އީގަލްސް ކުރިޔަށްވުރެ ވަރުގަދަ ކަމަށާއި، މެޗުން މޮޅުވުން މުހިންމު ކަމަށް މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު ސެކުލޮވްސްކީ ބުނެފި އެވެ.

މެޗުގެ ކުރިން ނޫސްވެރިންނަށް މައުލޫމާތު ދެމުން ސެކުލޮވްސްކީ ބުނީ އީގަލްސްގެ ފޯވާޑް އަހުމަދު ނާޝިދު (ނައްޓޭ) އާއި މިސްރުގެ ޑިފެންޑަރު އަދި ރިޒްވާން އަށް ވެސް މާޒިޔާއާ ދެކޮޅަށް ކުޅެވޭ ކަމަށާއި، މިއީ މާޒިޔާ އިން ސަމާލުވާންޖެހޭ ކަމެއް ކަމަށެވެ.

އެގޮތުން ސެކުލޮވްސްކީ ބުނީ އީގަލްސް ކުރިޔަށް ވުރެ މިހާރު ވަރުގަދަވެފައިވާ ކަމަށާއި، މާޒިޔާ ކުޅުންތެރިން ނިކުންނާނީ އެންމެ ރަނގަޅު ކުޅުން ދެއްކުމަށް ފަހު މެޗު ކާމިޔާބުކުރަން ކަމަށެވެ. މީގެ އިތުރުން އޭނާ ބުނީ އެހެން މެޗުތަކާ މެދު ނުވިސްނާ ކަމަށާއި، ފުރަތަމަ ވިސްނުން ހުރީ އީގަލްސް މެޗަށް ކަމަށެވެ.

މި ސީޒަނުގައި އަނިޔާގެ މައްސަލަތައް ދިމާވަމުން އަންނަ މާޒިޔާގެ ކެޕްޓަން އަސަދުﷲ އަބްދުﷲ (އަސައްކޮ) އާ ބެހޭގޮތުން ސެކުލޮވްސްކީ ބުނީ އޭއެފްސީ ކަޕްގައި ބެންގަލޫރާ ދެކޮޅަށް މާޒިޔާ ކުޅުނު މެޗުގައި ބެންގަލޫރުގެ ދެ ކުޅުންތެރިޔެއްގެ ފަރާތުން އަސައްކޮ އަށް ހަމަލާތަކެއް ލިބުނު ކަމަށާއި، އެހެންނަމަވެސް އޭނާ އެއަށްފަހު ގައުމީ ޓީމާއެކު ވަގުތުތަކެއް ހޭދަކޮށް މެޗެއް ވެސް ކުޅެފައިވާ ކަމަށެވެ. އެގޮތުން ސެކުލޮވްސްކީ ބުނީ އޭނާ ދެކޭގޮތުގައި އަސައްކޮ ވެސް މިހާރު ވަނީ ފިޓްވެފައެވެ.

މާޒިޔާ އަށް ބޮޑު ބްރޭކެއް ނުލިބޭކަން ފާހަގަކުރަމުން ސެކުލޮވްސްކީ ބުނީ އީގަލްސް އަށް ހަތަރު ހަފްތާއެއްހާ ދުވަހުގެ ބްރޭކެއް ލިބިފައިވާއިރު، މާޒިޔާ އަށް ލިބުނީ ތިން ހަފްތާގެ ބްރޭކެއް ކަމަށެވެ. އެހެންނަމަވެސް އޭނާ ބުނީ ގައުމީ ޓީމަށް ކްލަބުގެ 50 އިންސައްތަ ކުޅުންތެރިން ދޫކުރުމަށް ފަހު ބާކީ ތިބި ކުޅުންތެރިންނާ އެކު ކަންތައްތަކެއް ރަނގަޅުކުރުމަށް މަސައްކަތްކުރި ކަމަށެވެ.

އެގޮތުން އޭނާ ބުނީ ގައުމީ ޓީމާއެކު ދަތުރުކުރި މާޒިޔާގެ ހަތަރު ކުޅުންތެރިން މެޗުތައް ކުޅުމުން އެކަމާ ހިތްހަމަޖެހުނު ކަމަށާއި، އެހެންނަމަވެސް ބާކީ ތިބި ތިން ކުޅުންތެރިން އެއްވެސް މެޗެއް ނުކުޅެ ބެންޗުގައި ތިބެންޖެހުމުން އެކަމާ ހިތްހަމަނުޖެހޭ ކަމަށެވެ.

މީގެ އިތުރުން ސެކުލޮވްސްކީ ބުނީ ބްރޭކުގައި އެންމެ ޕޮޒިޓިވްކަމަށްވީ ސީޒަނުގައި ކައިރި ކައިރީގައި މެޗުތަކެއް ކުޅުމަށް ފަހު ކުޑަ ދުވަސްކޮޅެއް ރިކަވާވާން ލިބުން ކަމަށާއި، އެގޮތުން ކުޅުންތެރިންނަށް އާއިލާއާއެކު ވަގުތު ހޭދަކުރުމަށްވެސް ފުރުސަތު ދީފައިވާނެ ކަމަށް އޭނާ ވަނީ ބުނެފައެވެ.