ބޭވަފާތެރިވި ޓްރިސްޓަންއަށް ކްލޯއީ މާފު ކުރީތަ؟

މަޝްހޫރު ރިއަލިޓީ ތަރި، ކްލޯއީ ކާޑޭޝިއަން ވިހަން ދުވަސް ތަކަކަށް ވެފައިވަނިކޮށް އޭނާއަށް ބޭވަފާތެރިވިކަމަށް ރިޕޯޓްކުރެވިފައިވާ ޓްރިސްޓަން ތޮމްޕްސަންއަށް އޭނާ މާފުކޮށްފައިވާ ކަމުގެ ހެކިތަކެއް ފެންނަން ފަށައިފިއެވެ.

އޭޕްރިލް 12 ގައި އަންހެން ދަރިފުޅަކަށް ދެ މީހުން މަރުހަބާ ކިޔާފައިވާ އިރު، އޭގެ ދުވަސްތަކެއް ކުރިން ޓްރިސްޓަން އެހެން އަންހެނުންތަކަކާ އެކު ފެންނަ ވީޑިއޯތަކެއް ވަނީ އާންމުވެފައެވެ. އަދި ވިހެއުމަށް ފަހު ކްލޯއީ ވަނީ ވަރަށް ބޮޑަށް އާންމުންގެ ލޯ މަތިން ގެއްލިފައެވެ.

ސޯޝަލް މީޑިއާއިންވެސް ކްލޯއީ ގެއްލިފައިވާ އިރު، އޭނާ ވިހޭ ފަހުން އާންމުންނަށް ފުރަތަމަަ ފެނިފައިވަނީ މޭ މަހުގެ 4 ވަނަ ދުވަހެވެ. އެއީ ލޯބިވެރިޔާ ޓްރިސްޓަންއާ އެކު ރެސްޓޯރަންޓަކުންނެވެ. އެއަށް ފަހުން ދެ މީހުން އެކުގައި އެކި ތަންތަނުން ވަނީ ފެނިފައެވެ.

ކްލޯއީ ބޭރަށް ނިކުންނަން ފެށުމާ އެކު ޕަޕަރާޒީ ފޮޓޯތައް އާންމުވުމުން ކްލޯއީ ވަނީ އޭނާގެ އެޕްގައި އެކަމާ ގުޅޭ ގޮތުން ވާހަކަ ދައްކާފައެވެ. އެގޮތުން، ފިޓްނަސްއަށް ވަރަށް ބޮޑެ އަހައްމިއްޔަތުކަން ދޭ ކްލޯއީ ބުނީ، ވިހެއުމަށް ފަހު ކަސްރަތު ކުރުމުގެ ހުއްދަ ޑޮކްޓަރު ވަރަށް ފަހުން ދީފައިވާކަމަށެވެ.

ދެ މީހުންގެ ގުޅުމާ ގުޅޭ ގޮތުން އެކި ކަހަލަ ރިޕޯޓްތައް ކުރެވިފައިވާ އިރު، ޓްރިސްޓަން ބޭވަފާތެރިވެފައިވާ ކަމުގެ ރިޕޯޓްތަކާ އެކު ކްލޯއީގެ ގިނަ ސަޕޯޓަރުން ވަނީ ޓްރިސްޓަންއަށް ފާޑު ކިޔާފަވެ. ކާޑޭޝިއަން އާއިލާގެ ބައެއް ފަރާތްތަކުން މިކަމާ ގުޅޭ ގޮތުން އިންޓަވިއު ތަކުގައި ވާހަކަ ދައްކާފައިވާ އިރު، ކްލޯއީއާއި ޓްރިސްޓަންގެ ގުޅުމާ ގޮތުން އެއްވެސް ފަރާތެއް ކޮމެންޓް ކޮށްފައެއް ނުވެއެވެ.

'ދަ އެލެން ޝޯވ'އަށް ދިން އިންޓަވިއުއެއްގައި ކްލޯއީގެ ދައްތަ ކިމް ބުނީ، 'ދަރިއެއް ހިމެނޭ ހިސާބުން ކޮންމެ ކަމެއް ކޮންމެ މީހެއް ކުރިއަސް އެއްޗެހި ނުކިޔަން ނިންމައިފިން' ކަމަށާއި ސަބަބަކީ ބޮޑުވުމަށް ފަހު އެ ކުއްޖާއަށް އެ ވާހަކަތައް އަޑު އިވިދާނެތީ ކަމަށެވެ.