އިންސާފުވެރި އިންތިޚާބަކަށް މަސައްކަތް ކޮށްދިނުމަށް ބައިނަލްއަގުވާމީ މުޖުތަމައަށް ވަނީ ގޮވާލައިފި
2013 ވަނަ އަހަރު މަޤާމުގެ ހުވާކުރުމަށް ބޭއްވި ރަސްމިއްޔާތުގައި ޑރ. ޖަމީލް، ރައީސް ޔާމީނާއެކުގައި
ރައީސް އަބްދުﷲ ޔާމީން މިހާރު މަސައްކަތް ކުރައްވަނީ ރައްޔިތުންގެ މަޖިލީސް އުވާލަން ކަމަށް ކުރީގެ ނައިބް ރައީސް ޑރ. މުހައްމަދު ޖަމީލް ވިދާޅުވެއްޖެއެވެ.
ރައީސް ޔާމީންގެ ސަރުކާރުގެ ފުރަތަމަ ނައިބް ރައީސް ކަން ކުރައްވާފައިވާ ޑރ. ޖަމީލް މިގޮތަށް ވިދާޅުވީ އުއްތަމަ ފަނޑިޔާރު އަބްދުﷲ ސައީދާ ފަނޑިޔާރު އަލީ ހަމީދުގެ މައްޗަށް ކުރާ ތުހުމަތުތަކުގެ ތަހުގީގަށް ބައެއް ފަރާތްތަކުން ދީފައިވާ ސިއްރު ބަޔާންތައް ލީކުވުމާއި ގުޅިގެން ހުކުރު ދުވަހު ކުރެއްވި ޓްވީޓެއްގައެވެ.
ލީކްވި ބަޔާންތަކުގައި ހިމެނޭ ކަންކަމާމެދު ކަންބޮޑުވުން ފާޅުކުރައްވަމުން ޖަމީލް ވިދާޅުވީ ދިވެހި ރާއްޖޭގެ ޝަރުއީ ދާއިރާ ރައީސް ޔާމީންގެ މުށުތެރެއަށްލުމަށް ކެނޑިނޭޅި މަސައްކަތް ކުރައްވަމުން ގެންދާ ކަމަށެވެ. މިހާރު ލީކްވެގެން އުޅޭ ސިއްރު ބަޔާންތަކުން ޝަރުއީ ދާއިރާއަށް ސަރުކާރުގެ ނުފޫޒު އޮތް މިންވަރު ސާފްވާ ކަމަށް ޖަމީލް ވިދާޅުވިއެވެ.
ރާއްޖޭގެ ހާލަތަކާއި މެދު ކަންބޮޑުވުން ފާޅުކުރައްވަމުން ޖަމީލް ވަނީ ދިވެހި ރައްޔިތުންނަން މިނިވަން އިންސާފުވެރި އިންތިޚާބެއް ހޯދައިދިނުމަށް ބާރުއަޅައިދިނުމަށް ބައިނަލްއަގުވާމީ މުޖުތަމައަށް ގޮވާލައްވައިފިއެވެ. އަދި ރާއްޖޭގެ ހާލަތު މިހާރު އޮތް ގޮތުން ބައިނަލްއަގްވާމީ މުޖުތަމުގެ އެހީތެރިކަމަކާއި ނުލައި މިނިވަން އިންސާފުވެރި އިންތިޙާބެއް ބޭއްވުމަކީ ނާދިރުކަމެއް ކަމަށް ޓްވީޓްގައި ވަނީ ފާހަގަކުރައްވާފައެވެ.
ފެބްރުއަރީ 1 ވަނަ ދުވަހު ސުޕްރީމް ކޯޓުން ނެރުނު އަމުރާ ގުޅިގެން ހައްޔަރުކޮށްފައިވާ ފަރާތްތަކުގެ މައްސަލަ ތަހުގީގުކުރި އިރު އެކި ފަރާތްތަކުން ފުލުހުންނަށް ދީފައިވާ ބަޔާންތަކެއް ލީކް ކޮށްފައިވާ މައްސަލަ ސީރިއަސް މައްސަލައެއްގެ ގޮތުގައި ފުލުހުން މިހާރު ދަނީ ބަލަމުންނެވެ. ލީކް ވެފައިވާ ލިޔުންތަކުގެ ތެރޭގައި ފުލުހުންގެ އިސްވެރިންނާއި ފަނޑިޔާރުންނާއި ބައެއް އާންމުންގެ ބަޔާންތައް ކަމަށް ބުނާ ލިޔުންތައް ހިމެނެއެވެ. އޭގެ ތެރޭގައި ކުރީގެ ކޮމިޝަނާ އޮފް ޕޮލިސް އަހްމަދު އަރީފް އާއި ހައްޔަރުކޮށްފައިވާ އެސްއޯގެ ކުރީގެ ބައެއް ފުލުހުންނާ ދެކޮޅަށް ޑެޕިއުޓީ ކޮމިޝަނާ އޮފް ޕޮލިސް އަހްމަދު ސައުދީ އާއި ޕޮލިސް ސާޖެންޓް މުހައްމަދު ޝާހީން އާއި ޗީފް އިންސްޕެކްޓާ މުހައްމަދު ނިޔާޒް އާއި މޯލްޑިވްސް ޕޮލިސް ސާވިސްގެ ޕަބްލިކް ސޭފްޓީ އެންޑް ރެސްޕޮންސް ޔުނިޓްގެ ދަށުން ހިންގަމުންދާ ޝިއަރާ ސްކޮޑްގައި މަސައްކަތްކުރާ ޕޮލިސް ސާޖަންޓް މުހައްމަދު އާސިފް ދީފައިވާ ކަމަށް ބުނާ ބަޔާންތަކެއް ހިމެނެއެވެ.
މީގެ އިތުރުން ހައްޔަރުކޮށްފައިވާ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާ ގުޅޭ ގޮތުން ކްރިމިނަލް ކޯޓުގެ އިސް ފަނޑިޔާރު އާދަމް އާރިފް ދެއްވާފައިވާ ކަމަށް ބުނާ ބަޔާނަކާއި ސިވިލް ކޯޓްގެ ގާޒީ މުހައްމަދު ހަލީމް ދެއްވާފައިވާ ކަމަށް ބުނާ ބަޔާނަކާއި ގާނޫނީ ސަރުކާރު ޣައިރު ގާނޫނީ ގޮތެއްގައި ވައްޓާލަން މަސައްކަތްކުރެއްވި ކަމުގެ ތުހުމަތުގައި ހައްޔަރުކޮށްފައި ހުންނެވި ކުރީގެ ރައީސް މައުމޫން އަބްދުލްގައްޔޫމާ ދެކޮޅަށް އާންމުންގެ މީހަކު ދީފައިވާ ބަޔާނަކާއި މާލޭ ސިޓީ ކައުންސިލްގެ ކުރީގެ މެންބަރު ޒައިދުލް އަމީން ދީފައިވާ ބަޔާނެއް ކަމަށް ބުނާ ލިޔުންތަކެއް ވެސް ސޯޝަލް މީޑިއާގައި ވަނީ ލީކްވެފައެވެ.
