އެޓްލެޓިކޯ މެޑްރިޑަށް ކުޅެމުން އަންނަ ފްރާންސްގެ ފޯވާޑް އެންޓޮއިން ގްރީޒްމަންއާއެކު މަޝްވަރާތައް ކުރިޔަށްގެންދިޔަ ކަމަށް ބާސެލޯނާއިން އެއްބަސްވެއްޖެއެވެ.

މި ސީޒަނަށްފަހު ގްރީޒްމަން އެޓްލެޓިކޯ ދޫކޮށްލާނެ ކަމަށް ބެލޭވޭއިރު އޭނާ އަންނަ ސީޒަނުގައި ފެނުން އެކަށީގެންވަނީ ބާސާއިން ކަމަށް ގިނަ ބަޔަކު އަންނަނީ ބުނަމުންނެވެ.

ބާސާގެ ރައީސް ޖޯސެފް މާރިއާ ބާޓޮމޯ ވިދާޅުވީ މިދިޔަ އަހަރުގެ އޮކްޓޯބަރު މަހުގެ ތެރޭގައި ގްރީޒްމަންއާ ދިމާވި ކަމަށާއި އޭނާގެ އޭޖެންޓާއެކު ވެސް މަޝްވަރާތައް ކުރިޔަށް ގެންދިޔަ ކަމަށެވެ. އޭނާ ވިދާޅުވީ އެޓްލެޓިކޯގެ ރައީސް އެންރިކޭ ސެރޭޒޯއާއެކު ވެސް ގާތް ގުޅުމެއް އޮންނަ ކަމަށާއި އެ ކްލަބާއި ބާސާއާ ދެމެދު ވެސް އޮންނަނީ ރަނގަޅު ގުޅުމެއް ކަމަށެވެ.

ސްޕެއިންގެ ބައެއް ނޫސްތަކުން ވަނީ އޭނާ ބާސާއަށް ބަދަލުވުމަށް އެ ޓީމާއެކު އެއްބަސްވުމަކަށް އައިސްފައިވާ ކަމަށް ބުނެ ހަބަރު ފަތުރާފައެވެ. އެގޮތުން ބައެއް ރިޕޯޓުތަކުގައި ވާގޮތުން އާޑާ ޓުރާން އެ ޓީމު ދޫކޮށްލުމާއެކު ހުސްވެފައިވާ 7 ނަމްބަރު ޖާޒީ އެ ޓީމާއި އަލަށް ގުޅުނު ފިލިޕޭ ކުޓީނިއޯއަށް ދީފައި ނުވަނީ ގްރީޒްމަންއަށް އެ ނަމްބަރު ދިނުމުގެ ގޮތުން ކަމަށެވެ.

އެޓްލެޓިކޯއާ އެކު ގްރީޒްމަން ހަދާފައިވާ ކޮންޓްރެކްޓްގެ މުއްދަތު ހަމަވަނީ 2022 ވަނަ އަހަރު ކަމަށްވާއިރު އޭނާގެ ރިލީޒް ފީއެއްގެ ގޮތުގައި ކޮންޓްރެކްޓްގައި ކަނޑައަޅާފައި ވަނީ 200 މިލިއަން ޔޫރޯއެވެ. އެހެން ނަމަވެސް އަންނަ އަހަރުގެ ޖުލައި މަހަށް ފަހު މި އަދަދު 100 މިލިއަން ޔޫރޯއަށް ދަށްވެގެން ދާނެއެވެ.

އެޓްލެޓިކޯ މެޑްރިޑުގައި ހުރެ މުބާރާތްތައް ކާމިޔާބު ނުކުރެވޭތީ ގްރީޒްމަން ހިތްހަމަނުޖެހުން ފާޅުކޮށްފައިވެއެވެ. ބާސާގެ އިތުރުން އިނގިރޭސިވިލާތުގެ މެންޗެސްޓާ ޔުނައިޓެޑުން ވެސް އަންނަނީ އުމުރުން 26 އަހަރުގެ ފޯވާޑުގެ ސޮއި ހޯދުމުގެ މަސައްކަތް ކުރަމުންނެވެ. މިކަމާއި ގުޅިގެން އެ ޓީމުން ބުނެފައިވަނީ ގްރީޒްމަންގެ އަގަކީ 200 މިލިއަން ޔޫރޯ ކަމަށެވެ.

ބާސާގެ ރައީސް ގްރީޒްމަންއާއެކު މަޝްވަރާތަކެއް ކުރިޔަށް ގެންދިޔަ ކަމަށް އެއްބަސްވެފައިވާއިރު މިދިޔަ ޑިސެމްބަރު މަހުގެ ތެރޭގައި އެޓްލެޓިކޯ އިން ވަނީ އެ ކްލަބުގެ ހުއްދަ ހޯދުމަކާއި ނުލައި އެ ކްލަބުގެ ވާދަވެރި ބާސެލޯނާއިން ގްރީޒްމަންއާ މަޝްވަރާކުރި ކަމަށް ބުނެ އެ މައްސަލަ ފީފާއަށް ހުށަހަޅާފައެވެ. ހަމައެހެންމެ ބާސާގެ ޑިރެކްޓަރު ވެސް ވަނީ މިފަދަ ކަމެއް ހިނގާފައިވާ ކަމުގެ އިޝާރާތެއް ދީފައެވެ. ފީފާއިން ވެސް ވަނީ އެޓްލެޓިކޯއިން މިފަދަ މައްސަލައެއް ހުށަހެޅިކަން ކަށަވަރު ކޮށްދީފައެވެ.

އެހެން ނަމަވެސް އެޓްލެޓިކޯގެ ކޯޗު ޑިއޭގޯ ސިމިއޯނޭ ބުނެފައިވަނީ ގްރީޒްމަން އެޓްލެޓިކޯ ދޫނުކޮށްލާނެ ކަމަށެވެ. ސިމިއޯނޭ ބުނެފައިވަނީ އޭނާއަކީ ތަފާތު މޮޅު ކުޅުމެއް ދައްކާ ކުޅުންތެރިޔެއް ކަމަށާއި އޭނާ އާއި ސަޕޯޓަރުންނާ ދެމެދު ވެސް ވަރަށް ރަނގަޅު ގުޅުމެއް އެބައޮތް ކަމަށެވެ. އޭނާ ބުނީ ހަގީގަތަކީ މިހާރު އޭނާއަކީ އެޓްލެޓިކޯއަށް މުހިންމު ކުޅުންތެރިޔެއް ކަމަށާއި މުސްތަގުބަލުގައި ވާނެ ގޮތެއް އެއްވެސް ވަރަކަށް ނޭނގޭ ކަމަށެވެ. މީގެކުރިން ދިން އިންޓަވިއުއެއްގައި ސިމިއޯނޭ ބުނެފައިވަނީ ގްރީޒްމަން އެހެން ޓީމަކަށް ބަދަލުވާން ބޭނުންވާނަމަ އެކަމަށް ހުރަސް ނާޅާނެ ކަމަށެވެ.

ފްރާންސްގެ ގައުމީ ޓީމުގައި ވެސް މުހިންމު ދައުރެއް އަދާކުރަމުން އަންނަ ފޯވާޑް ރެއާލް ސޮސިއެޑާޑް ދޫކޮށް އެޓްލެޓިކޯއަށް ބަދަލުވެފައި ވަނީ 2014 ވަނަ އަހަރުއެވެ.