ކްލޯއީ ކާޑޭޝިއަން ދަރުފުޅަށް ކީ 'ޓްރޫ ތޮމްޕްސަން'

ކްލޯއީ ކާޑޭޝިއަންއާއި ޓްރިސްޓަން ތޮންމްޕްސަންގެ ދަރިފުޅަށް 'ޓްރޫ' ތޮމްޕްސަން ކިޔަން ނިންމައިފިއެވެ.

އެމެރިކާގެ މަޝްހޫރު ރިއަލިޓީ ތަރި ކްލޯއީއާއި ކްލީވްލޭންޑް ކެވެލިއަރސްއަށް ބާސްކެޓް ކުޅޭ ޓްރިސްޓަން އަންހެން ކުއްޖަކަށް މަރްހަަބާ ކިޔާފައިވަނީ އޭޕްރިލް 12ގައެވެ.

ކްލޯއީ ވިހޭ ގަޑީގައި ޓްރޫގެ ބައްޕަގެ އިތުރުން އޭނާގެ މަޝްހޫރު އާއިލާގެ މެމްބަރުން ވެސް ތިއްބެވެ. އޭގެ ތެރޭގައި މަންމަ ކްރިސް ޖެނަރއާއި ދައްތަމެން ކޯޓްނީއާއި ކިމް ހިމެނެއެވެ.

ދަރިފުޅަށް ޓްރޫ ކީކަން ކްލޯއީ ހާމަކޮށްފައިވަނީ ސޯޝަލް މީޑިއާ މެދުވެރިކޮށެވެ. ޓްރޫގެ މާނައަކީ "ތެދު"އެވެ. ދަރިންނަށް މިފަދަ ތަފާތު ނަން ކިޔުމަކީ ހޮލީވުޑްގައި މިހާރު އާންމު ކަމެކެވެ. ކްލޯއީގެ އާއިލާ ތެރޭގައި ވެސް މެއެވެ. އޭނާގެ ދައްތަ ކިމްގެ ކުދިންނަށް ނޯތު، ސެއިންޓް އަދި ޝިކާގޯ ކިޔާފައިވާއިރު، ކޮއްކޮމެން ރޮބްއާއި ކައިލީ ޖެނަރގެ ކުދިންނަށް ކިޔާފައިވަނީ ޑްރީމް އާއި ސްޓޯމީއެވެ.

ކްލޯއީ ވިހޭ ފަހުން ކުރި ފުރަތަމަ އިންސްޓަގްރާމް ޕޯސްޓްގައި ބުނި ގޮތުގައި ޓްރޫ ވަނީ އެމީހުންގެ 'ހިތްތައް އަތުލާފަ'އެވެ. އަދި 'މަންމައާއި ބައްޕަ' ވަރަށް ލޯބިވާ ކަމަށް ވެސް އޭނާ ބުނެފައިވެއެވެ.

ކްލޯއީ ވިހެއުމުގެ އެއް ދުވަސް ކުރިން ޓްރިސްޓަންގެ 'ވިޔާނުދާ' ވާހަކަތަކެއް މީޑިއާ މެދުވެރިކޮށް ފަޅާ އަރާފައިވާއިރު، އޭނާގެ މި ޕޯސްޓުން ގިނަ ބައެއް ގަބޫލު ކުރަނީ ކްލޯއީ ޓްރިސްޓަންއަށް މާފު ކުރަން ނިންމާފައިވާ ކަމަށެވެ. ނަމަވެސް ކްލޯއީ، ޓްރިސްޓަން ނުވަތަ އާއިލާއިން މިކަމާ ގުޅިގެން އެއްވެސް އެއްޗެއް ބުނެފައެއް ނުވެއެވެ.

މިއީ ކްލޯއީގެ ފުރަތަމަ އަދި ޓްރިސްޓަންގެ ދެވަނަ ދަރިފުޅެވެ. މި ދެ މީހުން ރަށްޓެހިވި އިރު ޓްރިސްޓަންގެ ކުރީގެ ލޯބިވެރިޔާ އިނީ ދެ މީހުންގެ ދަރިއަކަށް ބަލިވެއެވެ.

އިތުރަށް ކިޔާލަން: ކްލޯއީ ކާޑޭޝިއަން ވިހޭއިރު ދިރިއުޅުން އެއްކޮށް ހަލާކުވެފައި؛ ވެގެންއުޅޭ ގޮތް 'ކީޕިންގ އަޕް'ގެ އަންނަ ސީޒަންގައި އިނގޭނޭ