އެންމެފަހުން ފަތާ ޓްރެކް ފުންކުރަން ނިންމައިފި
5 މެއި 2018 | ހޮނިހިރު 08:20ފަތާ ޓްރެކުގެ ބޮޑު ބައި ވަނީ ހިކިފައި
މާލޭ ފަތާ ޓްރެކް ސަރަހައްދު
މާލޭ ދެކުނު ފަރާތު ފަތާ ޓްރެކް ސަރަހައްދުގެ އެއް ފަރާތަކަށް ވެލިތައް ޖަމާވެ، ތިލަވެފައިވާތީ އެތަން ފުން ކުރުމުގެ މަސައްކަތް ފަށާނެ ކަމަށް ހައުސިން މިނިސްޓްރީން ބުނެފިއެވެ.
ފާތާ ފެންގަނޑުގެ އިރުމަތީ ފަރާތަށް، ވެލިތައް ޖަމާވެ، އެތަން ބޭނުންކުރާ މީހުންނަށް ދަތިތަކާ ކުރިމަތިވެފައިވާތާ ގިނަ ދުވަސްތަކެއް ވަނީ ވެފައެވެ. ދިޔަވަރު ބޮޑުވާ ވަގުތުތަކުގައިވެސް އެތަނުގައި އަޅާފައިވާ ޕްލެޓްފޯމް ބޭނުން ނުކުރެވޭ ވަރަށް، ޓްރެކް ސަރަހައްދު ހިކިފައިވުމުން އެތަން ބޭނުންކުރާ މީހުންގެ ޝަކުވާ ވަނީ ބޮޑުވެފައެވެ.
އެ ވާހަކަތަކާ ގުޅިގެން، ރައްޔިތުންގެ ކަންބޮޑުވުން "ރާއްޖެއެމްވީ" އިން ގެނެސްދީފައި ވަނިކޮށް، ހައުސިން މިނިސްޓަރު ޑރ. މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ ފަތާ ޓްރެކް ސަރަހައްދު ކޮނެ، ފުން ކުރުމަށް ނިންމާފައި ވަނީ ޔޫތް މިނިސްޓްރީން އެދިގެން ކަމަށެވެ. އެ މަސައްކަތް ފަށާނެ ތާރީހެއް ވިދާޅު ނުވެ، މިނިސްޓްރު ވިދާޅުވެފައި ވަނީ އެ މަސައްކަތް ކުރަމުންދާ ވަގުުތުގައި ސަލާމަތަށްޓަކާ އާންމުންގެ އެހީތެރިކަން ބޭނުންވާ ކަމަށެވެ.
ފަތާ ޓްރެކް ސަރަޙައްދަށް ކުނި ޖަމާވާ މައްސަލަވެސް ވަނީ ބޮޑުވެފައި
ފަތާ ޓްރެކް ސަރަހައްދުގެ ބޮޑު ބަޔަކަށް ވެލި ޖަމާވެ، ހިކިފައިވާއިރު، އެތަނަށް ކުނި ގިނަވާ މައްސަލަވެސް ވަނީ ބޮޑުވެފައެވެ. އެގޮތުން ޕްލާސްޓިކާއި ނަޖިސްފަދަ ތަކެތި އެތަނަށް ޖަމާވެ، އާންމު ސިއްހަތަށް ނުރައްކާވާ ދަރަޖައަށް އެ ފެންގަނޑު ތަޣައްޔަރުވަމުންދާ ކަމުގެ ކަންބޮޑުވުން އެކި ފަރާތްތަކުން ދަނީ ފާޅުކުރަމުންނެވެ. އަދި އެ ފެންގަނޑަށް ތެޔޮ އެޅޭ މައްސަލަ ވެސް ދޭތެރެ ދޭތެރެއިން ވަނީ ފެންމަތިވެފައެވެ.
