އެމްޑީޕީ ޕްރައިމަރީ: ރައީސް ނަޝީދަށް ތާއީދު ހޯދުމަށް މަސައްކަތްކުރައްވާ ބައެއް ފަރާތްތަކާ ބައްދަލު ކުރައްވައިފި
6 މެއި 2018 | އާދީއްތަ 04:46މި ބައްދަލުވުމުގައި ރައީސް ނަޝީދު ވާހަކަފުޅު ދެއްކެވި
ކެމްޕެއިން ޕްރޮގްރާމްގެ ތެރެއިން ރައީސް ނަޝީދު ވޮލެންޓިއަރުންނާއި ބައްދަލުކުރައްވަނީ
މި އަހަރު ބާއްވާ ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ފަރާތުން ވާދަކުރައްވާނެ ކެނޑިޑޭޓަކު ހޮވުމަށް ބާއްވާ ޕްރައިމަރީގައި ވާދަކުރައްވާނެކަން އިއުލާން ކުރައްވާފައިވާ ކުރީގެ ރައީސް މުހައްމަދު ނަޝީދުގެ ކެމްޕެއިން ޕްރޮގްރާމްގެ ތެރެއިން އެމަނިކުފާނަން ތާއީދު ހޯއްދެވުމަށް މަސައްކަތްކުރާ ބައެއް އަތޮޅުތަކުގެ ވޮލިންޓިއަރުންނާއި ބައްދަލު ކުރައްވައިފިއެވެ.
އެންޑީޕީގެ ޕްރައިމަރީ މެއި މަހުގެ 30 ވަނަ ދުވަހު ބާއްވަން ނިންމާފައިވާއިރު، މެއި މަހުގެ 15 ވަނަ ދުވަހާއި ހަމައަށް ޕްރައިމަރީގައި ވާދަކުރައްވާނެ ކެނޑިޑޭޓުންނަން ކުރިމަތިލުމުގެ ފުރުޝަތު ހުޅުވާލަން ވަނީ ނިންމާފައެވެ. އެމްޑީޕީގެ ޕްރައިމަރީ ބާއްވަން އެޕާޓީގެ 162 ވަނަ ގައުމީ މަޖިލީހުގެ ޖަލްސާއިން ގަރާރެއް ފާސްކޮށްފައިވާއިރު، އެ ޕްރައިމަރީގައި ރައީސް ނަޝީދު ވާދަކުރައްވާނެކަން ވަނީ އިއުލާން ކުރައްވާފައެވެ.
ރައީސް ނަޝީދުގެ ކެމްޕެއިން ޕްރޮގްރާމްގެ ތެރެއިން ހޮނިހިރު ދުވަހުގެ ރޭ މާބުލް ކެފޭގައި ބޭއްވި ބައްދަލުވުންތަކުގައި ބައިވެރިވެފައި ވަނީ އައްޑޫ ފުވައްމުލަކު އަދި ހދ. ހއ. ށ. އަތޮޅުގައި އެމަނިކުފާންގެ ކެމްޕޭންގައި އިސްކޮށް ހަރަކާތްތެރިވާ ވޮލެންޓިއަރުންނެވެ. މި ބައްދަލުވުމުގައި ރައީސް ނަޝީދު ވަނީ ލަންކާގައި ހުންނަވައި ވީޑިއޯ ކޮންފަރެންސްގެ ޒަރިއްޔާއިން ކެމްޕެއިން ވޮލެންޓިއަރުންނާއި ވާހަކަފުޅު ދައްކަވާފައެވެ.
މި ބައްދަލުވުންތަކުގައި ރައީސް ނަޝީދުގެ ކެމްޕެއިން މެނޭޖަރު އަދި ރައްޔިތުންގެ މަޖިލީޙުގެ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވެސް ވަނީ ބައިވެރިވަޑައިގެންފައެވެ. އެހެން ނަމަވެސް މި ހަރަކާތްތަކާއި ގުޅޭގޮތުން އަސްލަމްގެ ބަހެއް ވަނީ ލިބޭ ގޮތް ނުވެފައެވެ.
ރައީސް ނަޝީދުގެ ކެމްޕެއިން މެނޭޖަރު އަސްލަމް ވޮލެންޓިއަރުންނާއި ބައްދަލުކުރަނީ
ޕްރައިމަރީގެ ފަހުގެ ތައްޔާރީތަކާއި ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން އެޕާޓީގެ ޗެއާޕާސަން ހަސަން ލަތީފް ވިދާޅުވީ ރިޔާސީ ޕްރައިމަރީގެ ކަންކަން ކުރިއަށް ގެންދިއުމަށް އެޕާޓީންގެ ގައުމީ މަޖިލީހުން 5 މެމްބަރުންގެ ކޮމެޓީއެއް މިހާރު ނަގާފައިވާ ކަމަށެވެ. އެ ކޮމެޓީ އަކީ އެޕާޓީގެ އަސާސީ ގަވައިދު ބުނާ ގޮތުން ރިޔާސީ އިންތިހާބާގެ ޕްރައިމަރީއަށް ނަގަންޖެހޭ ކޮމެޓީއެއް ކަމަށް ހަސަން ވިދާޅުވިއެވެ.
