ސަރ އެލެކްސް ފަރގަސަން ބޮލުގެ އޮޕަރޭޝަނެއް ކޮށްފި

އިނގިރޭސި ލީގުގެ އެންމެ ކާމިޔާބު އެއް ޓީމުކަމަށްވާ މެންޗެސްޓަރ ޔުނައިޓެޑްގެ ކުރީގެ ކޯޗު ސަރ އެލެކްސް ފަރގަސަން ބޮލުގެ އޮޕަރަޝަނެއް ހޮނިހިރު ދުވަހު ކޮށްފިއެވެ.

އިނގިރޭސި މީޑިއާ ރިޕޯޓްތައް ބުނާ ގޮތުން ފަރގަސަންގެ ބޮލުގެ އޮޕަރޭޝަނެއް ކުރަން ޖެހުނީ 'ބްރެއިން ހެމަރޭޖް'އެއްގެ ސަބަބުންނެވެ.

މެންޗެސްޓަރ ޔުނައިޓެޑުން ނެރުނު ބަޔާނެއްގައި ބުނީ ފަރގަސަންގެ ސަރޖަރީ ދިޔައީ ރަނގަޅަށްކަމަށާއި، އެހެން ނަމަވެސް ފަރުވާއަށްޓަކައި އަރާމުކުރަން ޖެހޭކަމަށެވެ. އަދި އެއްކޮށް ހާލު ރަނގަޅުވާން ދުވަސްކޮޅެއް ނަގާނެކަމަށްވެސް ޔުނައިޓެޑުން ބުންޏެވެ.

26 އަހަރުވަންދެން ޔުނައިޓެޑްގެ ކޯޗުކަން ކޮށްދިން ފަރގަސަން ވަނީ އެޓީމަށް 38 ތަށި ހޯދައިދީފައެވެ. އުމުރުން މިހާރު 76 އަހަރުވެފައިވާ ފަރގަސަން ޔުނައިޓެޑްގެ ކޯޗުކަމުން އިސްތިއުފާ ދީފައިވަނީ 2013 ވަަނަ އަހަރުގައެވެ. އިނގިރޭސި ފުޓުބޯޅައިގެ ތާރީޚުގައި އެންމެ ކާމިޔާބު ކޯޗުގެ ލަޤަބު ހޯދާފައިވާ ފަރގަސަން ވަނީ މެންޗެސްޓަރ ޔުނައިޓެޑަށް އިނގިރޭސި ޕްރިމިއަރ ލީގު 13 ފަހަރު ހޯދައިދީފައެވެ.

ފަރގަސަން އެންމެ ފަހުން އާއްމުންނަށް ފެނިފައިވަނީ މިދިޔަ ހަފްތާގެ އާދިއްތަ ދުވަހު ޔުނައިޓެޑްގެ ދަނޑު އޯލްޑް ޓްރެފަޑްގައި އާސެނަލްގެ ކޯޗު އާސެން ވެންގާއަށް ހަނދާނީ ތައްޓެއް ހަވާލުކުރަން ގޮސް ހުއްޓައެވެ.

ފަރގަސަންގެ އާއިލާއިން ވަނީ ފަރގަސަންއަށް އާއިލާއާއިއެކު ވަގުތު ހޭދަކުރުމަށް ފުރުސަތު ދިނުމަށް ގޮވާލާފައެވެ.