ކުރިއަށް އޮތް ރިޔާސީ އިންތިޚާބުގައި އެމްޑީޕީން ނެރޭނެ ކެނޑިޑޭޓަކަށް ވެވަޑައިގަތުމަށްޓަކައި ކުރައްވާ ކެމްޕެއިންގެ ތެރެއިން ރައީސް ނަޝީދުގެ ފަރާތްޕުޅުން މާހެފުމެއް ދެއްވައިފިއެވެ.
ހޯމަ ދުވަހުގެރޭ އެމްޑީޕީ ހަރުގޭގައި ބޭއްވި މި މާހެފުން އެމަނިކުފާނުގެ ފަރާތްޕުޅުން އިންތިޒާމް ކުރީ އެމްޑީޕީގެ އަންހެނުންގެ ގޮފީގެ މެންބަރުންނާއި ޕާޓީގެ ޢާއްމު މެންބަރުންނެވެ.
ހޯމަ ދުވަހުގެރޭ 9:30 ގައި ބޭއްވި މިމާހެފުމުގައި ރައީސް ނަޝީދު ވަނީ ސްކައިޕް މެދުވެރިކޮށް މާހެފުމުގައި ބައިވެރިވި ފަރާތްތަކާ ވާހަކަފުޅު ދައްކަވާފައެވެ. އެމަނިކުފާނު ވިދާޅުވީ އެމަނިކުފާނުގެ ނަންފުޅު ވޯޓު ކަރުދާސްކޮޅުގައި ބޭއްވުމަކީ ޢާއްމު މެންބަރުންގެ ކަމެއް ކަމަށެވެ. އަދި ވޯޓު ކަރުދާސްކޮޅުގައި އެމަނިކުފާނުގެ ނަންފުޅު އޮންނާނެ ކަމާމެދު ކުޑަކޮށްވެސް ޝައްކު ނުކުރައްވާ ކަމަށް ރައީސް ނަޝީދު ވިދާޅުވިއެވެ.
މި މާހެފުމުގައި ރައީސް ނަޝީދުގެ ކެމްޕެއިން މެނޭޖަރ މުހައްމަދު އަސްލަމް ވަނީ ކެމްޕެއިންގައި ކުރިއަށް ރޭވިފައި ހުރި ބައެއް ކަމުގެ މައުލޫމާތު ހިއްސާ ކުރައްވާފައެވެ. އެގޮތުން މާލޭގެ ގޭގޭގެ އާއިލާތަކާ ސްކައިޕް މެދުވެރިކޮށް ރައީސް ނަޝީދު ބައްދަލު ކުރައްވާ ވާހަކަފުޅު ދައްކަވާނެ ކަމަށް އަސްލަމް ވިދާޅުވިއެވެ.
މި މާހެފުމުގައި އެމްޑީޕީގެ އިސްބައެއް މެމްބަރުންނާއި ޤައުމީ މަޖިލީހާއި ރައްޔިތުންގެ މަޖިލީހުގެ ބައެއް މެންބަރުން ބައިވެރިވެ ވަޑައިގަތެވެ.
