ހުކުރު ދުވަހުންފެށިގެން ވޭސްޓްމެނޭޖްމަންޓް ކޯޕަރޭޝަން (ވެމްކޯ) އިން ދުވާލު ގަޑީގައިވެސް ކުނި އުކަން ފަށަން ނިންމާފައިވާކަމަށް އެ ކުންފުނިން ބުނެފިއެވެ.
މި ރަމަޟާންމަހު މާލޭގެ މަގުތައް ގޮނޑުވެ، އާންމުންގެ ޝަކުވާ އިންތިހާއަށް ގޮސްފައިވާއިރު ވެމްކޯއިން ބުރާސްފަތި ދުވަހުގެރޭ ނެރެފައިވާ ބަޔާނެއްގައި ބުނެފައިވަނީ މާލޭ ސަރަހައްދުން ރޯދަމަހު ރޭގަނޑު އެކަނި ކުނިނަގާގޮތަށް ހަމަޖެއްސީ ސާރވޭއަކަށް ބިނާކޮށް ކަމަށާއި ނަމަވެސް އެގޮތަށް ކުނި ނެގުމަށް ދަތިތަކާއި ކުރިމަތިވެފައިވާ ކަމަށެވެ.
ރޯދަ މަހު މާލެ އާއި ހުޅުމާލެ އަދި ވިލިމާލޭގެ ގޭގެ އިން ކުނި ނަގާ ގޮތަށް ވެމްކޯއިން ހަމަޖެއްސީ ރޭގަނޑު 8:00 އިން ދަންވަރު 12:00 އަށެވެ.
މި ރޯދަމަހު މާލޭ ސަރަހައްދުގެ ގޭބިސީތަކުން ރޭގަނޑު އެކަނި ކުނި ނަގާގޮތަށް ހަމަޖެއްސި ހަމަޖެއްސުމަށް ބަދަލު ގެނެސް ހުކުރުދުވަހުން ފެށިގެން ދުވާލުވެސް މާލޭ ސަރަހައްދުގެ ގެބިސީތަކުން ކުނިނަގާގޮތަށް ހަމަޖެހިފައިވާކަމަށް ވެމްކޯއިން ނެރުނު ބަޔާނުގައި ވަނީ ބުނެފައެވެ.
އެގޮތުން ދެ ޝިފްޓަކަށް ބަހާލައިގެން މެންދުރު 2:00 އިން ފެށިގެން ހަވީރު 5:00 އަށް އަދި ރޭގަނޑު 8:00 އިން ދަންވަރު 12:00 އަށް މާލޭގެ ގޭބިސީތަކުން ކުނިނަގާނެކަމަށް ވެމްކޯއިން ބުނެއެވެ.
ވެމްކޯގެ ބަޔާން ނިންމާލަމުން ބުނެފައިވަނީ ކުނި ނެގުމުގައި ކަސްޓަމަރުންނަށް ދިމާވާ ދަތިތަކަށް މައާފަށް އެދޭކަމަށާއި ކުނި ނެގުމުގެ ޚިދުމަތާ ގުޅޭ ގޮތުން އެއްވެސް ޝަކުވާއެއް އޮތް ނަމަ ހޮޓްލައިން، 1666 އަށް ގުޅުމަށެވެ.