އެ ކޮމެޓީގައި ހިމެނޭ ފަސް މެމްބަރުންނަކީ އެމްޑީޕީގެ ޗެއާޕާސަން ހަސަން ލަތީފާއި، އެޕާޓީގެ ނައިބް ރައީސް މުހައްމަދު ޝިފާޒާއި، މާލޭ ސިޓީ ކައުންސިލްގެ މޭޔަރ އަދި އެ ޕާޓީގެ އަންހެނުންގެ ރޫހުގެ ރައީސާ ޝިފާ މުހައްމަދާއި، ޒުވާނުންގެ ރޫހުގެ ރައީސް މީކާއިލް ނަސީމްގެ އިތުރުން އެޕާޓީގެ އިންތިހާބާ ބެހޭ ކޮމެޓީގެ މުގައްރިރު މަނިކެވެ. އެ ފަސް މެމްބަރުންގެ ބެލުމުގެ ދަށުން ޕްރައިމަރީ ބޭއްވުމަށް ވާންޖެހޭ ފަހުގެ ތައްޔާރީތައް މިހާރުވެސް ވަމުން އަންނަ ކަމަށް އެމްޑީޕީން ބުންޏެވެ.
އެމްޑީޕީގެ ޕްރައިމަރީ މެއި 30 ވަނަ ދުވަހު ބާއްވަން ފާސްކުރި ގަރާރުގައި ބުނެފައިވަނީ އެޕާޓީގެ މެމްބަރުންގެ ދަފްތަރަކީ އެ ޕާޓީން ކަނޑައަޅާ ހަމަތަކެއްގެ މަތީން ނިންމާ ދަފްތަރަކަށް ވާންޖެހޭނެ ކަމަށެވެ. އެހެންކަމުން ޕްރައިމަރީގައި ވޯޓުލުމުގެ ޙައްގު ލިބޭނީ މެއި މަހުގެ 15 ގެ ނިޔަލަށް އެޕާޓީގެ މެމްބަރޝިޕްކަން ހޯދައިވާފައިވާ މެމްބަރުންނަން ކަމަށް ހަސަން ވިދާޅުވިއެވެ.
ކެޕްޕެއިން ޕްރޮގްރާމްގައި ބައިވެރިވި ބައެއްް ވޮލެންޓިއަރުން
ރައީސް ނަޝީދުގެ ކެމްޕެއިން ޕްރޮގްރާމް ފަށާފައިވާއިރު، އެމަނިކުފާނު މިހާރު ހުންނެވީ ޖަލު ޙުކުމެއްގައިކަމުން، ރިޔާސީ އިންތިޚާބުގައި ވާދަކުރެއްވުމުގެ ފުރުސަތު، މި ހާލަތުގައި އެމަނިކުފާނަށް ލިބިވަޑައެއް ނުގަންނަވާނެއެވެ. ކަންމިހެން އޮތް ނަމަވެސް، ސްރީލަންކާގެ ދަ ކެޕިޓަލް މަހާރާޖާ އޯގަނައިޒޭޝަން (ޓީސީއެމްއޯއެލް)ގެ އަހަރީ ޖަލްސާގައި ދެއްވި ތަގުރީރަކަށް ފަހު ރައީސް ނަޝީދު ވަނީ، ފަހު ވަގުތު އެމަނިކުފާނަށް އިންޚާބުގައި ވާދަ ކުރެވޭނެ ކަމަށް ނިންމާނެ ކަމަށް ވިދާޅުވެފައެވެ.
މި އަހަރުގެ ސެޕްޓެމްބަރު މަހު ރިޔާސީ އިންތިޚާބު ބާއްވާނެ ކަމާއި، ޖޫން މަހު ކެންޑިޑަސީ ހުށަހެޅުމުގެ ފުރުސަތު ހުޅުވާލާނެކަން އިލެކްޝަން ކޮމިޝަނުން އިޢުލާނު ކޮށްފައިވާއިރު، ގުޅިފައިވާ ޕާޓީތަކުގެ ރޫޙު ހުރީ ވެސް ރައީސް ޔާމީން އާއި ދެކޮޅަށް ރިޔާސީ އިންތިޚާބުގައި އެއް ކެންޑިޑޭޓަކު ނެރުމަށެވެ. ނަމަވެސް އެފަރާތްތަކުން ވަނީ މިހާރު އޮތް އިލެކްޝަންސް ކޮމިޝަނާއި އެކު އިންސާފުވެރި އިންތިޚާބެއް ބޭއްވިދާނެ ކަމާއިމެދު ސުވާލު އުފައްދާފައެވެ.
