ދެކޮޅު ހެދިއަސް، މަރުގެ ހުކުމް ތަންފީޒް ކުރާނަން: ރައީސް ޔާމީން
ގާނޫނު ތަންފީޒް ނުކޮށްފިނަމަ އަންނަން އިތް ޖީލުތަކުން މަލާމާތް ކުރާނެ
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް، ސިފައިންގެ 125 ވަނަ އަހަރީ ދުވަހުގެ ރަސްމިއްޔާތުގައި
ދިވެހި ރާއްޖޭގެ ސިޔާސީ ލީޑަރުން މަރުގެ ހުކުމް ތަންފީޒް ކުރުމަށް ދެކޮޅު ހެދި ނަމަވެސް މަރުގެ ހުކުމް ތަންފީޒް ކުރާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުﷲ ގައްޔޫމް ވިދާޅުވެއްޖެ އެވެ.
ސިފައިންގެ 125 ވަނަ އަހަރީ ދުވަސް ފާހަގަކުރުމަށް އާދީއްތަ ދުވަހުގެރޭ ކަޅުތުއްކަލާ ކޮށީގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ ގާނޫނު ދެމެހެއްޓުމަކީ މުޅި ދައުލަތަށާއި، ފަރުދުންގެ މައްސަލަހަތަށް އެންމެ އިންސާފްވެރި ގޮތް ކަމަށެވެ. ބޭރުގެ ނުފޫޒުތަކުން ގާނޫނު ތަންފީޒް ކުރުމަށް ހުރަސް އަޅާނަމަ އަންނަން އޮތް ޖީލުތަކުން ރާއްޖޭގެ މިނިވަންކަމާއި އިސްތިގްލާލާއި މެދު ސުވާލު އުފައްދާނެ ކަމަށް އިޝާރަތް ކުރައްވާ ރައީސް ޔާމީން ވިދާޅުވީ އެމަނިކުފާނުގެ ސަރުކާރުގައި މަރުގެ ހުކުމް ތަންފީޒްކުރައްވާނެ ކަމަށެވެ.
"މިއަދުވެސް ރައީސެއްގެ ހައިސިއްޔަތުން އަޅުގަނޑު ބުނަން އޮތީ ކީއްކޭތޯ، މިއަދުވެސް ރައީސެއްގެ ހައިސިއްޔަތުން އަޅުގަނޑު ތަކުރާރުކޮށް ރީޓްރޭޓް ކުރަން، ތަކުރާރުކޮށް ދަންނަވަން އޮތީ މަރުގެ ހުކުމް ތަންފީޒް ކުރާނަމޭ" އަނިޔާވެރިގޮތަކަށް މަރާލާފައިވާ ޔާމީން ރަޝީދުގެ މަރާ ގުޅޭގޮތުން ވާހަކަ ދައްކަވަމުން ރައީސް ވިދާޅުވިއެވެ.
ރައީސް ޔާމީން ވިދާޅުވީ ވަކި އާއިލާއަކަށް ނުވަތަ ވަކި ނަސަބުތަކަށް ބަލާފައި، ގާނޫނު ތަންފީޒް ކުރަންވެއްޖެނަމަ މުޖުތަމައުގައި ހަމަޖެހުމެއް ނޯންނާނެ ކަމަށެވެ. އެހެންނަމަވެސް ގައުމަށް ގިނަ ދަވަހު ޙިދުމަތް ކުރައްވާފައިވާ ބޭފުޅުންނާއި ސިޔާސީ ލީޑަރުން މަރުގެ ހުކުމް ތަންފީޒް ކުރުމަށް ދެކޮޅުހަދާ ކަމަށް ރައީސް ޔާމީން ވިދާޅުވިއެވެ.
"ކިތެއް ސިޔާސީ ލީޑަރުންތޯ، ގައުމަށް ހިދުމަތް ކުރެއްވި އެންމެ އިސްސަފުގައި ތިއްބެވި ކިތެއް ބޭފުޅުންތޯ މި ކަމާއި ދެކޮޅު ހައްދަވާފައި ވަނީ ފާޅުގައި. އެހެންވީމަ އަޅުގަނޑުމެންނަން އިޙްމާލުކޮށްލެވިއޮތް އަޙްލާގުގެ ތެރެއިން، އަޅުގަނޑުމެންނަން އިޙްމާލުކޮށްލެވި އޮތް އިޖްތިމާއީ ފޭރާން ވީރާނާ ވެމުން ދިޔައިރު، އިޙްމާލުކޮށްލެވިފައި ހުރި ކަންކަމުން އަޅުގަނޑުމެންނާއި ހަމައަށް ވާސިލްވެފައި ހުރި ކަންކަމުން، ހިތްދަތި ނޭދެވޭ ނަތީޖާތަށް އަޅުގަނޑުމެން މިއަދު ކުރި މަތިވަމުން މިދަނީ" ރައީސް ޔާމީން ވިދާޅުވިއެވެ.
ޔާމީންގެ ރަޝީދުގެ މަރާއި ގުޅޭގޮތުން ވާހަކަ ދައްކަވަމުން ރައީސް ޔާމީން ވިދާޅުވީ ، މިއަދު މަރުގެ ހުކުމް ތަންފީޒް ކުރުމުގެ މުހިންމުކަން އިނގިގެން ދާ ކަމެއް ކަމަށެވެ.
މަރުގެ ހުކުމް ތަންފީޒްކުރުމަށް މާފުށީ ޖަލުގައި އިމާރާތް ކުރުމަށް ނިންމާފައިވާ ޗެންބަރު މިހާރު ނިމިފައިވާ ކަމަށް ވެސް ރައީސް ވިދާޅުވިއެވެ. މަރުގެ ހުކުމް ތަންފީޒްކުރުމަށް ވާންޖެހޭ އެންމެހާ ތައްޔާރީތަށް ކުރިއަށް އޮތް ދެތިން މަސްދުވަސްތެރޭގައި ނިންމަވާލައްވާނެކަމުގެ ޔަޤީންކަން ހޯމް މިނިސްޓަރު އަޒްލީން އަހުމަދު ދެއްވާފައިވާ ކަމަށްވެސް ރައީސް ޔާމީން ވިދާޅުވިއެވެ. އެގޮތުން މުޖުރިމުންނާއި ހަމައަށް މި ސަރުކާރުން ގާނޫނު އަރާ ހަމަކުރާނެ ކަމަށާއި މަރުގެ މައްސަލަތަކުގައި ގާތިލުންނާއި ހަމައަށް ވާސިލްވެއްޖެނަމަ، އެމީހުންނަން ހައްގު ޖަޒާ ލިބިގެންދާނެ ކަމަށް ވެސް ރައީސް ވިދާޅުވިއެވެ.
