އިރާނުގެ ނިއުކްލިއާ އެއްބަސްވުމުން އެމެރިކާ އިން ވަކިވާނެ ކަމަށް އިއުލާންކުރުމާ ގުޅިގެން، އިރާނުގެ ހިތްހަމަ ނުޖެހުން އެމެރިކާ އަށް ބޮޑުވެފައިވާއިރު، ބުދަ ދުވަހު އިރާނުގެ ގާނޫނުހަދާ މަޖިލީހުގައި އެމެރިކާގެ ދިދަ އަންދާ އެމެރިކާ އަށް ނުރުހުމުގެ ބަސްތައް އަމާޒުކޮށްފިއެވެ. 

ބުދަ ދުވަހު އިރާނުގެ ގާނޫނުހަދާ މަޖިލީހުގައި ކަރުދާހުން ހަދާފައިވާ އިރާނުގެ ދިދައިގައި ގާނޫނު ހަދާ މަޖިލީހުގެ މެމްބަރުން އަލިފާން ރޯކޮށް އަންދާލިއިރު އިރާނުގެ އޮފިޝަލުން ބުނަމުން ގެންދަނީ ޔޫރަޕްގެ ގައުމުތަކުން އިރާނުގެ ނިއުކްލިއާ އެއްބަސްވުން ހިމާޔަތް ކުރުން މަތީ ދެމިތިބޭނެ ކަމަށެވެ.  

އިރާނުގެ ގާނޫނު ހަދާ މަޖިލީހުގައި އެމެރިކާގެ ދިދަ އަންދާލިއިރު އަލިފާން ރޯވެފައިވާ ދިދަ ހިފަހައްޓައިގެން ހުރި ގާނޫނު ހަދާ މަޖިލީހުގެ މެމްބަރަކީ ޝީއީންގެ ދީނީ އިލްމުވެރިއެކެވެ. 

އެމެރިކާގެ ދިދަ އިރާނުގައި އެންދުމާއި އަދި އެމެރިކާ އަށް ފާޑުކިޔުމަކީ އިރާނުގެ ސިޔާސީ މައިދާނުގައި އާންމު ކަމެއް ނަމަވެސް، މިއީ ގާނޫނު ހަދާ މަޖިލީހުގެ ތެރޭގައި އެއްޗެއް އަންދާލި ފުރަތަމަ ފަހަރެވެ. 

އީރާނުގެ ނިއުކްލިއާ ޕްރޮގްރާމާއި ގުޅޭގޮތުން އެގައުމާއި އެކު ވެފައިވާ އެއްބަސްވުމުން ވަކިވުމަށް އެމެރިކާއިން ނިންމިއިރު، އަންގާރަ ދުވަހު މިކަން އިޢުލާނުކުރައްވަމުން، ރައީސް ޓްރަމްޕް ވަނީ އިރާނާއި، އިރާނަށް އެހީވާ ހުރިހާ ގައުމަކާއި ދެކޮޅަށް ދަތިކުރުމުގެ ފިޔަވަޅު އެޅުމަށް ވެސް ނިންމަވާފައެވެ. 

2015 ވަނަ ވަނައަހަރު އެމެރިކާގެ ރައީސް ބަރަކް އޮބާމާގެ ވެރިކަމުގައި އިރާނާއެކު ގާއިމު ކުރެވުނު ނިއުކްލިއާ އެއްބަސްވުމަށް ރައީސް ޑޮނަލްޑް ޓްރަމްޕް މީގެ ކުރިން ގެންދެވީ ވަރަށް ފާޑުވިދާޅުވަމުން ކަމަށްވާއިރު، މި އެއްބަސްވުމުގެ ދަށުން އިރާނުންގެ ނިއުކްލިއާ ހަރަކާތްތައް ވަނީ ލިމިޓުކުރެވިފައެވެ. އަދި އޭގެ ބަދަލުގައި އިރާނަށް ވަނީ އެގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުޔެއް ލިބިފައެވެ. 

ރާނާއި ދުނިޔޭގެ ބައެއް ބާރުތަކާ ދެމެދު ވެވުނު ނިއުކްލިއާ އެއްބަސްވުން ނެތިނުކޮށްލުމަށް ނުވަތަ އެ އެއްބަސްވުުމުގައި ދެތިބުމަށް އިނގިރޭސި ޚާރިޖީ ވަޒީރު ބޮރިސް ޖޮންސަން އެމެރިކާގެ ރައީސް ޑޮނަލްޑް ޓްރަމްޕް އަށް ދާދިފަހުން ވަނީ ގޮވާލައްވާފައެވެ. 2015 ގައި އިރާނާއެކު ވެވުނު އެއްބަސްވުމުގައި ހިމެނޭ ގައުމުތަކަކީ އެމެރިކާ، ޔޫކޭ، ރަޝިއާ، ފްރާންސް، ޗައިނާ އަދި ޖަރުމަނެވެ. އިރާނުގެ ނިއުކްލިއާ އެއްބަސްވުމާމެދު ފްރާންސުން ބުނެފައި ވަނީ ޔޫކޭ އާއި ޖަރުމަނާއި އަދި ފްރާންްސްއިން ދެމިތިބޭނެ ކަަމަށެވެ.