ޔުއެފާ ޔުރޮޕާ ލީގުގެ ފައިނަލް ހިމެނޭގޮތަށް ހަތަރު މެޗަށް އެޓްލެޓިކޯ މެޑްރިޑްގެ ކޯޗު ޑިއޭގޯ ސިމިއޯނޭ ސަސްޕެންޑްކޮށްފިއެވެ.

ސިމިއޯނާއާ ދެކޮޅަށް ޔޫރަޕުގެ ފުޓްބޯޅައިގެ މައި އިދާރާ ކަމަށްވާ ޔުއެފާއިން ފިޔަވަޅު އަޅާފައިވަނީ ޔުރޮޕާ ލީގުގެ ސެމީ ފައިނަލުގެ ފުރަތަމަ ލެގުގައި އާސެނަލްއާ ދެކޮޅަށް އެޓްލެޓިކޯ ކުޅުނު މެޗުގައި އޭނާގެ އަމަލުތައް ހުރި ގޮތާއި ގުޅިގެންނެވެ. މި މެޗުގެ 13 ވަނަ މިނެޓުގައި ރެފްރީގެ ނިންމުންތަކާއި ހިތްހަމަނުޖެހުމުގެ ސަބަބުން ޒުވާބުކުރުމާއި ގުޅިގެން ސިމިއޯނޭ ވަނީ ބެންޗުން ވެސް ފޮނުވާލިއިރު އޭނާ ރެފްރީއާ ޒުވާބުކުރީ އެ ޓީމުގެ ޑިފެންޑަރު ސިމޭ ވިރްލާސްކޯއަށް ދެއްކި ރަތް ކާޑާއި ގުޅިގެންނެވެ.

ޔުއެފާއިން ވަނީ މެޗުގެ އޮފިޝަލަކާއި ދެކޮޅަށް ސިމިއޯނޭ ހަމަނުޖެހުން އުފައްދަން މަސައްކަތް ކުރި ކަމަށް ބުނެފައެވެ. ހަމައެހެންމެ އޭނާގެ ފަރާތުން ފެނިފައިވަނީ ކޯޗެއްގެ ފަރާތުން ފެންނަން ނުޖެހޭ އަމަލެއް ކަމަށާއި އަދި އޭނާ ވަނީ ދަނޑު މައްޗަށް އެއްޗެހި ވެސް އުކާފައި ކަމަށް ޔުއެފާއިން ވަނީ ބުނެފައެވެ.

މި މައްސަލައިގައި ޔުއެފާއިން ވަނީ އޭނާ ހަތަރު މެޗަށް ސަސްޕެންޑްކޮށް 10000 ޔޫރޯއިން ޖޫރިމަނާކޮށްފައެވެ. އާސެނަލްއާ ދެކޮޅަށް އަމިއްލަ ދަނޑުގައި ކުޅުނު މެޗުގައި އޭނާ ސަސްޕެންޝަނުގެ ފުރަތަމަ މެޗު ފުރިހަމަކޮށްފައިވާއިރު މި މަހުގެ 16 ވަނަ ދުވަހު މާސޭއާ ދެކޮޅަށް ކުޅޭ ފައިނަލް މެޗުގައި ވެސް ކުޅުންތެރިންނަށް އިރުޝާދު ދިނުމަށް ސިމިއޯނޭއަށް ބެންޗުގައި ނުހުރެވޭނެއެވެ.

އާސެނަލްގެ ދަނޑަށް އެއްޗެހި އުކުމާއި ގުޅިގެން ޔުއެފާއިން ވަނީ އެޓްލެޓިކޯ ވެސް 10000 ޔޫރޯއިން ޖޫރިމަނާ ކޮށްފައެވެ. މިއީ ސިމިއޯނޭއާ ދެކޮޅަށް ޔުއެފާއިން ފިޔަވަޅު އެޅި ފުރަތަމަ ފަހަރެއް ވެސް ނޫނެވެ.

އެޓްލެޓިކޯ އަދި އެ ޓީމުގެ ކޯޗާއި ދެކޮޅަށް ފިޔަވަޅު އެޅުމަށް ނިންމާފައިވާއިރު އެ ޓީމުން ވަނީ ފައިނަލްގެ ޖާގައެއް ހޯދާފައެވެ. އެޓްލެޓިކޯ ފައިނަލަށް ދަތުރުކުރީ ސެމީ ފައިނަލުގައި 2-1 ގެ އެގްރިގޭޓް ނަތީޖާއަކުން އާސެނަލްގެ މައްޗަށް ކުރި ހޯދައިގެންނެވެ. މި ދެ ޓީމު އާސެނަލްގެ ދަނޑުގައި ކުޅުނު ފުރަތަމަ ލެގުގެ މެޗު 1-1 އިން އެއްވަރުވިއިރު އަމިއްލަ ދަނޑުގައި ކުޅުނު ދެވަނަ ލެގުގެ މެޗު އެޓްލެޓިކޯއިން ކާމިޔާބުކުރީ 1-0 ގެ ނަތީޖާއަކުންނެވެ.

ފައިނަލްގައި އެ ޓީމު ނުކުންނާނީ ފްރާންސްގެ މާސޭއާ ދެކޮޅަށެވެ.