ވަޒީފާއާއި ބެހޭ ޓްރައިބިއުނަލްގެ ރައީސްއަކަށް ޝިފާޢު އައްޔަނުކޮށްފި
ޓްރައިބިއުނަލްގައި މިވަގުތު ތިއްބެވީ 5 މެންބަރުން
ވަޒީފާއާބެހޭ ޓްރައިބިއުނަލުގެ މެންބަރުކަމާއި، ރައީސްކަމުގެ މަޤާމަށް އަލަށް އައްޔަނު ކުރެއްވި ގދ. ފަރެސްމާތޮޑާ، ރޭއަލިވާގެ އަޙްމަދު ޝިފާޢު
ވަޒީފާއާބެހޭ ޓްރައިބިއުނަލުގެ މެންބަރުކަމާއި، ރައީސްކަމުގެ މަޤާމަށް، އައު ބޭފުޅަކު އައްޔަން ކުރައްވައިފިއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، އެ ޓްރައިބިއުނަލުގެ މެންބަރުކަމާއި، ރައީސްކަމުގެ މަޤާމަށް އައްޔަނު ކުރައްވާފައިވަނީ ގދ. ފަރެސްމާތޮޑާ، ރޭއަލިވާގެ އަޙްމަދު ޝިފާޢުއެވެ.
ވަޒީފާއާބެހޭ ޓްރައިބިއުނަލްގެ މެންބަރުކަމާއި، ރައީސް ކަމަށް ޝަފީއު އައްޔަން ކުރުމުގެ ތެރެއިން
ރައީސް އޮފީހުން ބުނީ ޤާނޫނު ނަންބަރު 2008/2 (ވަޒީފާއާބެހޭ ޤާނޫނު) އަށް 1 ވަނަ އިޞްލާހު ގެނައުމުގެ ޤާނޫނުގެ 86 ވަނަ މާއްދާގެ (ހ) ގެ ދަށުން، ވަޒީފާއާބެހޭ ޓްރައިބިއުނަލަށް ޢައްޔަނުކުރާ ފުލްޓައިމް މެންބަރެއްގެ ގޮތުގައާއި، މި ޤާނޫނުގެ 86 މާއްދާގެ (ބ) ގެ 1 ވަނަ ނަންބަރުގައިވާ ގޮތުގެ މަތިން ވަޒީފާއާބެހޭ ޓްރައިބިއުނަލުގެ ރައީސްކަމަށް އަޙްމަދު ޝިފާޢު ޢައްޔަން ކުރެއްވީ މޭމަހުގެ 14 ވީ ހޯމަ ދުވަހު ކަމަށެވެ.
ވަޒީފާއާބެހޭ ޓްރައިބިއުނަލްއަކީ ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 84 ވަނަ މާއްދާގެ (ހ) ގެ ދަށުން 2008 ވަނައަހަރުގެ ޑިސެމްބަރުމަހު 29 ވަނަ ދުވަހު އުފައްދަވާފައިވާ މުއައްސަސާއެކެވެ.
ވަޒީފާއާބެހޭ ޤާނޫނުގެ 86 ވަނަ މާއްދާގެ (ހ) ގައި ވަޒީފާއާއި ބެހޭ ޓްރައިބިއުނަލް އެކުލެވިގެން ވަނީ 7 މެންބަރުންގެ މައްޗަށް ކަމަށް ވަނީ ބަޔާންކޮށްފައެވެ. ނަމަވެސް، އަލަށް އެ ޓްރައިބިއުނަލްގެ މެންބަރުކަމާއި ރައީސް ކަމަށް އައްޔަން ކުރެވުނު ޝަފީޢު އާއި އެކު ޓަރައިބިއުނަލްގައި މިވަގުތު ތިއްބެވީ 5 މެންބަރުންނެވެ.
(ކ-ވ) އައިޝަތު ފިޒްލީން، ޝަމްޢާ އިބްރާހިމް، މަރިޔަމް މުނާ، މަރިޔަމް ރިޝްފާ
ޝަފީޢުގެ އިތުރުން މިވަގުތު އެ ޓްރައިބިއުނަލްގައި ހިމެނިވަޑައިގަންނަވަނީ ޓްރައިބިއުނަލްގެ ނައިބު ރައީސާ އައިޝަތު ފިޒްލީން އާއި ޓްރައިބިއުނަލްގެ މެންބަރ މަރިޔަމް ޝަމްޢާ އިބްރާހިމްގެ އިތުރުން ޓްރައިބިއުނަލްގެ މެންބަރ މަރިޔަމް މުނާ އާއި ޓްރައިބިއުނަލްގެ މެންބަރ މަރިޔަމް ރިޝްފާއެވެ.
