އެމެރިކާގެ ކުރީގެ ރައީސް ބުޝް ހޮސްޕިޓަލުން ދޫކޮށްލައިފި

އެމެރިކާގެ ކުރީގެ ރައީސް ޖޯޖް އެޗް ޑަބްލިއު ބުޝްގެ ހާލުކޮޅު ގޯސްވެ އައިސީޔޫގައި ފަރުވާދިނުމަށް ފަހު، ހޮސްޕިޓަލުން ދޫކޮށްލައިފި އެވެ.

ބުޝް އާއިލާގެ ސްޕޯކްސްޕާސަން އާއި ހަވާލާދީ، މީޑިއާތަކުގައި ބުނެފައިވަނީ ބުޝްގެ ހާލުކޮޅު މިހާރު ރަނގަޅު ކަމަށާއި، ގެޔަށް އާދެވުމުން ބުޝް ހުންނެވީ އުފަލުން ކަމަށެވެ.

އުމުރުފުޅުން 93 އަހަރުގެ ބުޝް ހޮސްޕިޓަލުގައި އެޑްމިޓްކޮށް، އައިސީޔޫގައި ފަރުވާދީފައި ވަނީ ލޭގެ އިންފެކްޝަނެއްގެ ސަބަބުން ކަމަށް އާއިލާގެ ސްޕޯކްސްޕާސަން މީގެކުރިން ވަނީ ބުނެފަ އެވެ. ފުރަތަމަ ބުޝްއަށް އައިސީޔޫގައި ފަރުވާދިން ނަމަވެސް، ފަހުން ބުޝްއަށް ފަރުވާދީފައި ވަނީ އައިސީޔޫގައެއް ނޫނެވެ.

ބުޝް އެޑްމިޓްކޮށްފައިވަނީ އަނބިކަނބަލުން ބާބަރާ ބުޝްގެ ޖަނާޒާގެ ކަންތައް ނިންމާލިތާ އެއްދުވަސް ފަހުންނެވެ. އެއީ މިދިޔަ އޭޕްރީލް މަހުގެ ތެރޭގަ އެވެ. ބުޝްއަށް ހޮސްޕިޓަލުގެ 13 ދުވަސްވަންދެން ފަރުވާދީފައިވެއެވެ.

ބުޝްއަކީ އެމެރިކާގެ 41 ވަނަ ރައީސް އެވެ. އެމަނިކުފާނު ވަނީ 1989 އިން 1993 ވަނަ އަހަރަށް އެމެރިކާގެ ރައީސްކަން ކުރައްވާފަ އެވެ. ބުޝްއަކީ ނައިބް ރައީސްކަން ކުރެއްވި ބޭފުޅެއްގެ އިތުރުން ސީއައިއޭގެ ޑިރެކްޓަރުކަން ވެސް ކުރެއްވި ބޭފުޅެކެވެ.