއްގައިވެސް ރައީސް ނަޝީދުގެ ކެންޕެއިން ޕޯސްޓަރ ތަތް ކުރުމާއި ތާއީދު ފޯމުގައި ސޮއި ކުރުންވެސްވަނީ ކުރިއަށް ގެންގޮސްފައެވެ.
މިޓީމުން ހޮނިހިރު ދިއުމަށް ހަމަޖެހިފައިވަނީ ގދ އަތޮޅު ގައްދޫއަށާއި ވާދޫއަށެވެ. އެއަށްފަހު ދެން ޓީމުން ދިއުމަށް ހަމަޖެހިފައިވަނީ ގދ ތިނަދޫއަށެވެ. ތިނަދޫގައި ހޮނިހިރު ދުވަހުގެރޭ ބޮޑު ޖަލްސާއެއް ބޭއްވުމަށްވަނީ ހަމަޖެހިފައެވެ.
ގދ އަތޮޅުގައި މިޓީމުން ހަރަކާތްތެރިވާއިރު ހަމަ މިޓީމާއެކު ގދ ތިނަދޫއަށް އައި އެހެން ޓީމެއް ގއ އަތޮޅު ރަށްރަށުގައި ދަނީ ހަރަކާތްތެރިވަމުންނެވެ. އެޓީމުން އެއަތޮޅު ދެއްވަދޫ، ކޮލަމާފުށި، ވިލިނގިލި، މާމެންދޫ، ނިލަންދޫ، ދާންދޫ، ކޮނޑޭ، ގެމަނަފުށި އަދި ކަނޑުހުޅުދޫއަށް ދިއުމަށް ވަނީ ހަމަޖެހިފައެވެ. މިޓީމުވެސް ތިނަދޫގައި އޮންނަ ޖަލްސާއަށް ހޮނިހިރު ދުވަހުގެރޭ ތިނަދޫއަށް ދިއުމަށް ވަނީ ހަމަޖެހިފައެވެ.
