ކުރިޔަށްވުރެ ޔޫވީ ރަނގަޅުވާނެ، ވެލެންސިއާ އަތުން ބޭނުމީ މޮޅުވާން: ނަޒީހު

ކުރިޔަށްވުރެ ޔުނައިޓެޑް ވިކްޓްރީ މިހާރު ރަނގަޅުވާނެ ކަމަށާއި، ވެލެންސިއާ އަތުން ބޭނުމީ މޮޅުވާން ކަމަށް ޔޫވީގެ ކޯޗު މުހައްމަދު ނަޒީހު ބުނެފި އެވެ.

މާލޭ ލީގުގައި އަންގާރަ ދުވަހު ހަވީރު ވެލެންސިއާއާ ދެކޮޅަށް ޔޫވީ ނިކުންނަ މެޗުގެ ކުރިން ނޫސްވެރިންނަށް މައުލޫމާތު ދެމުން ނަޒީހު ބުނީ، ކުރިން ޔޫވީ އަށް ކުޅުނު ބައެއް ކުޅުންތެރިން ޓީމާ ގުޅިފައިވާ ކަމަށާއި، ޓީމު ކުރިޔާ އަޅާބަލާއިރު ރަނގަޅުވާނެ ކަމަށެވެ.

މެޗާ ބެހޭގޮތުން ނަޒީހު ބުނީ ވެލެންސިއާ އޮތީ ޔޫވީ އޮތް ހާލަތުގައި ކަމަށާއި، ވިކްޓްރީއާ ދެކޮޅަށް އެޓީމު ކުޅުނު މެޗު އެންމެ މިނެޓެއްވެސް ގެއްލުވާނުލާ ބެލިކަމަ ކަމަށާއި، ވިކްޓްރީ އަށް ލިބުނު ފުރުސަތުތަކުގެ އެއްބައި ގޯލު ތެރެއަށް ފޮނުވާލި ނަމަ ޓީސީން ޔޫވީ ކޮޅަށް ޖެހިވަރަށް ލަނޑު ޖެހުނީސް ކަމަށެވެ.

މީގެއިތުރުން ނަޒީހު ބުނީ ވެލެންސިއާ އަދި ޔޫވީ ކުޅެނީ ވަރަށް އެއްގޮތް ފުޓުބޯޅައެއް ކަމަށާއި، ތަފާތު އަންނަނީ ހަމައެކަނި ޕާސިން ބައި ކަމަށެވެ. އެގޮތުން އޭނާ ބުނީ ވެލެންސިއާ އިން ކުޅެނީ ވަރަށް ޕާސިންކޮށް ކަމަށާއި، އެހެންނަމަވެސް ޔޫވީގައި ދިގު ސްޓްރައިކަރެއް ހުރުމާއެކު ޑައިރެކްޓްކޮށް ކުޅެމުން އަންނަ ކަމަށެވެ.

މާލޭ ލީގުގައި ޔޫވީ 13 މެޗު ކުޅެފައިވާއިރު، އޭގެ ތެރެއިން އެޓީމު މޮޅުވީ އެންމެ މެޗަކުންނެވެ. ބާކީ 12 މެޗުން އެޓީމު ވަނީ ބަލިވެފައެވެ. ޔޫވީ އޮތީ ތިން ޕޮއިންޓާއެކު ލަނޑުގެ ތަފާތުން ޕޮއިންޓް ތާވަލުގެ ފުލުގައެވެ.